Mataio 5:1-48
5 E KITE aturā Iesu i te urupu tangata ra, kake atura aia ki runga i te maunga; noo iora ki raro, e kua aere maira tana au pipi kiaia.
2 Kua tuatua akera tona vaa, apii atura ia ratou, na ko atura,
3 E ao to tei akaaka te ngakau: no ratou te basileia o te ao.
4 E ao to tei aue: e tarekarekaia ratou.
5 E ao to tei maru: e riro ia ratou te enua.
6 E ao to tei pongi, e tei kaki i te tuatua-tika: e akakiia ratou.
7 E ao to tei aroa ia etai ke ra: e aroa katoaia mai ratou.
8 E ao to tei mā te ngakau: e kite oki ratou i te Atua.
9 E ao to tei akamoeau: e karangaia ratou e tamariki na te Atua.
10 E ao to tei takinga-kinoia i te tuatua-tika ra: no ratou te basileia o te ao.
11 E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei:
12 E rekareka kotou, e kia rere ua i te rekareka; e tutaki maata oki ta kotou i te ao ra: i pera oki ratou i te takinga-kino i te aronga peroveta, ko mua ïa ia kotou.
13 Ko kotou te tai no te enua: kareka kia mangaro te tai ra, eaa atura te mea e taitai ei? kua riro ïa ei mea puapinga kore, e akarukeia ïa, e takatakaiia e te vaevae tangata.
14 Ko kotou te mārama o te ao nei. Te oire i akatuia ki runga i te maunga ra, kare ïa e ngaro.
15 Kare oki te tangata e tutungi i te lamepa, ka tuku atu ei ki raro ake i te aite, ei runga ra i te vairanga, kia mārama to te are katoa.
16 Koia katoa to kotou mārama, kia kakā ïa ki mua i te aroaro o te tangata nei, kia akara ratou i ta kotou angaanga meitaki, e kia akameitaki ratou i to kotou Metua i te ao ra.
17 Auraka e manako e, i aere mai au e akakore i te ture, e ta te au peroveta ra; kare au i aere mai e akakore, e akatupu ra.
18 Koia tika taku e karanga atu kia kotou nei, E kore ake te rangi e te enua, i tetai iota e tetai vaʼi mea ngiti poepoe o te ture nei, kare ïa e kore, e ope takiri ïa i te tupu.
19 E teianei, ko te akaapa, e te apii ia etai ke, kia akaapa i tei mea ngiti o te au akauenga nei, e karangaia aia i te mea ngiti rava i te basileia o te ao; kareka te akono, e kua apii i taua au tuatua nei, e karangaia aia i te mea maata i te basileia o te ao ra.
20 E akakite atura au kia kotou, Kia kore kia maata atu ta kotou tuatua-tika i ta te aronga tata tuatua, e ta te aronga Pharisea, kare rava kotou e o ki te basileia o te ao.
21 Kua akarongo oki kotou e i tuatuaia mai e te aronga taito ra e, “Auraka rava koe e ta ua:” e te ta ua ra, e tau iaia te akavaanga:
22 Te karanga atu nei ra au kia kotou, Ko te tangata e riri ua ki tona taeake, e tau katoa iaia te akavaanga: e te karanga atu ki tona taeake, e Raka; e tau iaia te Sunederi; kareka ko tei karanga atu, e More, e tau iaia te ai i te po.
23 E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na:
24 Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga.
25 Kia rapurapu koe i te akatika taau tuatua i taau tangata ou, i to korua aerenga na te ara; ko te tuku atu aea te tangata ou ia koe ki te akava ra, e ko te tuku aea te tangata akava ia koe ki te tangata taoonga ra, e uriia atura koe ki roto i te are tapekaanga.
26 Tikai taku e karanga atu kia koe, Kare takiri koe e tukuia mai, e kia oko na rava ia koe te faringa openga ra.
27 Kua akarongo kotou e, i tuatuaia mai e te aronga taito ra e, “Auraka rava koe e akaturi:”
28 Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.
29 E te pekapeka na koe i toou mata katau, e koiti, e akaruke ke atu: e meitaki oki koe me mate tetai oou melo, i to kopapa katoa kia uriia ki roto i te po.
30 E te pekapeka na koe i toou rima katau, e tipu, e akaruke ke atu: e meitaki oki koe me mate tetai oou melo, i toou kopapa katoa kia uriia ki roto i te po.
31 I tuatuaia oki Ko tei inangaro i te kopae i tana vaine, e e kave atu i tetai tuatua kopae kiaia ra;
32 Te karanga atu nei ra au kia kotou, Ko te kopae i tana vaine, auraka no te akaturi, kua akariro aia iaia ei akaturi; e te akaipoipo i tei kopaeia ra, kua akaturi katoa ïa.
33 Kua akarongo oki kotou e i tuatuaia mai e te aronga taito ra e, Auraka koe e taputou pikikaa ua, e akatupu ra i taau i taputou ia Iehova ra:
34 Te karanga atu nei ra au kia kotou, Auraka e taputou, auraka rava; auraka i te rangi; ko te terono ïa no te Atua:
35 Auraka i te enua; ko tona ïa pange avae: auraka i Ierusalema; ko te oire ïa o te Ariki maata.
36 Auraka katoa koe e taputou i toou uaorai upoko, kare e tika ia koe i te akateatea i tetai io rauru, e te akakerekere i tetai.
37 Kia riro ra ta kotou Koia, ei koia; e ta kotou Kare, ei kare; e te vai atu rai te tuatua, no roto ïa i te kino.
38 Kua akarongo kotou e, i tuatuaia maira, E mata ra, ei mata ïa te tutaki, e nio ra, ei nio ïa:
39 Te karanga atu nei ra au kia kotou, Auraka e akaoki atu i te kino: ko te moto mai i toou paparinga katau nei, e ariu katoa atu i tetai.
40 E kia akava mai tetai tangata ia koe i te ture, e rave mai i toou kakau, o atu katoa i toou pereue.
41 E ko te akaue mai kia koe e aere i tetai maile, aere ua atu korua e rua maile.
42 E oronga atu na tei pati mai ia koe ra; e ko tei ori mai ia koe ra, auraka e akaoki uaia atu.
43 Kua akarongo kotou e, i tuatuaia maira, “E aroa atu koe i toou tangata tupu,” e makitakita atu i toou enemi:
44 Te karanga atu nei ra au kia kotou, E aroa atu i to kotou aronga enemi, e akaora atu i tei tao mai; e takinga-meitaki atu i te aronga e makitakita mai ia kotou, e pure oki no te aronga e akakino mai e tei takinga-kino mai ia kotou:
45 Kia riro kotou ei tamariki na to kotou Metua i te ao ra: te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.
46 Ko tei aroa mai ia kotou, ko ta kotou e aroa atu, eaa ta kotou tutaki i reira? kare aina te aronga telona e pera katoa?
47 E to kotou aronga taeake anake ra, ta kotou ïa e tangi atu, eaa ta kotou ngai maata atu i reira? kare aina te au etene e pera katoa?
48 Kia apa kore oki kotou, mei to kotou Metua i te ao ra e apa kore.