Levitiku 8:1-36
8 KUA tuatua mairā Iehova kia Mose, na ko maira,
2 Ka rave ia Aarona, e tana katoa ra au tamariki, e te au kakau ra, e te manongi akatainu ra, e te puakatoro no te tarangaara, e nga mamoe toa e rua, e te kete areto akaopue koreia ra;
3 Ka akaputuputu ei i te uipaanga katoa ki te ngutupa o te Are uipaanga ra.
4 Kua akapera oki a Mose i ta Iehova i akaue mai kiaia ra; e kua putuputu maira te uipaanga i te ngutupa o te Are uipaanga ra.
5 Kua karanga aturā Mose ki taua uipaanga ra, Teia te mea ta Iehova i akaue mai e rave.
6 Kua arataki mairā Mose ia Aarona e tana au tamariki, e kua orei ia ratou ki te vai.
7 E kua tuku atura aia i te piriaro ki runga iaia, e kua tatua atura iaia ki te tatua, e kua akakakau atura iaia ki te pona roroa, e kua tuku akera i te tiputa ki rungao, topiri atura i te reira ki te tatua manea o te tiputa, tākai iora ki reira.
8 E kua tuku atura i te tapoki-umauma ki runga iaia: e kua tuku atura i te Urima, e te Tumima i te tapoki-umauma.
9 Kua tuku atura aia i te pare ki runga i tona mimiti; e kua tuku atura i te tarae auro ra, i te pae ki mua i te korona tapu ki runga i taua pare ra, i ta Iehova i akaue mai kia Mose ra.
10 Kua rave iorā Mose i te manongi akatainu ra, kua akatainu iora i te puakapa, e te au mea katoa i roto ra, e tapu atura ïa.
11 E kua pîpî atura aia i te atarau i taua manongi ra, e ka itu akera pîpî anga, e kua akatainu atura i taua atarau ra, e te au mea katoa no te reira, e te āriki rai e tona vaevae, ei akatapu anga atu.
12 Kua riringi atura aia i taua manongi akatainu ra ki rungao i te mimiti o Aarona, akatainu atura iaia, kia tapu aia.
13 E kua arataki mairā Mose i nga tamariki a Aarona, e kua akakakau atura ia ratou ki te piriaro, e kua tatua atura ki te tatua, e kua tuku atura i te pare ki runga ia ratou; i ta Iehova i akaue mai kia Mose ra.
14 Kua taki maira aia i reira i te puakatoro ei tarangaara: e kua tuku iorā Aarona, e tana au tamariki, i to ratou rima ki runga i te mimiti o taua puakatoro tarangaara ra.
15 E ta atura aia i te reira; kua rave iorā Mose i te toto, e kua tuku akera ki rungao i te au tara o taua atarau ra i tona maikao-rima e pini ua ake, mā atura taua atarau ra, e kua riringi iora aia i te toto i te tumu o taua atarau ra, tapu atura te reira, ei apai anga i te tapokiangaara ki rungao.
16 Kua rave iora aia i te tongaua katoa no runga i te au mea i roto ra, e te ekaeka i te ate ra, e nga pukuatu ra, e to reira oki tongaua, e kua taʼu aturā Mose i te reira ki rungao i te atarau ra.
17 Kareka te puakatoro ra, e te kiri, e te kiko, e te repo ra, i taʼuia ïa ki te ai ki vao mai i te puakapa ra, i ta Iehova i akaue mai kia Mose ra.
18 Kua taki maira aia i te mamoe toa no te atinga karakaratio: e kua tuku iorā Aarona, e tana au tamariki, i to ratou rima ki runga i te mimiti o taua mamoe toa ra.
19 E ta atura aia i te reira; e kua pîpî aturā Mose i te toto ki rungao i te atarau e pini ua ake:
20 E kotikotiia iora taua mamoe toa ra; e kua taʼu iorā Mose i te mimiti, e taua au kotinga ra, e te tongaua.
21 E oreiia iora te ngakau e nga vaevae ra ki te vai, e kua taʼu aturā Mose i taua mamoe toa katoa ra ki rungao i te atarau: ei atinga karakaratio, ei mea aunga kakara, ei atinga ai oki na Iehova; i ta Iehova i akaue mai kia Mose ra.
