Ioane 5:1-47
5 E MURI akera, e oroa ta te ngati Iuda ra, e aere aturā Iesu ki Ierusalema.
2 Tei Ierusalema tetai vai paî, ko Beteseda te ingoa i te tuatua Ebera, tei te pae i te ngutupa mamoe; e rima are tamaru i taua vai ra.
3 E manganui te makimaki i te moe anga ki roto, te matapo, te pirikoki, te ngungu, te tatari ra i te ngarepu anga i taua vai ra.
4 Ka eke mai oki te angela ki raro i te vai i tona atu rā, e akangarepu i taua vai ra: e te tangata i riro ana ki raro i te vai kia oti te akangarepu angaia ra, kua ora ïa i tona maki i mate ra.
5 E tei reira tetai tangata, e toru ngauru ma varu ona mataiti i te mate anga i te maki.
6 E kia akara akerā Iesu iaia i te moe ua anga, kua kite takere ana aia e, e mate anga roa tona, kua karanga atura kiaia, Te anoano na koe i te ora?
7 Kua tuatua maira taua tangata makimaki kiaia ra, E te Atu, kare ua e tangata i te tuku iaku ki raro i te vai, ngarepu te vai ra: te aere atura au, kua riro atura tetai na mua iaku.
8 Kua karanga aturā Iesu kiaia, Ka tu, ka rave i toou roi, ka aere.
9 Ora takiri akera taua tangata ra i reira ra, kua rave akera i tona roi, aere atura: e sabati oki taua rā ra.
10 Kua tuatua maira te ngati Iuda i taua tangata i akaoraia ra, E sabati teia; kare e tau i te ture kia apai koe i to roi.
11 Kua karanga atura aia kia ratou, Na tei akaora mai iaku, i tuatua mai kiaku e, Ka rave i toou roi, ka aere.
12 Kua ui maira ratou kiaia, Koai ïa tangata i tuatua mai kia koe e, Ka rave i toou roi, ka aere?
13 Kare ua ra taua ta ngata i akaoraia ra i kite iaia: ngaro ke aturā Iesu, manganui te tangata tei taua ngai ra.
14 E muri akera, kite aturā Iesu iaia i roto i te iero, kua karanga atura kiaia, I na, kua ora koe: auraka e ara akaou, ka rokoia aea koe e te kino maata ua atu.
15 Aere atura taua tangata ra, akakite atura ki te ngati Iuda, e ko Iesu tei akaora iaia.
16 Kua takinga-kino maira te ngati Iuda ia Iesu, i umuumu maira iaia e ta, koia i rave i te sabati i taua mea ra.
17 Kua karanga aturā Iesu kia ratou, Te angaanga ua nei rai toku Metua, ka angaanga katoa oki au.
18 Kua maata rava maira to te ngati Iuda umuumu iaia e ta, koia i akakino i te sabati, kare ra no te reira anake ua, koia katoa ra i akaaite iaia uaorai ki te Atua, koia i karanga e, ko te Atua tona Metua tikai.
19 Kua karanga aturā Iesu kia ratou, na ko atura, Tika, tika tikai taku e karanga atu kia kotou, Kare e tika ta te Tamaiti kia rave aia anake uaorai, ko tana ra i kite i te Metua i te rave anga; ko te au mea katoa tana e rave ra, koia katoa ta te Tamaiti e rave.
20 E akaperepere rai oki te Metua i te Tamaiti, e akakite mairai oki kiaia i te au mea katoa tana tikai e rave ra: e mea maata atu rai tana e akakite mai kiaia i teia, kia umere kotou.
21 Mei te Metua oki e akaora, e e akatu mai i tei mate ra ki runga: e akaora katoa oki te Tamaiti i tana e anoano ra.
22 Kare rava oki a te Metua tangata e akava ra, kua tuku uaia mai te akava i te Tamaiti:
23 Kia akangateitei te tangata katoatoa i te Tamaiti, mei ta ratou e akangateitei i te Metua ra. Ko te kore e akangateitei i te Tamaiti ra, kare ïa i akangateitei i te Metua i tei tono mai iaia ra.
