Mataio 26:1-75
26 E KIA akaoti akerā Iesu i teia katoa nei au tuatuaanga, kua na ko maira ki tana au pipi,
2 Kua kite kotou e, e rua rā toe i te pasa ra, ei reira te Tamaiti a te tangata nei e tukuiaʼi kia akasatauroia.
3 Kua putuputu maira te kau taunga nunui, e te au tata tuatua, e te au tangata pakari ra i reira, ki roto i te are o te taunga maata ra, ko tei karangaia ko Kaiapha.
4 Kua kimi iora i te ravenga e raukaʼi a Iesu ia ratou i te pikikaa, ka ta atu ei.
5 Kua na ko ra ratou, Auraka i te rā oroa nei, ko te oripu aea te tangata.
6 Tei Betaniā Iesu, tei te ngutuare o Simona lepera ra,
7 Kua aere maira tetai vaine iaia ma tetai pia alabata, e manongi meitaki maata, e kua riringi ki rungao i tona mimiti i te kaingakai ra.
8 E kite akera tana au pipi, kua riri iora, na ko akera, Eaa teianei manongi i kaimoumouiaʼi?
9 E moni maata te rauka i teia manongi kia oko, ka apai atu ei na te tangata rikiriki.
10 Kite akerā Iesu ra, kua na ko atura kia ratou, Eaa kotou e tamanamanata mai ei i teianei vaine? e ravenga meitaki tana kiaku nei.
11 E noo tamou oki te tangata rikiriki ki o kotou nei; ko au ra, kare ïa e noo ki o kotou nei.
12 E teianei manongi tana i riringi ki rungao i toku nei kopapa, no toku ïa tanumanga tana i rave nei.
13 Koia mou taku e karanga atu kia kotou nei, Te au ngai katoa e tuatuaiaʼi teianei evangelia i te ao katoa nei, e tuatua katoaia ta teianei vaine i rave nei, ei manako anga atu iaia.
14 Aere atura tetai o taua tino ngauru ma rua i reira ra, ko tei karangaia ra ko Iuda Ikariota, ki te kau taunga nunui ra,
15 Kua karanga atura, Eaa ta kotou e o mai naku, e naku e tuku atu iaia kia kotou ra? Kua akatau maira ratou e toru ngauru moni ario nana.
16 E mei reira mairai tona kimi anga i te ngai meitaki e tuku mai iaia kia ratou ra.
17 E tae akera ki te rā mua o te oroa i te kai akaopue koreia ra, kua aere maira nga pipi kia Iesu ra, na ko maira, Eiea maua e akonokono ei i te pasa kia kai koe?
18 Kua karanga atura aia, Ka aere atu ki roto i te oire kia Mea ra, e karanga atu kiaia, Te tuatua maira te Orometua, Kua vave toku tuatau; ei to are e kai ei au i te pasa, e taku au pipi katoa.
19 Kua pera atura nga pipi ta Iesu i akaue ra; kua akonokono iora i te pasa.
20 E aiai iora, kua noo atura aia ki raro e te tino ngauru ma rua katoa ra.
21 E te kai ra ratou, kua na ko atura aia, Koia mou taku e karanga atu kia kotou nei, ka pikikaa tetai o kotou nei iaku.
22 Kua taitaia rava atura ratou, kua taki tai maira ratou ravarai i te ui anga mai kiaia, E te Atu, ko au ainei?
23 Kua karanga atura aia, na ko atura, Ko tei tuku kapipiti o maua rima ki roto i te kapu nei, nana e pikikaa iaku.
24 Te aere nei te Tamaiti a te tangata mei tei tataia nona ra: ko taua tangata ra, e pikikaa i te Tamaiti a te tangata nei, e ae oki aia! e ngari ake te reira tangata naringa kare i anau mai.
25 Kua tuatua katoa mairā Iuda, tei pikikaa mai iaia ra, na ko maira, E Rabi, ko au aina? Kua na ko atura aia kiaia Koia ïa.
26 E te kaikai ra ratou, kua rave iorā Iesu i te manga, e kua akameitaki atura, vavaʼi iora, tuku atura ki te au pipi, na ko atura, Ka rave, ka kai; ko toku kopapa teia.
