Mareko 11:1-33
11 E VAITATA maira Ierusalema ia ratou, tae atura i Betephage e Betania, i te maunga ra i Oliveta, kua tono atura aia i e toko rua puke pipi ana.
2 Kua na ko atura kia raua, Ka aere na korua ki tera ra vila; e kia tomo atu korua ki roto, e kite korua i tetai punua asini, kua erekia, kare oki i nooia e te tangata; ka tatara ake, e taki mai.
3 E kia tuatua mai tetai tangata kia korua, Eaa korua i rave ei? e na ko atu korua, E tau teia i te Atu; e nana e tuku mai i reira ra.
4 Aere atura raua, e kite atura i taua punua ra, te erekia ra i te pae ngutupa ki vao ra, i te ngai e tutaki ei nga mataara e rua katoa, kua tatara iora.
5 Kua na ko maira tetai pae o te aronga i tu ua i reira, Eaa korua i tataraʼi i tenana punua?
6 Kua karanga atura raua kia ratou i ta Iesu i akaue maira: tuku maira ratou ia raua kia rave ua na.
7 Kua taki maira raua i taua punua ra kia Iesu, kua tuku atura i to raua kakau ki rungao; noo iora aia ki rungao.
8 E manganui oki tei toatoa i to ratou kakau i te arataa; tipu atura oki tetai pae i te rara rakau, ārikiriki atura i te ara.
9 Kua kapiki ua maira te aronga i aere na mua ra, e tei aru mai na muri, na ko maira, Hosana; Kia ora aia, ko tei aere mai ma te ingoa o Iehova:
10 Kia meitaki te basileia o to tatou metua ra o Davida, ko tei tae mai ma te ingoa o Iehova: Hosana i te rangi teitei ra.
11 Kua tomo aturā Iesu ki roto i Ierusalema, e ki roto oki i te iero; e kia ope te au mea ravarai e pini ua ake i te akaraia e ia, no te mea kua aiai, aere ke atura aia ki Betania, koia ma te tino ngauru ma rua ra.
12 E ao akera, te oki maira ratou mei Betania maira, pongi iora aia:
13 Akara atura aia i tetai suke i te atea ke, te rauia ra, aere atura aia e akara i te kai ki rungao; e vaitata atura aia, kare e kai i kitea o runga, ko te rau anake ra; kare oki i tae ki te tuatau suke ra.
14 Kua karanga aturā Iesu i taua suke ra, na ko atura, Auraka e tangata e kai akaou atu i te kai no rungao ia koe na e tuatau ua atu. Te akarongo atura oki tana au pipi.
15 E tae maira ratou ki Ierusalema: tomo aturā Iesu ki roto i te iero ra, kua tuaru atura ki vao te aronga i oko atura e oko maira i roto i te iero ra, tatipoki atura i te au papa a te aronga oko moni ra, e te au nooanga o te aronga i oki i te kukupa ra;
16 E kare rava i tuku i te tangata, kia apai i te kapu āriki apinga na roto i te iero ra.
17 Kua apii atura aia ia ratou, na ko atura, Kare aina kua tataia e “Toku nei are, e karangaia ïa e are pure no te pa enua ravarai?” kua akariroia io nei ra e kotou “e ana no te aronga keia ra.”
18 E kite akera te au tata tuatua e te kau taunga nunui ra, kua kimi iora i ta ratou ravenga e ta iaia: te mataku ra ratou iaia, no te mea te va anake ua ra te tangata tini ravarai i tana tuatua.
19 E aiai iora, aere atura aia ki vao i taua oire ra.
20 E popongi akera, kia oki ratou ra, akara atura ratou i taua suke ra, kua mae rava atura ma te tumu katoa.
21 Kua maara akerā Petero, kua na ko atura kiaia, E te Orometua, i na, te suke taau i akakino ra, kua mae rava.
22 Kua tuatua mairā Iesu, na ko maira kia ratou, Ei akarongo to kotou i te Atua.
23 Koia mou oki taku e karanga atu kia kotou nei, Ko te tangata e karanga ua atu i teianei maunga, Kia kiritiia koe, e kia titiriia ki raro i te tai; ma te ekoko kore i tona ngakau, e te manako tika ra e, ko tana e tuatua ra, e tupu ïa; e rauka iaia tana e tuatua ra.
24 E teianei e akakite atu au kia kotou e, Te au mea katoatoa ta kotou e pati kia pure ra, kia manako e, e rauka taua au mea ra, kare ïa e kore i te rauka mai.
25 E kia pure kotou, e e ara ta kotou ia etai ke ra, ka akakore i taua ara ra: kia akakore katoaia ta kotou ara e to kotou Metua i te ao ra.
26 Kia kore ra kotou e akakore i te ara, kare katoa to kotou Metua i te ao ra, e akakore mai i ta kotou ara.
27 E tae akaou atura ratou ki Ierusalema: e te aaere ua ra aia i roto i te iero ra, kua aere maira te kau taunga nunui ra, e te au tata tuatua, e te aronga pakari,
28 Kua na ko maira kiaia, Koai te tumu i rave ei koe i teianei au mea? e naai i oronga mai i te mana ia koe ei rave i taua au mea nei?
29 Kua karanga aturā Iesu, na ko atura kia ratou, E ui katoa anga taku ia kotou e, kia akakite mai kotou kiaku, ka akakite katoa atu au kia kotou i te tumu i rave ei au i taua au mea nei.
30 I te bapetizo a Ioane nei, no te rangi mai aina? e na te tangata aina? Ka akakite mai.
31 Kua eumiumi iora ratou ratou uaorai, na ko akera, Kia tuatua tatou, No te rangi mai; e riro aia i te tuatua mai e, Eaa iora kotou i kore ei i akarongo atu iaia?
32 Kia tuatua oki tatou, Na te tangata; kua mataku oki tatou i te tangata; kua kite katoatoa oki ratou e, e peroveta tikai a Ioane.
33 Kua tuatua maira ratou kia Iesu, na ko maira, Kare matou i kite. Kua karanga aturā Iesu kia ratou, na ko atura, Kare katoa au e akakite atu ia kotou i te tumu i rave ei au i taua au mea nei.