Ioane 6:1-71
6 E MURI akera, ano aturā Iesu ki tetai pae i te roto i Galilea, koia te roto i Tiberia ra.
2 E aerenga maata oki tei aru mai iaia, no te mea kua kite ratou i te akairo tana i rave i te aronga makimaki ra.
3 Aere aturā Iesu ki runga i tetai maunga, noo iora ki raro ma tana au pipi.
4 Kua vaitata te pasa, e oroa na te ngati Iuda ra.
5 Akara akera te mata o Iesu, e kite atura aia e, e aerenga tangata maata te aere maira kiaia ra, kua karanga atura kia Philipa, Eiea tatou ka oko ei i te kai, ei angai anga i teia aronga?
6 I akapera atura aia i te timata anga iaia; kua kite oki aia uaorai i tana ravenga.
7 Kua tuatua mairā Philipa, Kia rua ua atu rai anere i te denari ei oko i te manga, kare ua e rava kia taki tai ungaungā kai i te tangata okotai.
8 Kua tuatua maira iaia tetai pipi ana ra, ko Anederea te taeake o Simona Petero,
9 Tera ake tetai tamaiti, e rima ana manga kerite, e rua oki ika; eaa ra te reira e ravaʼi i teianei aronga maata?
10 Kua karanga aturā Iesu, Ka akatakoto aere ana i te au tangata ki raro. E manganui oki te mātā i taua ngai ra: kua takoto aere iora te au tangata ki raro, e rima paa tausani kia tatau.
11 Kua rave akerā Iesu i nga manga ra; akameitaki atura, apai atura ki te au pipi, e na te au pipi i tua atu na te aronga i noo ki raro ra; e kua tua katoa atura i te ika, e kua iu anake iora ratou.
12 E pangia rava akera ratou, kua karanga atura aia ki tana au pipi, Ka akaputu ana i te ungaungā kai mea riki i toe ra, eiaa tetai vaʼi e akarukeia.
13 Kua akaputuputu iora ratou, e ki akera nga tapora raungauru ma rua, i te toenga i taua nga manga kerite e rima ra, ko tei toe i taua aronga i kai ra.
14 E kite akera taua au tangata ra i te akairo ta Iesu i rave ra, kua na ko akera, Ko taua peroveta mou rai teia, ko te ka aere mai ki te ao nei.
15 Te kite rā Iesu i to ratou manako, ka tiki mai iaia e kave e akaariki, oki akaou atura aia ki runga i te maunga, koia anake ra.
16 E aiai akera, aere atura tana au pipi ki taatai.
17 E tae atura ki runga i tetai pai, akatera atura ki Kaperenauma. Kua poiri rava, kare akerā Iesu i tae mai kia ratou.
18 E peke atura taua roto ra i te matangi viviki.
19 Oe ua atura ratou e rua ngauru ma rima setadia, e e toru ngauru oki, kite maira ratou ia Iesu i te aere ua anga na runga i te kare, e vaitata iora aia ki te pae pai: kua mataku akera ratou.
20 Kua karanga atura aia kia ratou, Ko au teia; auraka e mataku.
21 Rekareka atura ratou iaia i te aere anga ki runga i te pai: tapae atura ratou i reira ra i te enua ta ratou e oe ra.
22 E ao akera, ko te au tangata i topa i te pae roto ra, kua kite ratou e, kare a Iesu i aere katoa ki runga i te boti i te aerenga o te au pipi ra, ko ratou anake ra tei akatere, okotai ua oki mea boti i tae mai i reira:
23 (E puke boti ke ra no Tiberia mai tei tapae mai i vaitata i taua ngai ta ratou i kaikai ra, ka akameitaki ei te Atu ra:)
24 E kia akara akera taua aronga ra e, kare a Iesu i reira, ma tana au pipi katoa ra, kake katoa atura ratou ki runga i te pai, oe atura ki Kaperenauma, i te kimi anga ia Iesu.
