Koheleta 9:1-18
9 KUA tavaitai marie au i toku ngakau ki taua au mea katoa nei, e taua au mea katoa nei tei kimi tikaia ïa e au ra. Kite akera au e, te aronga tuatua-tika e te aronga pakari, e ta ratou katoa ra au angaanga, tei te rima ïa o te Atua; kare ra e tangata e kite i te inangaro e te inangaro kore, i te au mea katoa ki mua ia ratou ra.
2 Okotai rai aite to te tangata katoa nei kia rokoia mai; okotai rai tu rave i te tangata tuatua-tika e te tangata kino; i te tangata meitaki, i te tangata i mā, e te tangata viivii; i te tangata atinga, e te tangata atinga kore: ta te tangata meitaki kia rokoia mai, koia katoa ta te rave ara: ta te tangata e tao ra, e te tangata e mataku kia tao ra.
3 Teia te kino i te au mea katoa i raveia i raro ake i te rā nei, i te mea okotai rai aite to te tangata katoa ra kia rokoia mai: te ki nei oki to te tamariki a te tangata nei ngakau i te kino, te vai ra oki te tuatua neneva ki roto i to ratou ngakau i te ora anga nei, e oti akera, aere atura ratou ki te aronga i mate ra.
4 Te kapiti ra aia i roto i te aronga katoa i ora ra, e manakonako anga tona; e ngari ake to te puaka-aoa kia ora ra i to te liona kia mate.
5 Kua kite oki te aronga e ora nei e ka mate ratou: kare ra a te aronga i mate ra e tuatua i kitea: kare oki a ratou tutaki toe i te enua nei; kua akangaropoinaia oki ratou.
6 To ratou aroa, e to ratou riri, e to ratou vareae, kua kore anake ïa; kare oki a ratou e tuanga e tuatau ua atu i te au mea katoa i raveia i raro ake i te rā nei.
7 Ka aere i toou aerenga, ka kai i taau kai ma te rekareka; ka inu ei i taau wina ma te pereperekavana o te ngakau; kua ārikiia oki taau angaanga e te Atua i tenana.
8 Kia vai teatea ua mairai toou kakau; e auraka to upoko e ngere i te manongi ra.
9 E noo ki to vaine ra ma te rekareka, e inangaro koe iaia e kia ope roa te au rā o toou na ora anga puapinga kore, toou na oki au rā puapinga kore ta te Atua i oronga mai noou i raro ake i te rā nei: ko taau ïa tuanga i te ora anga nei, e i taau ra au angaanga, i raveia e koe i raro ake i te rā nei.
10 Ko tei kitea e koe ta to rima e rave ra, ka rave ma to ririnui ra; kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.
11 E manganui oki toku kite anga i te ao nei e, kare tei te vaevae viviki te emo e emo ei, e kare tei te maroiroi e riro ei te re, e kare tei te aronga pakari te kai, e kare tei te aronga kite meitaki te apinga, e kare tei te karape te kiteia mai; e tuatau ra, e te manuia ua, to te tangata katoa ra.
12 Kare rava e tangata i kite i tona ra tuatau: mei te ika i rauka ki roto i te kupenga kino ra, e te manu kia rauka i te ereere ra, ko to te tamariki a te tangata ïa mou anga i te ereere i te tuatau kino ra, me rokoia putia uaia mai ratou.
13 Teia ra taku tuatua pakari i kite i raro ake i te rā nei, e mea maata oki i toku manako anga:
14 Te vai ra tetai oire iti, e te tangata ki roto kare e tokorai; kua aere maira tetai ariki maata e rave, e kua patu iora aia i te patu maata ei rave anga:
15 Te noo ra tetai tangata pakari, e ao ra, ki roto; e ora iora taua oire ra i te pakari nona: kare ra e tangata i manako mai i taua tangata ao ra.
16 Kua karanga iora au e, E meitaki to te pakari i to te ririnui; ko te pakari ra o te ao ra, e akavaavaaia ïa, e kare e akono tikaia tana tuatua.
17 E akono marieia te tuatua maru a te aronga pakari ra, i te vaavaa nunui ua a te tutara neneva ra.
18 E mea meitaki te pakari i te taoonga tamaki: okotai ra tangata rave ara ra, e meitaki maata tei kore iaia.