22 Kua taki maira aia i tetai mamoe toa, i te mamoe toa akataoonga ra; e kua tuku iorā Aarona, e tana au tamariki, i to ratou rima ki runga i te mimiti o taua mamoe toa ra.
23 E oti akera i te taia, kua rave iorā Mose i tetai manga o te toto, e kua tuku atura ki runga i te tapa o te taringa katau o Aarona, ki runga katoa i te maikao maata o tona rima katau, e ki runga i te maikao maata o tona vaevae katau ra.
24 E kua arataki mai i nga tamariki a Aarona i vaitata, kua tuku aturā Mose i tetai manga toto ki rungao i to ratou au taringa katau, ki runga katoa i te maikao maata o to ratou au rima katau, e ki runga i te maikao maata o to ratou au vaevae katau ra; e kua pîpî aturā Mose i te toto ki rungao i te atarau e pini ua ake.
25 Kua rave iora aia i te matu, e te iku ra, e te tongaua katoa ki rungao i te au mea i roto ra, e te ekaeka i te ate ra, e nga pukuatu, e to reira tongaua, e te ūā mua katau ra:
26 Kua rave iora aia i tetai areto akaopue koreia ra, e tetai areto tainuia, e tetai uefa, i roto i te kete areto akaopue koreia i mua i te aroaro o Iehova ra, kua tuku iora ki rungao i te tongaua, e ki rungao i te ūā mua katau ra:
27 Kua tuku katoa atura i te reira ki roto i te rima o Aarona, e ki roto i te rima o tana au tamariki, kia ruru ratou i te reira ei atinga ruru ki mua i te aroaro o Iehova.
28 Kua rave akerā Mose i taua au mea ra i roto i to ratou rima, e kua taʼu atura, e te atinga karakaratio katoa ra, ki rungao i te atarau: e au mea akataoonga oki te reira, ei mea aunga kakara: ei atinga ai oki na Iehova.
29 Kareka te uma ra, na Mose ïa i rave, e kua ruru ei atinga ruru ki mua i te aroaro o Iehova; ko ta Mose ïa tuanga te reira i taua mamoe toa akataoonga ra: i ta Iehova i akaue mai kia Mose ra.
30 Kua rave iorā Mose i te manongi tainu ra, e te toto i runga i te atarau ra, kua pîpî atura ki runga ia Aarona, e ki runga i tona au kakau, e ki runga i tana au tamariki, e ki runga katoa i te au kakau o tana au tamariki ra; e tapu aturā Aarona, e tona au kakau, e tana au tamariki, e te au kakau o tana katoa ra au tamariki.
31 Kua karanga aturā Mose kia Aarona e te au tamariki nana ra, Ka tunu i te kiko i te ngutupa o te Are uipaanga ra; e ei reira kai ei e te areto ra i roto i te kete kai akataoonga ra, i taku i akaue ra, ka na ko ei ra e, Na Aarona e tana au tamariki e kai.
32 E te toenga o taua kiko ra e te areto, e taʼu kotou i te reira ki te ai.
33 E auraka roa kotou e akaruke i te ngutupa o te Are uipaanga e kia itu ua atu te rā, kia ope oki te au rā akataoonga anga ia kotou: kia po itu oki kotou i te akataoonga anga.
34 Mei tei raveia i teianei rā, ko ta Iehova ïa i akaue mai e rave rai, ei tapokiangaara na kotou.
35 E tikaʼi ia kotou kia noo i te ngutupa o te Are uipaanga i te po e te ao, e kia po itu, ei akono marie anga i te ikuiku a Iehova, kia kore oki kotou e mate, ko tei akaueia mai oki ïa kiaku nei.
36 Kua rave iora oki a Aarona e tana au tamariki i te au mea katoa ta Iehova i akaue mai ia Mose.