25 E kite atura ratou iaia i tetai pae roto ra, kua karanga atura ratou kiaia, E Rabi, i naea mai koe i ko nei?
26 Kua tuatua mairā Iesu kia ratou, Tika, tika tikai taku e karanga atu kia kotou, Kare i to te mea i kite kotou i te au akairo ra, te kimi nei ra kotou iaku, no te mea kua kai kotou i te manga, e pangia akera.
27 Auraka e angaanga i te kai pe ua, ko te kai ra te ka tika i te vairanga, e tae ua atu ki te ora mutu kore ra, ko ta te Tamaiti a te tangata e oronga mai na kotou ra: koia oki tei akonoia e te Atua Metua ra.
28 Kua ui atura ratou kiaia, Eaa ta te Atua angaanga i anoano kia rave matou?
29 Kua tuatua mairā Iesu kia ratou, na ko maira, Teia ta te Atua angaanga i anoano, kia akarongo kotou iaia i tana i tono mai.
30 Kua karanga atura ratou kiaia, Eaa taau akairo e rave, kia akara atu matou, ka akarongo atu ei matou ia koe? eaa taau ravenga?
31 I kaikai ana to matou ai metua i te māna i te medebara ra; ko tei tataia ra e, “I o mai ana aia i te kai no te rangi na ratou ei kaikai anga.”
32 Kua tuatua mairā Iesu kia ratou, Tika, tika tikai taku e karanga atu kia kotou, Kare a Mose i oronga mai i te kai no te rangi na kotou; kua oronga maira taku Metua i te kai tikai o te rangi na kotou.
33 Tera ta te Atua kai, ko tei eke mai mei te rangi, e ko tei oronga mai i te ora no to te ao.
34 Kua karanga atura ratou kiaia, E te Atu, eiaa koe e tivata i te oronga mai i taua kai ra na matou.
35 Kua tuatua mairā Iesu kia ratou, Ko au te kai ora; ko te aere mai kiaku nei, kare rave ïa e pongi; ko te akarongo mai iaku nei, kare rave ïa e kaki vai.
36 Kua karanga atu na ra oki au kia kotou, Kua kite kotou iaku, e kare kotou i akarongo.
37 Ko ta taku Metua i oronga mai noku ra, ka tae mai ïa kiaku nei; e ko te aere mai kiaku nei, kare rava ïa e kopaeia e au.
38 I eke mai nei oki au mei te rangi mai, e akono i to tei tono mai iaku nei anoano, auraka i toku uaorai anoano.
39 Teia oki to te Metua anoano, to tei tono mai iaku nei, kia kore au e ngere i tetai i tana i oronga mai noku ra, kia akatu akaouia e au kia tae ki te rā openga ra.
40 Ko teia oki to tei tono mai iaku nei anoano, ko te kite i te Tamaiti e te akarongo iaia ra, ei ora mutu kore tona: e naku aia e akatu akaou kia tae ki te rā openga ra.
41 Kua urutoe iora te ngati Iuda iaia, koia i tuatua e, Ko au te kai no te rangi mai.
42 Kua na ko akera ratou, Kare ainei teia ko Iesu, te Tamaiti a Iosepha, ra, tei kite katoa oki tatou i tona metua tane, e te metua vaine ra? eaa akera aia i tuatua mai ei e, I eke mai nei au mei te rangi mai?
43 Kua tuatua mairā Iesu kia ratou, na ko maira, Auraka na kotou e urutoe ua.
44 Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia; e naku aia e akatu akaou kia tae ki te rā openga ra.
45 Kua tataia oki i roto i te au peroveta ra e, “Ka ope takiri ratou i te apiiia e te Atua.” E teianei, ko te akarongo e te apiiia e te Metua ra, ko te ka tae mai ïa kiaku nei.
