Isaia 30:1-33
30 TE TUATUA mairā Iehova,E ae oki te tamariki meameaau e, tei akataka i te tuatua ra e kare ra iaku nei; ko tei kimi i te tapokianga e kare ra ta toku Vaerua; kia na rungao te ara i te ara:
2 Ko tei aere oki e aere ki raro ki Aiphiti, e kare i ui mai i toku nei vaa; kia akamaroiroi ratou ia ratou uaorai i te maroiroi o Pharao, e kia irinaki ki raro ake i te maru ra i Aiphiti.
3 E riro ra te maroiroi o Pharao ei akama no kotou; e to kotou irinaki i te maru ra ia Aiphiti ei tumatetenga no kotou.
4 Tei Zoana oki to ratou ui ariki, e ta ratou au karere, kua tae ïa ki Hanesa.
5 Akama anake iora ratou i taua aronga ra, kare oki ratou puapinga e rauka i reira, kare oki a ratou e riro mai ei tauturu, e ei meitaki, ei mea akama ra, e ei akakino ia ratou.
6 Te tuatua no te au puaka i te pae i apatonga: Na rotopu i te enua eke e te mamae maata, no reira mai te liona tinana ra, e te liona taae ra, e te vipera, e te ovi ai rere aere ra, ei runga i te pakuivi o te au punua asini i apai ei ratou i ta ratou apinga, e ta ratou apinga memeitaki ki runga i te puku o te kamela, na tana au tangata i puapinga kore ei ratou ra.
7 E kou ua Aiphiti, e tauturu puapinga kore ua ratou: i tuatuaʼi au i te reira, Ko Rahaba noo ua.
8 Ka aere ana, ka tata ki runga i te papa ki mua ia ratou, e e tata i te leta ra ki roto i tetai buka; ka vaoo ei no te au rā a muri atu, ei kite e tuatau ua atu.
9 E aronga meameaau teianei aronga, e tamariki pikikaa, e tamariki akarongo kore i te ture a Iehova.
10 Ko tei tuatua ki te au akara ra, Auraka e akara; e i te aronga e orama ta ratou ra, Auraka e akakite mai i te mea tika ra; ei tuatua koperepere ua ra ta kotou e tuatua mai kia matou nei, ei tuatua pikikaa te akakite mai:
11 E anga ke atu kotou i tenana aerenga; e tatipake i tenana mataara, e akangaro ke atu i Tei Tapu i Iseraela ia matou nei.
12 I na ko mai ei Tei Tapu i Iseraela nei, No te mea kua akaviivii kotou i teianei tuatua; e kua irinaki kotou ki te takinga-kino, e te tareva ke; e kua irinaki takiri ua i te reira.
13 E teianei, e riro teianei kino ia kotou na, mei te ngaa ngaoro i te patu teitei kia kopupu mai, ko te kore e roaia kua ngaa, mei te kamoanga mata nei ra.
14 E vavaʼiia ïa, mei te tangata e vavaʼi i te kapu potera ra; tei akaungaunga ravaia e ia, kare aia i akaperepere: e kare ua e kitea ake tetai vaanga i te au vaanga katoa ra e tikaʼi kia āriki mai i tetai manga ai i te paaki umu ra, e taipu mai oki i tetai manga vai i roto i te puna ra.
15 Te na ko maira oki te Atu ra ko Iehova, Tei Tapu i Iseraela nei; Tei te ariu mai kotou ma te noo ua e oraʼi kotou; tei te akatupua ua e te irinaki e maroiroi ei kotou; kare akera i tika ia kotou:
16 Kua tuatua ra kotou e, Auraka; ei runga ra matou i te oroenua e oro atu ei; e teianei, e oro rai kotou: Na runga matou i te oroenua oro viviki ra; e teianei e viviki katoa ratou ko te arumaki ia kotou.
17 E ati ua tetai tausani i te akamura o te tangata okotai; e ati oki kotou i te akamura o nga tangata toko rima; e toe rikiriki ua ake kotou mei te reva ki runga i te take maunga, e mei te akairo ki runga i tetai tuaivi ra.