27 Kua rave iora aia i te kapu, akameitaki atura, tuku atura kia ratou ra, na ko atura, Ka inu na kotou ravarai;
28 Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.
29 E akakite au kia kotou, teia au ka kore e inu akaou i to roto i te ua vine nei, e tae ua atu ki te rā e inu ei au i te wina ou, e kotou katoa, i te basileia o taku Metua.
30 E oti akera te imene, aere atura ratou ki vao i te maunga ra i Oliveta.
31 Kua karanga aturā Iesu kia ratou, Ei teianei po e maitu ei kotou katoa iaku nei: kua oti oki i te tataia, “E pāpā au i te tiaki, e ka pueurikiriki ke oki te mamoe.”
32 E kia tu akaou mai au ra, e na mua au ia kotou i te aere ki Galilea.
33 Kua tuatua mairā Petero kiaia, na ko maira, Kia maitu te tangata katoa ia koe, kare takiri au nei e maitu.
34 Kua na ko mairā Iesu kiaia, Koia mou taku e karanga atu kia koe nei, Kare e kakaoa te moa akonei, ka tu toru oou uuna anga iaku.
35 Kua karanga aturā Petero kiaia, Mate ua atu au ia koe na, kare au e uuna ia koe. Kua pera rai oki te au pipi katoa.
36 Aere aturā Iesu ma ratou katoa ki tetai ngai ko Getesemane te ingoa, kua na ko maira i te au pipi, E noo kotou i ko nei, kia aere au ki ko akera e pure.
37 Kua arataki katoa atura ia Petero, e nga tamariki a Zebedaio ra, toko rua, kua taitaia iora aia, e teiaa tukituki akera.
38 Kua tuatua maira aia kia ratou; Kua pini rava toku vaerua i te mamae mate maata: e noo i ko nei, e ara tatou.
39 Aere atura aia ki mua itio, tipapa iora ki raro ma te pure, na ko atura, E taku Metua, kia tika, kia apai keia teianei kapu iaku nei: kia tupu ra toou anoano; auraka toku.
40 Kua oki maira aia ki te au pipi, rokoia maira, te moe ra ratou, kua na ko maira kia Petero, Eaa oki tena? kare e tika ia kotou kia ara tatou i te ora iti okotai?
41 E ara, e e pure oki kia kore kotou e rokoia e te timataanga: kua tika oki i te vaerua, te parukaua nei ra te kopapa.
42 Aere akaou atura aia, ko te tu rua ïa, kua pure iora, na ko atura, E taku Metua e, kare rava e tuku anga iaku, kia inu rai au i teianei kapu e tikaʼi, kia tupu toou anoano.
43 E kia oki akaou mai aia, rokoia maira, te moe rai ratou; kua teimaa oki to ratou mata.
44 Vaio iora aia ia ratou, aere akaou atura e pure, ko te tu toru ïa, okotai rai pure.
45 Kua oki maira aia ki tana au pipi i reira, kua na ko maira kia ratou. Ka moe ra, e kia anga marie i te roi: i na, kua vaitata te ora e tukuiaʼi te Tamaiti a te tangata nei ki te rima o te aronga ara.
46 Ka tu, e taki aere tatou: i na, te vaitata mai nei te pikikaa iaku nei.
47 E kare i oti tana tuatua, i na, ko Iuda maira, tetai o te tino ngauru ma rua ra, ma te urupu tangata maata, ma te koke e te rakau, no ko i te kau taunga nunui e te aronga pakari o te tangata ra.
48 Kua tuku ana oki taua pikikaa ra i te akairo ia ratou, na ko atura, Ko te tangata taku e ongi atu, koia ïa; ka opu atu kotou.
49 Kua aere maira aia i reira ra kia Iesu, na ko maira, Kia ora na koe, e Rabi; e kua ongi maira iaia.
50 Kua karanga aturā Iesu kiaia, E tama, i aere mai koe i te aa? Kua akavaitata maira ratou, kua rave maira i te rima ia Iesu, opu maira iaia.
51 E i na, kua rave iora tetai ki o Iesu ra i tana koke, unui akera; ta atura i te tavini o te taunga maata ra, motu ke atura tona taringa.
52 Kua karanga aturā Iesu kiaia, Ka momono ana i taau koke ki roto i te vaî; ko tei rave i te koke ra, ka mate ïa i te koke.
