Luka 22:1-71
22 E TE vaitata maira te oroa i te kai akaopue koreia ra, ko tei tuatuaia ra e, e pasa.
2 Te kimi ra te kau taunga nunui e te au tata tuatua ra i te ravenga e mate ei aia ia ratou; te mataku ra oki ratou i te tangata.
3 Kua uru iorā Satani ki roto ia Iuda, ko tei karangaia ra ko Ikariota, no te tino ngauru ma rua katoa ra oki aia.
4 Aere atura aia, akatau atura i tana tuatua ki te kau taunga nunui ra, e te au rangatira, i te tuku anga atu aia iaia kia ratou.
5 Mareka rava akera oki ratou, e kua akatau iora ratou i te moni e tuku mai nana.
6 Kua akatika atura aia, e kimi iora aia i te ngai meitaki, kia kore te tangata, ka tuku atu ei aia iaia kia ratou.
7 E tae akera te rā akaopue koreia e ko ei i te pasa ra,
8 Kua tono atura aia ia Petero raua ko Ioane, na ko atura, Ka aere, ka akonokono i te pasa, kia kai tatou.
9 Kua ui maira raua kiaia, Eiea maua akonokono ei?
10 Kua karanga atura aia kia raua, I na, kua o anake korua ki roto i te oire ra, e aravei mai tetai tangata ia korua, te apai ra i te āriki vai; e aru atu korua iaia ki roto i te are tana e tomo ra.
11 Ka karanga atu ei korua ki te pu o te are, Te ui maira te Orometua kia koe, Teiea to te manuiri pia, kia kai au i te pasa e taku au pipi katoa?
12 E nana e akakite mai kia korua i tetai pia maata tei runga, kua manea: ei reira akonokono ei.
13 Aere atura raua, e rokoia atu, koia tika atura tana i karanga atu kia raua ra: e kua akonokono iora raua i te pasa.
14 E tae akera ki te ora mou ra, noo atura aia e te au aposetolo katoa, tino ngauru ma rua.
15 Kua karanga atura aia kia ratou, E anoano maata toku i te kai i teianei pasa, ko au e ko kotou katoa, ka mate atu ei au.
16 E akakite atu oki au kia kotou nei, Kare rava au e kai akaou atu i tetai pasa, kia tupu ua atu i te basileia o te Atua ra.
17 Kua rave iora aia i te kapu, e akameitaki atura, e na ko atura, Ka rave mai i teia, ka tua na kotou:
18 E karanga atu oki au kia kotou, Kare au e inu akaou i to te ua vine, e kia tae ua atu ki te basileia o te Atua ra.
19 Kua rave iora aia i te manga, akameitaki atura, vavaʼi iora, tuku atura kia ratou, na ko atura, Toku kopapa teia, e orongaia no kotou; e akapera kotou ei manako anga iaku.
20 E kua pera katoa iora i te kapu, kia oti ake te kai anga, na ko atura, Teianei kapu, ko te koreromotu ïa i toku nei toto, e akamaringiia no kotou nei.
21 I na oki, tei runga katoa te rima o te tangata e pikikaa iaku i teianei kaingakai.
22 Te aere nei rai oki te Tamaiti a te tangata i tei akonoia ra, ko te tangata ra, e pikikaa mai iaia ra, e ae oki aia!
23 Kua ui ua iora ratou ratou uaorai, koai i to ratou e akapera.
24 E tauetono anga oki tei tupu i roto ia ratou i to ratou e ka maata.
25 Kua karanga atura aia kia ratou, Te akateitei nei te ui ariki o te etene i rungao ia ratou; e taua aronga i akavi ia ratou ra, te tapaia nei ïa i te takinga-meitaki.
26 Kareka kotou na, kare ïa e tika kia pera: ko tei maata i roto ia kotou na, kia arite katoa ïa i tei iti; e tei mana ra, kia arite katoa ïa i te tavini.
27 Teiea oki tei maata, ko tei noo i te kaingakai ainei, e ko tei raverave ainei? kare ainei ko tei noo i te kaingakai? E tau ra au mei te tavini ra i roto ia kotou nei.
28 Ko kotou ko te aronga e noo tamou i vaitata iaku i toku au timataanga nei:
29 Mei toku metua i akono i tetai basileia noku ra, kua akono katoa au ia kotou;
30 Kia kai katoa kotou e kia inu oki i taku kaingakai i toku basileia ra, e kia noo ki rungao i te au terono i te akava anga i nga kopu tino ngauru ma rua o Iseraela ra.
31 Kua karanga atura oki te Atu, E Simona, e Simona, i na, i pati anā Satani ia kotou, e ruru mei te sitona e ruruia ra:
32 I pure ana ra au ia koe, kia kore e ope toou akarongo: e kia akaariuia mai koe ra, ka akatinamou atu i to au taeake.
33 Kua tuatua maira aia kiaia, E te Atu, kua tika iaku i te aru atu ia koe, e kia tapeka katoaia taua e mamate katoa atu.
34 Kua karanga atura aia, E akakite atu au kia koe, e Petero, kare te moa e kakaoa akonei, ka toru atura oou uuna anga e, kare koe e kite mai iaku.
35 Kua karanga atura aia kia ratou, Iaku i tono ia kotou ma te moni kore ra, e te pute kore ra, e kare oki e tamaka apai ua, i ngere ainei kotou i tetai mea ngiti? Kua tuatua maira ratou, Kare rava.
36 Kua karanga atura aia kia ratou, I teianei ra, e āriki moni tana ra, e apai ïa, e tana katoa oki pute; e kare ona e koke ra, e oko atu aia i tona kakau i te koke.
