Mataio 25:1-46
25 E TAU oki te basileia o te ao i nga paretenia tino ngauru, ko tei rave i ta ratou au lamepa, e aere atura kia aravei i te tane akaipoipo ou ra.
2 E aronga pakari e toko rima, e neneva oki e toko rima.
3 Ko te aronga neneva ra, kua apai atura i ta ratou au lamepa, kare ra i apai katoa i te mori:
4 Kareka te aronga pakari ra, kua apai ratou i ta ratou au lamepa ma te mori katoa ki roto i ta ratou āriki.
5 E te roa ra taua tane akaipoipo ou ra, kua varea iora ratou ravarai e te moe, moe atura.
6 E tae akera ki te turuaipo, ko te kapiki maira, I na, te aere mai nei te tane akaipoipo ou nei; ka aere kotou kia aravei atu iaia.
7 Kua tu akera te aronga paretenia katoa ki runga, e kua akateateamamao i ta ratou au lamepa.
8 Kua karanga atura te aronga neneva ki te aronga pakari, Ka o mai i tetai manga i ta kotou mori; te matemate nei oki ta matou au lamepa.
9 Kua tuatua maira te aronga pakari ra, na ko maira, Eiaa; ko te kore aea e rava na tatou katoa: e aere ra kotou ki te aronga e oko, ka oko ei i ta kotou uaorai.
10 E te aere atura ratou e oko ra, tae maira taua tane akaipoipo ou ra; e te aronga i vave ra, kua aere atura ratou ma ia katoa ki roto i te oroa akaipoipoanga ra; topiriia iora te pa.
11 E muri ake, kua aere maira tetai pae paretenia ra, na ko maira, E te Atu, e te Atu, ka eeu ana ia matou.
12 Kua karanga atura aia, na ko atura, Koia mou taku e karanga atu kia kotou nei, kare au i kite ia kotou.
13 E teianei, kia matakite ia kotou, kare kotou i kite i te rā, e te ora, e tae mai ei te Tamaiti a te tangata.
14 E tau oki i tetai tangata e aere ki tetai enua mamao, e kua karanga ki tona aronga tavini, e kua tuku atura i tana apinga ia ratou.
15 Tuku atura i ta tetai e rima taleni, e rua ta tetai, okotai ua ta tetai; i tei tau katoa i aua nga tangata ra; aere atura aia i tona aerenga.
16 Aere atura tei rave i nga taleni e rima ra, oko aere atura i taua nga taleni ra, rauka maira nga taleni ke e rima.
17 Mei te reira katoa tei iaia nga taleni e rua ra, rauka maira nga taleni ke e rua.
18 Kareka tei rave i te taleni okotai, aere atura ïa, e ko atura i te one, uuna atura i te moni a tona pu.
19 E roa akera, oki maira te pu o taua aronga tavini ra, akatikatika maira i te tuatua ia ratou.
20 Kua aere maira tei rave i nga taleni e rima ra, kua taoi katoa maira i nga taleni ke e rima, na ko maira, E te atu, e rima aau taleni i tuku mai kiaku, i na, teia ïa, e nga taleni ke e rima i rauka iaku.
21 Kua na ko atura tona pu kiaia, Kua tika rava, e teianei tavini meitaki e te pikikaa kore; ko koe i akono i te reira apinga mea ngiti ua, e tuku au ia koe ki rungao i te mea maata; aere koe ki roto i te rekarekaanga o toou pu.
22 Kua aere katoa maira tei rave i nga taleni e rua ra, na ko maira, E taku pu, e rua aau taleni i tuku mai kiaku, i na, teia ïa, e nga taleni ke e rua i rauka iaku nei.
23 Kua na ko atura tona pu kiaia, Kua tika rava, e teianei tavini meitaki e te pikikaa kore, kua akono meitaki koe i tenana apinga mea ngiti ua, e tuku au ia koe ki rungao i te mea maata; e aere koe ki roto i te rekarekaanga o toou pu.
