Mataio 14:1-36
14 E KITE akera te teterareka ra ko Heroda i te rongo o Iesu i reira ra,
2 Kua na ko atura i te au tavini nona ra, Ko Ioane bapetizo teia; kua tu akaou mai nei, mei te mate mai; i tikaʼi te au akairo tana i rave nei.
3 Na Heroda oki i opu ia Ioane, kua ri iaia, e kua kika atura ki roto i te are tapekaanga ra, no Herodia no te vaine a tona taeake ko Philipa.
4 I tuatua anā Ioane kiaia, Kare e tau i te ture kia akaipoipo koe iaia.
5 Kua tika oki iaia e ta takiri iaia, te mataku ra i te tangata tini, ko tei manako iaia e, e peroveta aia.
6 Kia tae ra ki te rā i anau ei a Heroda, kua ura iora te tamaine a Herodia ki mua ia ratou, rekareka rava akerā Heroda.
7 Kua karanga atura aia ma te taputou, ko tana e anoano i te pati maira, e orongaia atu e ia.
8 E no te mea i ako takereia na aia e te metua vaine, kua na ko maira, E o mai i te mimiti o Ioane bapetizo ki roto i tetai kumete.
9 Aue atura te ariki; no te taputou ra nana ra, e no te manuiri oki, kua akaue atura aia kia apaiia mai kiaia ra.
10 Akaunga atura aia i te tangata, e tipuia iora te mimiti o Ioane i roto i te are tapekaanga.
11 Apaiia maira tona mimiti i roto i te kumete, tukuia maira ki taua tamaine ra: e nana i apai ki tona metua vaine.
12 Kua tiki atura tana au pipi i te kopapa, apai atura e tanu, kua aere maira e kua akakite maira kia Iesu.
13 E kite akerā Iesu i taua tuatua ra, aere poiri atura aia ki runga i tetai pai, riro atura ki tetai ngai motutaa: e kite akera te tangata tini, kua aru atura ratou iaia na uta, no roto i te au oire.
14 E tei te tapae anga atu ā Iesu, akara atura aia i te pouou tangata maata, tangi atura aia ia ratou, akaora iora i to ratou aronga maki.
15 E aiai iora, kua aere maira tana au pipi, na ko maira kiaia, E ngai motutaa teia, e kua akaaka oki te rā; e tuku atu i te pouou tangata nei, kia aere ratou ki te au vila e oko i te kai na ratou.
16 Kua na ko aturā Iesu kia ratou, Auraka ratou e aere; na kotou e apai atu i te kai na ratou.
17 Kua na ko maira ratou kiaia, E rima ua a tatou manga i ko nei, e nga ika e rua.
18 Kua na ko atura aia, Ka apai mai i ko nei, kiaku nei.
19 Kua karanga atura ki te tangata tini kia takoto ratou ki raro ki runga i te mātā, kua rave iora i nga manga e rima ra, e nga ika e rua, nānā akera ki runga i te rangi, akameitaki atura, vavaʼi iora i te manga, apai atura ki te au pipi ra, e na ratou i tua na te tangata tini.
20 Kai anake iora ratou, e pangia rava akera: akaputuputuia iora te toenga kai, e ki akera nga tapora raungauru ma rua.
21 E rima paa tausani tane i taua aronga i kai ra, e te vaine oki ma te tamariki.
22 Kua akaue aturā Iesu i tana au pipi e aere ki runga i tetai pai i reira ra, e akatere na mua ki tetai pae, ka tuku atu ei aia i te tangata tini.
23 E oti akera taua aronga maata ra i te tukuia e ia, aere atura aia, koia anake ra, ki runga i tetai maunga e pure; e po iora aia i reira, koia anake rai.
24 Tei rotopu atura te pai i taua roto ra i reira, i te tiria angaia e te kare: te na mua maira oki te matangi.
25 E tae akera ki te a o te araanga i te po ra, aere aturā Iesu kia ratou ra, na runga i te kare i te aaere anga.
26 E kite maira te au pipi iaia i te aaere ua anga na runga i te kare, tumatetenga atura ratou, tuatua akera, E turuma teia: kua aue iora ratou i te mataku.
27 Kua karanga aturā Iesu kia ratou i reira ra, na ko atura, E akamaroiroi; ko au, auraka e mataku.
28 Kua tuatua mairā Petero kiaia, na ko maira, E te Atu, ko koe tika ra, e tuatua mai koe kiaku kia aere atu ia koe na na runga katoa i te kare.
29 Kua karanga atura aia, Ka aere mai. Kua eke mairā Petero ki raro, akaruke maira i te pai, aere ua atura kia Iesu na runga i te kare:
30 Kia kite ra aia i te viviki anga o te matangi, mataku akera; e te maremoia ra, kapiki atura, na ko atura, E te Atu, kia ora au.
31 Kua akatika mairā Iesu i tona rima i reira ra, opu maira iaia, na ko maira kiaia, E koe, te akarongo mea ngiti nei, eaa koe i mataku ei?
32 E tae maira raua ki runga i te pai ra, aki takiri akera te matangi.
33 Kua aere maira i reira to te pai, tipapa maira ki raro ki mua i tona aroaro, na ko maira, Ko te Tamaiti tikai koe a te Atua.
34 E tae atura ratou ki tetai pae, tapae atura ratou ki te enua ra, ki Genesareta.
35 E kite akera to reira iaia, kua tono aere i te tangata e pini rava akera te reira enua, e kua apai maira te aronga maki ravarai kiaia:
36 Ko tei pati mai iaia, kia akatukia ua atu ratou i tona tapa kakau; e tei akatukia ra, kua ora takiri rava ïa.