53 Kare aina koe i manako e, e tika iaku kia pure ki taku Metua i teianei; e nana e oronga mai i te angela raungauru ma rua te manotini, e kia maata atu rai?
54 Eaa iora ra e tupu ei te tuatua i tataia ra i reira e, kia pera e tikaʼi?
55 I reira ra to Iesu tuatua anga i taua aronga maata ra, E aere mai oki kotou ma te koke e te rakau e opu iaku mei te mea e, e keia? I noo ua na oki au i rotopu ia kotou i te au rā katoa, i te apii anga i roto i te iero, e kare ua kotou i rave mai iaku.
56 Kia tika ra te tuatua a te au peroveta i tataia ra, i tupu ei teia au mea katoa nei. Akaruke iora te au pipi ravarai iaia i reira ra, oro atura.
57 E te aronga i opu ia Iesu ra, arataki atura ratou iaia ki te taunga maata ra kia Kaiapha, kua putuputu te au tata tuatua e te aronga pakari i reira.
58 Kua aru aturā Petero iaia i muri roa, e i te koro o te taunga maata ra, tomo atura ki roto, noo iora e te aronga tavini katoa, kia kite aia i te openga.
59 Te kimi ra te kau taunga nunui ra, e te aronga pakari, e te Sunederi katoa, i te kite pikikaa ia Iesu, kia akaapa atu iaia kia mate.
60 Kare ra i kitea; e manganui oki te kite pikikaa i aere mai, kare rai i kitea. E te openga iora, kua aere maira e toko rua puke kite pikikaa, Na ko maira,
61 I tuatua mai oki teianei tangata, E tika iaku i te vavaʼi i te nao o te Atua nei, e kia po toru, kua tu akaou ïa iaku.
62 Kua tu akera te taunga maata ra ki runga, kua na ko maira kiaia, Kare koe e tuatua mai? eaa ta nga tangata nei i tapepe mai ia koe nei?
63 Te muteki ua rā Iesu. Kua tuatua maira taua taunga maata ra kiaia ra, na ko maira, Te akataputouia nei koe e au i e Atua ora ra e, e akakite mai koe kia matou nei, ko koe aina te Mesia, te Tamaiti a te Atua?
64 Kua karanga aturā Iesu kiaia, Koia ïa taau i tuatua mai na; e e akakite atu oki au kia kotou, Ka kite kotou a muri ake i te Tamaiti a te tangata i te noo anga i te rima katau o Tei mana ra, e te aere anga mai na roto i te tiao rangi.
65 Kua aae iora taua taunga maata ra i tona kakau, na ko atura, Kua akakino Atua aia; eaa ua atu rai to tatou kite? I na, kua kite ua kotou i tana akakino Atua.
66 Eaa to kotou na manako? Kua na ko maira ratou, E tau iaia te mate.
67 Kua tutua atura ratou i te uavare ki tona mata, moto atura oki iaia; e tetai aronga, kua papaki atura i te paparinga, Na ko atura,
68 E akakite mai na, e te Mesia e, i tei papaki ia koe na.
69 Te noo rā Petero ki vao, i roto i te koro, e kua aere maira tetai tavini vaine kiaia ra, na ko maira, I reira katoa koe ia Iesu i Galilea ra.
70 Kua uuna iora aia ki mua ia ratou ravarai, na ko atura, Kare rava au i kite i taau i tuatua mai na.
71 E riro atura aia ki vao i te tomoanga ra, kua akara maira tetai tavini vaine iaia, kua na ko atura i te aronga e noo i reira, Ia Iesu o Nazareta katoa teianei tangata.
72 Kua uuna akaou iora aia ma te taputou, na ko atura, Kare takiri au i kite i tenana tangata.
73 E roa iti akera, kua aere maira te aronga i tu ua i vaitatao ra, e kua na ko maira kia Petero, No ratou tikai koe; te kitea nei i toou reo.
74 Kua tao ua iora aia ma te taputou, na ko akera, Kare takiri au i kite i teianei tangata. Kakaoa iora te moa i reira ra.
75 Kua maara iorā Petero i te tuatua a Iesu i tuatua mai kiaia ra e, Kare e kakaoa te moa, e e toru katoa oou uuna anga iaku. Aere atura aia ki vao, maata ua atura te aue.