24 Kua aere maira oki tei rave i te taleni okotai, na ko maira, E taku pu, kua kite takere ana au e, e tangata rotoriri koe, e kare taau i tanu ra, e kokotiia e koe, e kare taau i ruru ra, e akaputuputuia e koe:
25 Mataku akera au, uuna io nei au i te taleni naau ki raro i te one: e teianei, i akaoki mai nei au i taau uaorai.
26 Kua karanga atura tona pu kiaia, na ko atura, Tenana tavini kino nei e te akatau, kua kite koe e kare taku i tanu ra, e kokoti rai au, e kare taku i ruru, e akaputuputu rai au;
27 Eiaa koe e taoi atu i taku moni ki te okoanga ra, e kia tae mai au ra, rauka iora taku ma te oko?
28 Ka rave mai i tana taleni, e taoi atu ei na te tangata raungauru ana taleni ra.
29 E puapinga tana ra, e orongaia atu rai tana e kia maata; kare ana ra, e ravea ke ïa tana.
30 E uri atu i taua tavini puapinga kore nei ki vao i te poiri ra; tei reira te aue e te pakati anga nio.
31 E kia tae maira te Tamaiti a te tangata ma tona kakā, e te aronga angela tapu ravarai, ei reira aia e noo ei ki rungao i tona terono kakā;
32 E akaputuputuia to te pa enua ravarai ki mua i tona aroaro: e nana e akataka ia ratou, mei te tiaki mamoe e akataka i te mamoe e te puaka-nio ra:
33 E tuku aia i te mamoe ki tona rima katau, kareka te puaka-nio, ei te rima kaui ïa.
34 Ei reira te Ariki e tuatua mai ei kia ratou ki tona rima katau ra, Ka aere mai kotou, te aronga i akaoraia e taku Metua, e noo ki te basileia i akonoia no kotou mei te maani anga mairai i te enua nei:
35 I pongi ana au, e kua angai mai kotou iaku; i kaki vai ana au, e kua akainu mai kotou iaku: i tangata ke ana au, e na kotou i kite mai iaku:
36 I putaua ana au, e kua akakakau mai kotou iaku: i maki ana au, e kua utuutu mai kotou iaku: i tapekaia ana au, e kua aere ake kotou kiaku.
37 Ei reira te aronga tuatua-tika e karanga atu ei, e na ko atu ei kiaia ra, E te Atu, i naea matou i akaraʼi ia koe i te pongi anga, e kua angai? e te kaki anga vai, e kua akainu?
38 I naea matou i kite atu ei ia koe i te tangata ke anga, e kua kite atu? e te putaua anga, e kua akakakau atu?
39 I naea oki matou i akaraʼi ia koe i te maki anga, e i roto i te are tapekaanga, e kua aere atura ia koe ra?
40 Ei reira te Ariki e tuatua mai ei kia ratou, na ko maira, Koia mou taku e karanga atu kia kotou nei, Ko kotou i pera i tetai taeake mea ngiti rava o taku au taeake nei, kua pera mai ïa iaku.
41 Ei reira aia e tuatua ake ei ki tei te rima kaui, E aere ke atu kotou, e te aronga taumaaia, ki roto i te ai mate kore, tei akonoia no te diabolo e tana au angela.
42 I pongi ana au, e kare akenei kotou i o mai kai naku: i kaki vai ana au, e kare akenei kotou i akainu mai iaku:
43 I tangata ke ana au, e kare kotou i kite mai iaku: i putaua ana au, e kare kotou i akakakau mai iaku: i maki ana au, e i tapekaia ana au, e kare kotou i akono mai iaku.
44 Ei reira ratou e tuatua ake ei kiaia, e na ko ei ra e, E te Atu, i naea matou i kite atu ei ia koe i te pongi anga, e te kaki anga vai, e te tangata ke anga, e te putaua anga, e te maki anga, e i roto i te are tapekaanga, e kare i takinga-meitaki atu ia koe?
45 Ei reira aia e tuatua ake ei kia ratou, e na ko ei ra e, Koia mou taku e karanga atu kia kotou na, Kare kotou i akapera ki tei mea ngiti rava i roto ia ratou nei, kare katoa ïa i pera mai iaku.
46 Ko te ka aere ke ïa i te mate mutu kore, kareka te aronga tuatua-tika ra, ei te ora mutu kore ïa.