Maseli 15:1-33
15 KO te tuatua maru ra tei akaanga ke i te riri: kareka te tuatua akakoko ra, ko te riri ïa te tupu.
2 E riro te kite ra ei mea apinga i te vaa o te tangata pakari ra: kareka te vaa o te neneva ra, te akapuroro ua ra ïa i te tuatua neneva.
3 Tei te au ngai katoa nei to Iehova mata, i te akara anga i te kino e te meitaki.
4 Ko te arero tuatua meitaki ra, e rakau ora ïa: kareka te arero tuatua kino ra, e mea mamae ïa no te vaerua.
5 E akavaavaa te neneva i te apii a tona metua tane: ko tei akono i te ako ra, e pakari tona.
6 E apinga maata tei te are o te tangata tuatua-tika ra: e manamanata ra tei te apinga a te tangata kino.
7 Te akapueurikiriki nei te vaa o te aronga pakari i te kite: kare ra i pera te ngakau o te neneva ra.
8 Te atinga a te aronga kino ra, e mea rikarika ïa na Iehova: ko te pure ra a te aronga tiratiratu ra, e mea tau ïa nana.
9 Te rikarika rā Iehova i te aerenga o te tangata kino: ko tei aru ra i te tuatua-tika ra, te akaperepere ra aia iaia.
10 Te tangata e akaruke i te mataara ra, e pāpāanga manganui tona: ko tei riri i te ako ra, e mate rava ïa.
11 Te vai ua ra ade e te mate ki mua i te aroaro o Iehova: ka tanga atu ei te ngakau o te tamariki a te tangata nei.
12 Kare te akavaavaa e mareka mai ki tei ako mai iaia ra: kare oki aia e aere ki o te aronga pakari.
13 Tei te rekareka o te ngakau e mareka ei te mata kia aue ra te ngakau ra e kinokino ei te vaerua.
14 Te kimi ra te ngakau o te tangata kite ra i te kite: ko te vaa o te neneva ra, te kai ra ïa i te tuatua neneva.
15 E rā kino anake to te tangata tumatetenga ra: kareka tei mataora te ngakau ra, e pokai tamou ïa tana.
16 Iti ua rai taau ma te mataku rai ia Iehova ra; e meitaki ïa i te apinga maata roa ma te pekapeka.
17 Meitaki ïa kai anga i te kai kinaki kore anake ra ma te aroa, i te puakatoro matu ma te riri.
18 Te tangata rotoriri ra, e akatupu ïa i te karo: ko tei kore ra e rapurapu i te riri ra, e au ïa karo iaia.
19 Te mataara o te tangata akatau ra, mei te koro rakau taratara ra ïa: ko te mataara ra o te aronga tiratiratu ra, mei te arataa metua ra ïa.
20 E rekareka te metua tane i te tamaiti pakari ra: ko te tangata neneva ra, e akavaavaa ïa i te metua vaine.
21 E mea rekareka te tuatua neneva i te tangata pakari kore ra: kareka te tangata kite ra, ka tiratiratu tona ra aerenga.
22 Kare e uruoaanga tuatua ra, kare tei akakoroia e tupu: kia maata ra te aronga kimi tuatua kua mou ïa.
23 E rekareka te tangata i te tuatua a tona vaa: te tuatua ra i tuatuaia i te tuatau e tau ei, e meitaki roa ïa.
24 Tei runga te mataara ora i te tangata pakari ra, kia akaruke aia ia ade i raro ra.
25 Te are o te aronga parau ra, e akangaangaaia ïa e Iehova: e akamou ra aia i te kotinga kainga o te vaine takaua ra.
26 Te rikarika rā Iehova i te manako o te tangata kino: e mea tau ra nana te tuatua a te aronga viivii kore.
27 Ko tei morimori ua i te apinga ra, kua akapekapeka ïa i tona ngutuare: ko tei makitakita ra i te tuataki ra, ka ora ïa.
28 Te kimi ra te ngakau o te aronga tuatua-tika ra i tana e tuatua atu kareka te vaa o te aronga kino, kua riringi ua mai i te tuatua kino.
29 Tei te mamao ke a Iehova i te aronga kino: e akarongo maira aia i te pure a te aronga tuatua-tika.
30 Te rekareka nei te ngakau me mārama te mata: e matuia te ivi i te rongo meitaki ra.
31 Te taringa e akarongo i te ako ora ra, e tika ïa i te noo anga i roto i te aronga pakari ra.
32 Ko tei akaruke i te apii ra, kua akavaavaa ïa i tona uaorai vaerua: ko tei akarongo ra i te ako ra, te rauka ra ïa te kite.
33 Ko te mataku ia Iehova ta te pakari i apii mai; e kia na mua te akaaka e raukaʼi te ngateitei.