18 E tapapa rā Iehova, kia takinga-meitaki aia ia kotou, e e tu aia ki runga kia aroa aia ia kotou: e Atua tuatua-tau oki a Iehova: e ao to ratou katoa tei tapapa marie iaia ra.
19 Ka noo tika rai te au tangata i Ziona ki Ierusalema: kare kotou e aue ua rai; tei te kaku anga o to kotou reo e maata roaʼi tona aroa; tei te akarongo anga mai aia ra, nana ïa e āē mai ia kotou.
20 Oronga ua mairai a Iehova ia kotou i te kai aue, e te vai o te takinga-kino, kare ra to kotou au orometua e pipini akaou, e kite ra to kotou mata i to kotou au orometua:
21 E na to kotou taringa e akarongo i tetai manga tuatua i muri mai ia kotou, i te na ko anga, Teia te ara, e na reira te aere; kia anga kotou i te pae katau, e kia anga kotou i te pae kaui.
22 E viivii oki ia kotou te vaî o to kotou au idolo ario akatikitikiia ra, e te akamanea o to kotou au tiki auro akatoia ra: e akaruke kotou i te reira, ei mea viivii ïa; ka karanga atu kotou i te reira, Kia atea ke atu ïa.
23 Ei reira aia e oronga mai ei i te ua no ta kotou au ua, ta kotou e ruru i te enua ra; e te kai e tupu ki runga i te enua ra, e riro ïa ei meitaki e ei maata; i taua rā ra e kaikai ei ta kotou au puaka i te ngai atea ra.
24 E na te au puakatoro e te au asini, e arote i te enua ra, e kai i te kai rapakauia ra, i tamāia ki te tairi e te ruru.
25 E riro oki ki runga i te au maunga teitei katoa, e tei runga i te au tuaivi teitei katoa, te au peka vai e te aronga mata vai, kia tae ki te rā pou maata, e ingaʼi te au punanga ra.
26 E e riro oki te mārama o te marama mei te mārama o te rā, e te mārama o te rā ra, ka taki itu ïa, mei te mārama o nga rā e itu katoa ra; i te rā e vaî ei a Iehova i te paruparu o tona ra au tangata, e kia akaora aia i te maki o ta ratou pāpāanga ra.
27 I na, te aere maira te ingoa o Iehova mei te ngai mamao mai, te ka ra tona riri, e kua maata ua atura te auai: kua ki tona vaa i te riri akaoko, e mei te ai kakai ra tona arero:
28 E tau tona aʼo ki te vai puke e maringi ua ra, e taea ravaia ïa te kaki i rotopu iora; e ruru aia i te pa enua i te tairi o te mate, e vaooia oki ki roto i te vaa o te au tangata ra tetai tavaa, ei arataki ke atu ia ratou.
29 E imene ra ta kotou, mei tei te po e akonoia te ravenga tapu; e te rekareka o te ngakau ra, mei te mea kia aere ma te vivo katoa ra, kia aere ki te maunga o Iehova ra, ki te mato o Iseraela ia.
30 E na Iehova e akakite i te reo kakā nona kia rongoia, e kia kitea oki te tuku anga mai o tona rima, ma te otooto anga o te riri, e ma te mura o te ai kakai ra, ma te ua maata, te uriia, e te ua toka ra.
31 I te reo oki o Iehova e pāpāia to Asura ki raro: nana aia e pāpā i te rakau.
32 E te au ngai katoa e na reira te rakau akonoia i te aere, ta Iehova ka akanoo marie ki runga iaia ra, e kapiti katoaia ki te paʼu e te kinura: e ma te tamaki oripu ua tana e tamaki atu kiaia ra.
33 Mei taito maira oki te akataka angaia o Topheta; koia ïa, no te ariki oki i akatakaia: kua akaoonu ravaia, kua akaateaia oki: e putunga ai e te vaie maata ua atu; na te aʼo o Iehova, mei te teio e taʼe ra, e tutungi atu.