Koheleta 3:1-22
3 E ATIANGA to te au mea katoa nei, e e tuatau to te au akakoroanga katoa i raro ake i te rangi nei:
2 E tuatau to te anau, e e tuatau to te mate; e tuatau to te tanu, e e tuatau to te kiriti i tei tanumia ra;
3 E tuatau to te ta, e e tuatau to te akaora; e tuatau to te vavaʼi ki raro, e e tuatau to te patu ki runga ra;
4 E tuatau to te aue, e e tuatau to te kata; e tuatau to te mii, e e tuatau to te ura;
5 E tuatau to te akaruke i te toka, e e tuatau to te akaputuputu i te toka; e tuatau to te takave, e e tuatau to te takave kore;
6 E tuatau to te rauka anga, e tuatau to te riro anga; e tuatau to te tāpu, e e tuatau to te akaruke;
7 E tuatau to te aae, e e tuatau to te pananaki; e tuatau to te muteki ua, e e tuatau to te tuatua;
8 E tuatau to te aroa, e e tuatau to te riri; e tuatau to te tamaki, e e tuatau to te akamoeau.
9 Eaa ta te rave angaanga puapinga i rauka i tana angaanga?
10 Kua kite au i te angaanga i akonoia e te Atua na te tamariki a te tangata nei, kia tauta rai ratou i te reira.
11 Kua akamanea aia i te au mea katoa i te tuatau tikai ra, e kua tuku aia i te manako i to teianei ao ki roto i to ratou ngakau; i kore ei te tangata i kite i te angaanga a te Atua, mei te akamataanga mai e tae ua atu ki te openga.
12 Kite akera au e, kare atu e meitaki i taua au mea ra, mari ra kia rekareka te tangata e kia takinga-meitaki i te ora anga nei.
13 Kareka ra kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.
14 Te kite nei oki au e, ko ta te Atua e rave ra, ka tu ïa e rimua; kare e tika tetai mea ngiti kia topiri katoa atu, e kare katoa e tika tetai mea ngiti kia rave mai: kua pera oki te Atua kia mataku te tangata iaia.
15 Te mea i tupu i muatangana ra, kua tupu ïa i teianei; e te tupu a muri atu, kua tupu takere ana ïa; te akaoki maira oki te Atua i tei tupu takere ana.
16 Kua akara rai oki au i raro ake i te rā nei i te ngai akavaanga, e te vai ra te tuatua kino i reira; e te ngai tuatua-tika ra, e tei reira te tuatua kino i te vairanga.
17 Kua na ko iora au ki roto i toku ngakau, E riro te Atua i te akava mai i te aronga tuatua-tika e te aronga kino katoa ra: no te mea e tuatau to te au mea katoa i akakoroia ra, e to te au angaanga katoa ra.
18 Kua na ko iora au ki roto i toku ngakau i te tu o te tamariki a te tangata nei, te timata nei te Atua ia ratou, kia kite ratou e kua tau ratou uaorai nei ki te puaka.
19 Okotai rai tu openga to te tamariki a te tangata nei e to te puaka katoa ra; okotai o ratou rokoia angaia mai: te mate nei tetai, e te pera katoa nei tetai i te mate; okotai oki o ratou katoa ra aʼo; e kare atura te tangata i tu ke i te puaka; e mea puapinga kore anake rai.
20 Te aere nei ratou katoa ki te ngai okotai; no te one-pueu anake nei ratou, e te oki anake nei ratou ki te one-pueu ra.
21 Koai te kite i te vaerua tangata e riro ki runga ra? e te vaerua o te puaka e riro ki raro i te one ra?
22 Te kite nei oki au e, kare atu e mea meitaki i te tangata nei, mari ra kia rekareka aia i tana ra au angaanga; ko te reira oki tana tuanga i akonoia: naai oki aia e akaoki mai e akara i te au mea e tupu i muri ake kia riro aia ra?