Ioane 2:1-25
2 E PO toru akera, e akaipoipoanga tei Kana i Galilea, ra, tei reira katoa te metua vaine no Iesu ra:
2 E karangia mairā Iesu e te aronga pipi ana, ka aere katoa i taua akaipoipoanga ra.
3 E pou akera te wina, kua tuatua maira te metua vaine o Iesu kiaia, Kare a ratou wina.
4 Kua karanga aturā Iesu kiaia, Eaa taau iaku nei, e maine? kare i tae ki toku ora.
5 Kua karanga atura te metua vaine ki te au tavini, Ko tana e akaue mai kia kotou, ka akapera kotou.
6 Te vai ua ra nga āriki vai toka e ono, taki rua bato te ka o i te āriki okotai, e taki toru oki, i vaioia ki reira no te peu i te tamā anga a te ngati Iuda.
7 Kua karanga aturā Iesu kia ratou, Ka akaki ana i te aronga āriki ki te vai. Kua akaki iora ratou e tae ua akera ki te nia.
8 Kua karanga atura aia kia ratou, Ka akataʼe ana, apai atu ei ki te tutara o te oroa nei. Kua apai atura ratou.
9 E kia tongi akera te tutara o te oroa i tau vai i akariroia ei wina ra, kare oki aia i kite i te rauka anga mai; (kareka te au tavini i akataʼe mai i taua vai ra, kua kite ïa;) kua karanga atura te tutara ki taua tane ou ra,
10 E kua na ko atura kiaia, Ko te wina meitaki ta te tangata katoa e tuku mai i mua; e kia inu maata te tangata, e muringao te mea kino ake: kua vaio ra koe i te wina meitaki, e i teianei i apai na mai ei.
11 Tei Kana i Galilea te rave angā Iesu i teianei akairo mua, i te akakite anga i tona kakā; e kua akarongo te au pipi iaia.
12 E muri akera i te reira, aere atura aia ki Kaperenauma, koia ma tona metua vaine, tona au taeake, e tana au pipi; kare ra i maata roa to ratou rā i reira.
13 Te vaitata ua ra te pasa a te ngati Iuda ra, aere aturā Iesu ki Ierusalema.
14 E kite atura aia i te aronga i oko i te puakatoro, e te mamoe, e te kukupa, e te aronga oko moni i te noo anga i roto i te iero ra:
15 Kua anga iora aia i te taura rikiriki ei pāpā, e kua tuaru atura ia ratou katoa ki vao mai i te iero ra, te mamoe, e te puakatoro; e riringi atura i te moni a te aronga oko moni ra, e akatauri atura i ta ratou au papa;
16 E karanga atura ki te aronga i oko i te kukupa ra, Apai ke atu i tena au apinga; eiaa e akariro i te are o taku Metua ra, ei are oko anga apinga.
17 Kua manako akera te au pipi i te tuatua i tataia ra, “Kua pou roa au i te maroiroi i toou are.”
18 Kua tuatua maira te ngati Iuda kiaia, na ko maira, Eaa taau akairo e akakite mai, i akapera mai ei koe?
19 Kua karanga aturā Iesu kia ratou, na ko atura, Ka vavaʼi ua na i teianei nao, e kia po toru ake, kua tu akaou ïa iaku.
20 Kua tuatua maira te ngati Iuda, E a ngauru ma ono te mataiti i te akatu anga i teianei nao; e ka tu akaou ia koe i te po toru?
21 Ko tona kopapa te nao tana i karanga ra.
22 E kia tu akaou mai aia mei te mate maira, kua manako akera tana au pipi e, i tuatua na oki aia i taua tuatua nei; akarongo akera ratou i te tuatua i tataia ra, e te tuatua i karangaia e Iesu ra.
23 E iaia i noo i Ierusalema i te oroa i te pasa ra, manganui te tangata i akarongo iaia ra, no te au akairo i kitea e ratou tana i rave ra.
24 Kare ua rā Iesu i irinaki atu kia ratou, no te mea, kua kite aia ia ratou katoatoa.
25 Kare oki aia e akakiteia mai e tetai ke i te tu o te tangata: kua kite oki aia i to roto i te tangata.