Mataio 4:1-25
4 E I aratakiiā Iesu e te Vaerua ki te medebara ra, kia timataia e te diabolo ra.
2 Kua akakore iora aia i te kai e a ngauru o te po, e a oki ngauru o te ao, e oti akera, pongi iora aia.
3 Kua aere maira taua Timata ra, na ko maira kiaia, E Tamaiti koe na te Atua ra, ka karanga atu koe ki teianei au toka kia riro ei kai.
4 Kua karanga atura aia, na ko atura, Kua tataia, “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.”
5 Kua arataki atura te diabolo iaia ki te oire tapu ra, e kua tuku atura iaia ki rungao i te poretiko o te iero ra,
6 E kua karanga atura kiaia, E Tamaiti koe na te Atua ra, akatopa atu koe ia koe uaorai ki raro; kua tataia oki e, “Ka ikuiku aia i tana au angela ia koe;” “ka mou oki ratou ia koe i to ratou rima, ko te tukia ua atu aea to vaevae ki te toka.”
7 Kua tuatua mairā Iesu kiaia, Kua tata katoaia, e, “Auraka koe e timata atu i toou Atua ra ia Iehova.”
8 Kua arataki akaou atura te diabolo iaia ki runga i tetai maunga teitei rava, e kua akakite maira kiaia i te au basileia katoa o te ao nei, e to ratou kakā;
9 Kua tuatua maira kiaia, E oronga atu au i teianei au mea katoa kia koe, kia akatopa mai koe ki raro e akamori mai iaku.
10 Kua karanga aturā Iesu kiaia, E aere ke atu koe e Satani, kua oti oki i te tataia, “Ko toou Atua ra ko Iehova taau e akamori, e koia anake rai taau e akarongo.”
11 Akaruke iora te diabolo iaia, e i na, e aronga angela tei aere mai, e kua matuapuru maira iaia.
12 E kite akerā Iesu e kua tapekaiā Ioane, kua aere atura ki Galilea;
13 Akaruke iora aia ia Nazareta, aere atura, e noo atura i Kaperenauma, i te pae roto ra, i te kotinga i te enua o Zebulona e Naphatali;
14 Tika rava atura te tuatua a Isaia peroveta i reira, i te na ko anga mai,
15 “Te enua o Zebulona, e te enua o Naphatali, i tera pae Ioridana, i te pae roto, ko Galilea i o te etene ra,
16 Te aronga i noo i te poiri ra, kua akara ïa i te mārama maata; e te aronga i noo i te ngai maru-mate ra, kua itiia ratou e te mārama.”
17 I reira to Iesu akamata anga i te ako, i te na ko anga e, Ka tataraara: te vaitata mai nei oki te basileia o te ao.
18 E te aere rā Iesu na te pae roto i Galilea ra, kite atura aia i e toko rua puke tangata, i te tuakana ia Simona ko tei karangaia ia Petero ra, e tona taeake ko Anederea, te tuku ra i te kupenga i taua roto ra; e puke ravakai oki raua.
19 Kua karanga atura aia kia raua, Ka aru mai iaku, e akariro au ia korua ei ravakai tangata.
20 Akaruke iora raua i ta raua puke kupenga i reira, e kua aru maira iaia.
21 E te aere ua atura aia, kite atura i e toko rua rai puke tangata, ko Iakoba a Zebedaio ra, e tona taeake ko Ioane, tei runga i te boti e to raua metua ko Zebedaio, te ono ra i ta ratou puke kupenga, kua karanga atura aia ia raua.
22 Akaruke iora raua i te boti i reira, e to raua metua, aru atura iaia.
23 Aere aturā Iesu na Galilea katoa e kako rava ake, i te apii anga i roto i to ratou au sunago ra, e te tuatua anga i te evangelia o te basileia, e te akaora anga i te au maki ravarai, e te au mate katoa o te tangata.
24 Tutuki atura tona rongo e kako rava ake Suria; e kua apai maira ratou i te aronga maki katoa kiaia ra, ko tei mate i tera maki i tera maki, e te mamae, e tei uruia e te demoni ra, e te neneva, e te akangoru; kua akaora atura aia ia ratou.
25 E motuanga tangata maata tei aru mai iaia no Galilea mai, no Dekapoli, no Ierusalema, no Iudea, e no te pae i Ioridana ra.