46 Kare ra e tangata i kite i te Metua, mari ra ko to ko mai i te Atua ra, kua kite aia i te Metua ra.
47 Tika, tika tikai taku e karanga atu kia kotou, Ko te akarongo mai iaku nei, e ora mutu kore tona.
48 Ko au te kai e oraʼi.
49 I kai ana to kotou ui metua i te māna i te medebara ra, e mate atura.
50 Ko te kai teia no te rangi mai, kia kaikai ua te tangata i te reira, e kia kore rava e mate.
51 Ko au te kai ora, ko tei eke mai mei te rangi: ko te ka kai i teianei kai, ka tika ïa i te ora anga e tuatau ua atu: ko taku kai e oronga atu, ko toku ïa kopapa, ko taku ïa e oronga atu ei ora no to te ao.
52 Kua taumāro anake iora te ngati Iuda ratou ratou uaorai, na ko akera, Eaa e tikaʼi i teianei tangata kia oronga mai i tona kopapa ei kai?
53 Kua tuatua mairā Iesu kia ratou, Tika, tika tikai taku e karanga atu kia kotou, Kia kore kotou e kai i te kopapa o te Tamaiti a te tangata nei, e kia kore oki kotou e inu i tona toto, kare ïa e ora i roto ia kotou.
54 Ko te kai i toku kopapa, e te inu i toku nei toto, e ora mutu kore tona; e naku aia e akatu akaou kia tae ki te rā openga ra.
55 E kai tikai oki toku kopapa, e e vai inu tikai toku toto.
56 Ko te kai i toku kopapa, e te inu i toku toto, ka noo tika ïa i roto iaku, e ka noo au i roto iaia.
57 Mei te Metua oki e ora ra, ko tei tono mai iaku nei, e te ora nei oki au i te Metua ra: koia katoa te kai iaku nei, ka ora ïa iaku.
58 Ko te kai teia no te rangi mai: kare ra mei te māna i kaingaia e to kotou ui metua ra, mate atura oki ratou: ko te kai i teianei kai, ka tika ïa i te ora anga e tuatau ua atu.
59 I roto i te sunago te tuatua anga aia i taua tuatua nei, i te apii anga i Kaperenauma ra.
60 E manganui tana aronga pipi i akarongo i taua tuatua nei, i na ko e, E tuatua rikarika teia, ka kitea ra iaai?
61 Te kite rā Iesu ki roto iaia ra e, te koumuumu ra tana au pipi i taua tuatua ra, kua tuatua maira kia ratou, Te maitu na kotou i te reira?
62 Naringa paa kotou e kite ana i te Tamaiti a te tangata i te oki akaou anga ki runga i te ngai tana i noo i muatangana?
63 No te vaerua te ora, kare o te kopapa e puapinga: te tuatua taku e karanga atu kia kotou, e vaerua ïa, e e ora tei te reira.
64 Kare ra tetai papaki o kotou nei i akarongo. Kua kite oki a Iesu mei muatangana mairai i te aronga kare i akarongo, e te tangata e pikikaa kiaia ra.
65 Kua karanga atura aia, No reira i karanga atu ei au kia kotou e, kare rava te tangata e tae mai kiaku nei, kia kore e orongaia mai te tae e taku Metua ra.
66 Akaruke maira tetai papaki pipi ana i reira ra e manganui, kare maira i aru akaou iaia ra.
67 Kua tuatua mairā Iesu ki te ngauru ma rua ra, Ka aere katoa ainei kotou?
68 Kua karanga aturā Simona Petero kiaia, E te Atu, ka aere tika matou kiaai ra? tei ia koe te tuatua o te ora mutu kore ra.
69 Kua akarongo akenei oki matou, e kua kite oki matou e, ko koe te Mesia, te Tamaiti a te Atua ora ra.
70 Kua tuatua mairā Iesu kia ratou, Kare aina kua iki au ia kotou tino ngauru ma rua ra? e e diabolo rai tetai o kotou nei.
71 Ko Iuda Ikariota a Simona tana i tuatua ra: no te ngauru ma rua oki aia ra, koia rai te tangata e pikikaa atu iaia ra.