Mataio 3:1-17
3 E I te reira tuatau, kua aere mairā Ioane bapetizo, i te tutu aere anga i te medebara i Iudea ra,
2 I te na ko anga e, E tataraara kotou; te vaitata mai nei oki te basileia o te ao.
3 Koia oki teia, ko tei karangaia mai e Isaia peroveta ra, ka na ko mai ei ra e, “E reo no tetai i te tutu aere anga i te medebara, Ka akameitaki i te arataa o te Atu, e akatika ua i tona aerenga.”
4 E uruuru kamela to Ioane kakau i tatuaia tona taukupu ki te kiri puaka; e tāpaki e te meli ngangaere tana kai.
5 Aere atura to Ierusalema kiaia ra, e to Iudea ravarai e to te enua katoatoa i te pae i Ioridana ra,
6 E bapetizoia iora e ia i Ioridana, ma te aaki i ta ratou ara.
7 Kia akara atura ra aia i te au Pharisea e manganui, e te au Sadukea, i te aere anga mai kiaia ra, kia bapetizoia, kua karanga atura aia kia ratou, E te anaunga vipera e, naai kotou i ako atu e e rere ke kotou i te mate e vaitata mai nei?
8 E tenana ka tuku mai na i te akonoanga e tau i te tataraara:
9 Auraka e manako i roto ia kotou uaorai e, E metua to matou ko Aberahama; e karanga atu oki au kia kotou, Ka tika i te Atua i te akatupu i te tamariki na Aberahama no roto i teianei au toka.
10 Te vai nei rai te tarapa i te tumu rakau i teianei; e te rakau katoa kare i ua mai i te ua meitaki ra, ka tipuia ïa, e titiriia atu ki roto i te ai.
11 Ko au nei, te bapetizo nei ia kotou ki te vai, kia tataraara kotou; koia ra ko tei ka aere mai i muri iaku nei, e maata tona mana i toku, kare au e tau kia apai i tona tamaka; nana e bapetizo ia kotou ki te Vaerua Tapu, e te ai:
12 Tei tona rima tona tairi, e tamā marie aia i tana ngai pāpā sitona, e akaputuputu aia i te sitona ki roto i te vairanga sitona; kareka te ota, ka tutungiia ïa e ia ki te ai mate kore.
13 Kua aere mairā Iesu i reira ki Ioridana mei Galilea mai, kia bapetizoia aia e Ioane.
14 Akakore atura rā Ioane, na ko atura, Ko au oki taau e bapetizo e tikaʼi, e e aere mai oki koe kiaku nei?
15 Kua tuatua mairā Iesu kiaia, na ko maira, Ka tuku ua mai na: e pera oki tatou i te akatika i te au tuatua-tika katoa e tau ei. Kua tuku maira aia i reira.
16 E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera aia i te Vaerua o te Atua i te eke anga mai mei te kukupa, e te to anga mai ki rungao iaia:
17 E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.