37 E akakite atu oki au kia kotou, i te manga tuatua i tataia ra e, “Kua kapiti katoaia aia ki te aronga rave ara ra,” e tupu ïa iaku nei; e te au tuatua noku ra, e ope ïa i te tupu.
38 Kua tuatua maira ratou, E te Atu, i na, e rua eianei puke koke. Kua na ko atura aia kia ratou, Oti ra ua.
39 Tomo atura aia ki vao, aere atura ki te maunga ra ki Oliveta, i tana i mātau ra; e kua aru atura te au pipi iaia.
40 E tae atura aia ki reira, kua karanga atura aia kia ratou, Ka pure, kia kore kotou e rokoia e te timataanga.
41 E taka iti ke atura aia ia ratou mei te ngai e taea e te toka tiora ra te roa; tuku iora i te turi ki raro, e pure iora aia,
42 Na ko atura, E taku Metua, kia tika ia koe ra, e apai ke atu koe i teianei kapu: kia tupu ra toou anoano, auraka toku.
43 Kua mama maira tetai angela no te rangi mai kiaia, kua akamaroiroi maira iaia.
44 E no te mea te maata ua ra tona mamae aue, viviki rava atura tana pure: e mei te toto kurukuruatu ra tona ou i te topa anga ki raro i te one.
45 E tu maira aia ki runga i taua pure anga ra, e tae maira ki te au pipi ra, rokoia mai te moe anake ra i te aue.
46 Kua karanga atura aia kia ratou, Eaa kotou i moe ei? ka tu ki runga, ka pure, ka rokoia aea kotou e te timataanga.
47 E kare i mutu tana tuatua, i na, tetai urupu maata, e tetai no te tino ngauru ma rua ra, ko tei tuatuaia ia Iuda ra, i te aere anga mai na mua ia ratou, e aere ua maira aia i vaitatao ia Iesu, e ongi iaia.
48 Kua karanga aturā Iesu kiaia, E Iuda, e pikikaa mai koe i te Tamaiti a te tangata nei i te ongi?
49 Te kite ra to vaitatao iaia, i te openga o taua mea ra, e kua ui maira kiaia, E te Atu, e tapotu aina matou ki te koke?
50 Kua tapotu atura tetai o ratou i te tavini o te taunga maata ra, e motu ke atura tona taringa katau.
51 Kua karanga aturā Iesu, na ko atura, Oti ra ua. Kua akatukia ua atura aia i tona taringa, ora atura.
52 Kua karanga aturā Iesu ki te kau taunga nunui ra, e te au rangatira o te iero ra, e te aronga pakari, tei aere mai kiaia ra, I aere mai nei kotou ma te koke e te rakau, mei te mea e, e keia?
53 Ia tatou oki i noo ua i roto i te iero i te au rā katoa ra, kare oki kotou i opu ua mai iaku i reira: ko to kotou ra teianei ora, e te mana anga o to te poiri.
54 Kua opu maira ratou iaia, e arataki atura ki te are o te taunga maata ra. E kua aru aturā Petero i muri roa.
55 E ka akera te ai ia ratou i roto i te koro, e noo anake iora ratou ki raro, noo aturā Petero i roto ia ratou.
56 Kite maira ra tetai tavini vaine iaia i te noo anga i te pae ai ra, e tiroi matariki maira iaia, kua na ko akera, Iaia katoa ra oki teianei tangata.
57 Kua uuna iora ra aia iaia, na ko atura, E maine, kare au i kite iaia.
58 E roa poto akera, kua akara maira tetai iaia, na ko maira, No ratou katoa koe na. Kua tuatua mairā Petero, E tama, kare au.
59 E okotai akera ora i topa, kua manono maira tetai, na ko maira, Nona tikai teianei tangata: no Galilea oki aia.
60 Kua karanga aturā Petero, E tama, kare au i kite i taau i tuatua maira. E tei te tuatua anga atu aia i taua tuatua ra, kakaoa iora te moa.
61 Kua ariu maira te Atu, kua akara maira kia Petero. Kua maara akerā Petero i te tuatua a te Atu tana i tuatua mai kiaia ra e, Kare e kakaoa te moa, ka toru atura oou uuna anga iaku.
62 Aere aturā Petero ki vao, maata ua atura te aue.
63 E te au tangata i tāpu ia Iesu ra, taitoito maira ïa, e tapotu maira iaia.
64 E oti akera tona mata i te tapokiia e ratou, kua moto maira ratou i tona mata, e kua ui maira, na ko maira, E akakite mai ana i tei moto ia koe na.
65 E manganui rai ta ratou tuatua akakino i tuatua mai kiaia.
66 E tei te ao anga ra, kua putuputu maira te aronga pakari e te kau taunga nunui, e te au tata tuatua, kua arataki maira iaia ki roto i taua uruoaanga ra na ratou, na ko atura,
67 Ko te Mesia ainei koe? ka akakite mai kia matou. Kua na ko atura aia, Akakite ua atu rai au kia kotou, kare rai kotou e akarongo:
68 E kia ui katoa atu au kia kotou, kare ïa kotou e tuatua mai, kare oki au e tukua.
69 Teia ra ka noo taua Tamaiti a te tangata nei i te rima katau o te mana ra o te Atua.
70 Kua na ko tai maira ratou, Ko te Tamaiti mari koe a te Atua? Kua na ko atura aia, Ko ta kotou i tuatua mai na, ko au tikai oki teia.
71 Kua na ko iora ratou, Eaa atu rai to tatou kite? tei kite ua akenei tatou i roto i tona uaorai vaa.