Iobu 10:1-22
10 KUA iu rava toku vaerua i toku nei ora anga; ka tuku au iaku uaorai kia aue ua na; e tuatua rai au ma te mamae o toku nei vaerua.
2 Ka karanga atu ana au ki te Atua, Auraka e akaapa ua mai iaku; e akakite mai koe i te mea i māro mai ei koe iaku nei.
3 E mea meitaki ainei ia koe kia akateiaa ua mai, e kia akavaavaa mai i te angaanga a to rima na, e kia mārama ia koe te tuatua a te aronga kino?
4 E mata tangata ainei toou? e mei ta te tangata ainei taau akara anga?
5 Te tau ra ainei toou ra puke rā ki to te tangata nei puke rā, toou ra au mataiti ki te au rā o te tangata nei,
6 I ui ei koe i toku nei kino, e i kimi ei koe i taku nei ara?
7 Kua kite rai koe e kare au i te tangata kino; kare ra e tangata e ora i tei tae ki toou ra rima.
8 Na to rima i akaaite iaku, e kua anga iaku, e kua takapini marie; e te akapou nei rai koe iaku.
9 E akamaara, ko taku ïa tuatua ia koe, e mei te karakaraea taau i anga iaku; e e akaoki akaou ainei koe iaku ki te one-pueu?
10 Kare ainei koe i riringi iaku nei mei te u ra, e kua tatoka iaku mei te u toka ra?
11 Kua vaî koe iaku ki te kiri e te kiko, e kua akaketaketa iaku ki te ivi e te uaua.
12 Ko te ora e te akaperepere taau i tuku mai kiaku nei, e no toou tiaki anga i oraʼi toku vaerua.
13 Kua uuna iora koe i taua au mea nei i roto i toou ngakau: kua kite rai au e tei ia koe rai taua mea nei.
14 Kia rave au i te ara ra, te akairo maira koe iaku i reira, e kare au e matara ia koe mei roto i taku ara.
15 E kino toku ra, e ae oki au; e te vai tuatua-tika nei au, kare au e akateitei i toku upoko. Kua ki au i te akama; e teianei, ka akara mai ana koe i toku maki nei;
16 Te aere nei oki te reira ki te maata anga. Te arumaki mai nei koe iaku nei mei te liona taae ra: e te akakite akaou maira koe ia koe uaorai ei mea taka ke ki runga iaku.
17 Te akataka akaou nei koe i toou aronga kite ki runga iaku, e te akamaata maira to riri otooto ki runga iaku; kua na rungao na rungao te au nuku tamaki iaku nei.
18 Eaa oki koe i rave mai ei iaku mei roto i te kopu? Naringa au i mate e, e auraka rava tetai mata i kite iaku!
19 Kua riro au i reira mei te mea kare; e mei roto i te kopu atu toku apai angaia ki te vaarua.
20 Kare ainei e iti ua oku nei puke rā? kua oti ua ana, ka vaoo ake ana iaku, kia amaru iti ua ana au,
21 Ka riro atu ei ki te angai kare e oki akaou mai, ki te enua poiri oki e te maru-mate:
22 Enua poiri, te poiri tangotango o te maru-mate; kare ua e marikonga, e e arite tona mārama ki te poiri tangotango.