Mataio 18:1-35
18 I REIRA to te au pipi aere anga mai kia Iesu, e te ui anga mai kiaia, Koai te ka maata i te basileia o te ao?
2 Kua karanga aturā Iesu ki tetai tamaiti iti, e kua tuku atura iaia ki rotopu ia ratou;
3 Kua na ko atura, Koia mou taku e karanga atu kia kotou na, Kia kore kotou e akatu keia, e kia riro mei te tamariki mea riki ra, kare kotou e o ki te basileia ra ki te ao.
4 E teianei, ko te taakaaka iaia uaorai mei teianei tamaiti iti, koia te ka maata i te basileia o te ao ra.
5 E ko te kite mai i tetai tamaiti iti mei teianei, no toku nei ingoa, kua kite mai ïa iaku.
6 Kareka tei akatarevake i tetai o teianei aronga tangata rikiriki e akarongo mai iaku nei, e ngari ake aia kia riia tetai toka tavirianga ki runga i tona kaki, e kia akamaremoia ki raro i te moana.
7 E ae oki to te ao i te au mea e apaʼi ra! kare rava e kore te au mea e apaʼi; ko tei akatupu i te mea e apaʼi ra, e ae oki aia!
8 E teianei te apa ra koe i to rima e to vaevae, ka tipu atu. e akaruke ke atu; e meitaki koe kia tae pirikoki e te rima motu i te ao ra, i te rima rua e te vaevae rua kia titiriia ki roto i te ai mate kore.
9 E te apa ra koe i to mata, koiti atu, e akaruke ke atu: e meitaki koe kia tae ma te mata okotai i te ao ra, i te mata rua kia titiriia atu ki te ai i te po ra.
10 Kia matakite ko te akavavaa aea kotou i tetai o teianei aronga tangata rikiriki, te karanga atu nei au kia kotou, Ko to ratou au angela i te rangi, e tika ïa i te akara anga i te mata o taku Metua i te ao ra.
11 I aere mai nei oki te Tamaiti a te tangata e akaora i tei ngaro ra.
12 Eaa to kotou manako? kia anere te mamoe a tetai tangata, kia aere ke ra tetai, kare aina aia e vaoo i te iva ngauru e iva ara, ka aere ei ki runga i te maunga, e kimi i tei aere ke ra?
13 E kitea atura e ia, koia mou taku e karanga atu kia kotou na, e rai tona rekareka i te reira, i te au mamoe e iva ngauru e iva ara te kore i aere ke ra.
14 Koia katoa to kotou Metua i te ao ra, kare ïa i inangaro e kia mate tetai o teianei au tangata rikiriki.
15 E kia takinga-kino to taeake ia koe, e aere e akakite atu i tana apa korua anake ua; e kia akarongo mai aia ra, kua rauka ïa to taeake ia koe.
16 Kare ra aia i akarongo ia koe, arataki atu i tetai e kia toko rua ake, kia taka tikai te au tuatua katoa i te vaa o nga kite toko rua e toko toru ra.
17 E kia kore aia e akarongo ia raua, e akakite atu ki te ekalesia: e kia kore aia e akarongo i te ekalesia ra, kia riro atu aia mei te etene ra e te telona.
18 Koia mou taku e karanga atu kia kotou na, Ta kotou e akamou i raro nei, e akamou katoaia ïa i runga i te ao; e ta kotou e tuku i raro nei, e tuku katoaia ïa i te ao.
19 E karanga akaou atu au kia kotou, Kia akatau e toko rua o kotou na i raro i te enua nei i ta raua e pati, e orongaia mai ïa e taku Metua i te ao ra.
20 I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.
21 Kua aere mairā Petero kiaia ra, kua na ko maira, E te Atu, kia putuputu taku taeake i te takinga-kino anga mai kiaku, kia takiia toku akakore anga i tana ara? kia taki itu aina?
22 Kua karanga aturā Iesu kiaia, Kare au e karanga atu kia koe e, Kia taki itu ua, Kia itu ra ngauru i te taki itu anga.
23 E tau te basileia o te ao ra i tetai ariki, ko tei manako e akatau i te tuatua i tona aronga tavini.
24 E kia timata aia i te akatau, aratakiia mai tetai iaia ra, raungauru te tausani i te taleni kare i oko naia.
25 E no te mea ra, kare takiri ana apinga e oko naʼi, kua akaue atura tona pu, kia okoia aia, e tana vaine, e tana au tamariki, e tana katoa apinga, ka oko mai ei.
26 Kua tipapa iora taua tavini ra ki raro ki mua iaia, kua akateni maira, na ko maira, E taku pu, aua na koe e rapurapu iaku, e naku e akaoki atu i te oko naau, e ope rava ake.
27 Kua aroa maira te pu o taua tavini ra iaia, akakore maira i taua ou ra, tuku atura iaia.
28 Aere atura taua tavini ra ki vao, e kitea atura iaia tetai taeake tavini kai ou nana, okotai anere denari; rave atura tona rima iaia, opu atura i te kaki, karanga atura, E oko mai koe i taku ou ia koe na.
29 Kua tipapa iora taua taeake tavini nona ra ki tona pae vaevae, kua akateni maira, na ko maira, Aua na koe e rapurapu iaku, e naku e akaoki atu i te oko naau ra, e ope rava ake.
30 Kare akera i tika iaia; tiki atura iaia, kika atura ki roto i te are tapekaanga, e kia tutaki na iaia taua ou ra.
31 Kite akera te aronga taeake tavini nona ra i te reira, tangi rava atura, aere atura ki to ratou pu, akakite ua atura i taua au mea katoa ra.
32 Kua akaue atura tona pu e tiki iaia, kua na ko atura, E teianei tavini kino i, i akakore ana au i taku ou katoatoa ia koe, ko koe i aue mai kiaku;
33 E auraka koe e aroa katoa atu i te taeake tavini noou ra, mei iaku i aroa ia koe ra?
34 Riri akera tona pu iaia, e kua tuku atura iaia ki te aronga akautunga ra, e kia ope takiri tana ou i te tutaki naia e ia.
35 E akapera katoa mai taku Metua i te ao ra ia kotou katoa, kia kore kotou e akakore ma te ngakau katoa i te apa a tona taeake.