Mataio 28:1-20
28 E OTI akera te sabati, kia tae ki te akirata i te rā mua o te ebedoma ra, kua aere mairā Maria i Magadala, e tetai Maria oki, e atoro i te tanumanga ra.
2 E i na, e ngaruerue anga maata to te enua: kua eke mai oki tetai angela a te Atu ra mei te rangi mai, e kua uri ke atura i te toka i te ngutupa ra, noo iora ki rungao.
3 Mei te uira ra oki tona mata, e tona kakau mei te kiona te teatea:
4 Rutetete iora te aronga tiaki ra i te mataku iaia, riro atura mei te tangata mate ra te tu.
5 Kua tuatua maira te angela ki nga vaine ra, na ko maira, Auraka korua e mataku; kua kite oki au e, te kimi nei korua ia Iesu i akasatauroia nei.
6 Kare aia i ko nei; kua tu akaou akenei ïa, tana oki i tuatua ra. Ka aere mai, ka akara i te vairanga o te Atu ra.
7 Ka aere viviki ana korua, ka akakite atu ki tana au pipi e, kua tu akaou akenei aia mei te mate maira; e i na, te aere atura aia na mua ia kotou ki Galilea; ei reira kotou e kite atu ei iaia; i na, kua akakite atu na au ia korua.
8 Akaruke maira raua i te tanumanga i reira ma te mataku e te rekareka maata; oro atura e akakite ki tana au pipi.
9 E te aere atura raua ra e akakite atu ki tana au pipi, i na, kua aravei mairā Iesu ia raua, na ko maira, Kia ora na. Kua akavaitata atura raua, tapeka atura i tona vaevae, akamori atura iaia.
10 Kua na ko mairā Iesu kia raua, Auraka e mataku: ka aere, ka akakite atu ki taku au taeake, e aere ratou ki Galilea; ei reira ratou e kite mai ei iaku.
11 E kia riro atu raua ra, i na, kua aere maira tetai aronga tiaki ra ki roto i te oire, kua akakite maira ki te kau taunga nunui ra i te au mea katoatoa i tupu ra.
12 Kua akaputuputu iora ratou, e te aronga pakari, kua akataka iora te tuatua, e tuku atura i te moni maata na te aronga vaeau ra,
13 Na ko atura, E karanga atu kotou e, Na tana uaorai au pipi i tiki mai e keia iaia i te po, te moe ra oki matou.
14 E kia tae atu teianei tuatua i te taringa o te tutara ra, na matou e akamaru atu iaia, kia ora kotou.
15 Kua rave iora ratou i taua moni ra, akono atura i tei tuatuaia mai kia ratou ra; e te tamouia nei te reira tuatua e te ngati Iuda e teia noaʼi.
16 Aere atura te au pipi tino ngauru ma tai ra ki Galilea, i tetai maunga ta Iesu i tuatua mai kia ratou ra.
17 E kite akera ratou iaia, kua akamori atura; kareka tetai papaki, kua ekoko ïa.
18 Kua akavaitata mairā Iesu, na ko maira kia ratou, Ko te mana katoa o to te rangi e te ao katoa nei, kua tukuia mai, tei iaku anake.
19 E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu;
20 Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao. Amene.