24 Tika, tika tikai taku e karanga atu kia kotou, Ko te kite i taku tuatua, e kua akarongo iaia i tei tono mai iaku nei, e ora mutu kore tona, kare aia e akaapaia; mei te mate mai aia, e tei te ora atura.
25 Tika, tika tikai taku e karanga atu kia kotou, Kua vaitata, e teianei rai, te ora, e akarongo ei tei mate i te reo o te Tamaiti a te Atua: e tei akarongo ra, ka ora ïa.
26 Mei te Metua ra e ora tona tei roto iaia uaorai, kua oronga mai oki aia i to te Tamaiti, ei ora katoa tona i roto iaia uaorai;
27 E kua orongaia mai oki te mana kiaia kia akava ra, no te mea e Tamaiti aia na te tangata.
28 Auraka e poitirere ua i te reira: te vaitata mai nei oki te ora, e akarongo ei te aronga katoa i roto i te rua i tona reo,
29 E kua aere mai ki vao; tei rave ana i te meitaki ra, ei te tuakaouanga ora ïa ratou; e tei rave ana i te kino ra, ei te tuakaouanga akaapa ïa ratou.
30 Kare ua e mea e tika iaku anake ra kia rave: te akatau nei au i taku e akarongo nei, e tuatua-tika oki taku ra akatau anga, kare au i kimi i toku uaorai anoano, ko te anoano ra o te Metua ko tei tono mai iaku nei.
31 Koau anake ra, akatika uaʼi iaku uaorai, kare ïa taku akatika anga e tika.
32 Ko tetai ke te akatika mai iaku, kua kite oki au e, e tika tikai tana akatika anga mai iaku ra.
33 Kotou uaorai oki tei tono i te karere kia Ioane ra, e kua akakite mai aia i te tuatua-mou.
34 Kare ra au e tika i ta te tangata akatika anga mai; kia ora ra kotou i karanga atu ei au i teianei tuatua.
35 Ko taua lamepa mura ra aia e te kakā; rekareka poto ua atura kotou i tona mārama.
36 Akatika maata ua ra taku i ta Ioane: ko te angaanga tini oki a te Metua i o mai naku e rave ra, ko taua angaanga tini taku e rave nei, ko te akatika mai iaku nei e, na te Metua au i tono mai.
37 Ko te Metua oki i tono mai iaku nei, kua akatika mai aia uaorai iaku nei. Kare rai kotou i rongo ua ake i tona reo, e kare rai i kite i tona tu.
38 Kare oki tana tuatua i vai tamou i roto ia kotou, i kore ei kotou i akarongo i tana i tono mai.
39 Ka kimi marie i te au tuatua i tataia ra; no te mea, te manako ra kotou ka rauka te ora mutu kore i reira: na ratou ra oki e akakite ïa iaku ra.
40 Kare ra kotou e aere mai kiaku nei i te ora no kotou.
41 Kare au i anoano i ta te tangata akangateitei.
42 Kua kite ra au ia kotou e, kare rava o kotou anoano i te Atua i roto ia kotou na.
43 I aere mai nei au ma te ingoa o toku Metua, e kare kotou i oo mai iaku nei; kia aere mai tetai ma tona uaorai ingoa, e kite kotou i te reira.
44 Eaa kotou e akarongo ei, i tei kimi i ta kotou uaorai akangateitei, kare i akono i ta te Atua anake ra akangateitei?
45 Eiaa kotou e manako e, ko au te tapepe ia kotou i mua i te aroaro o te Metua: ko Mose tei tapepe mai ia kotou, ta kotou i irinaki ana.
46 Naringa oki kotou i akarongo ia Mose, kua akarongo mai ïa kotou iaku nei: i tata oki aia i te tuatua noku.
47 Kare kotou i akarongo i tana i tata ra, eaa oki kotou ka akarongo mai ei i taku nei tuatua?