Ioane 18:1-40
18 E OTI akera teianei tuatua i te tuatuaia e Iesu ra, aere atura aia e tana au pipi katoa na runga i te kauvai ra i Kiderona, e koro tei reira, tomo atura aia ki roto, e tana au pipi katoa,
2 Kua kite katoā Iuda, i pikikaa iaia ra, i taua ngai ra: kua mātau uā Iesu i te aere i reira e tana au pipi katoa.
3 E tikiia atura e Iuda te pupu vaeau, e te ui taoonga, i te kau taunga nunui ra e te au Pharisea ra, kua aere maira ma te mori, e te rama, e te taoonga-tamaki katoa ki reira.
4 Karekā Iesu, kua kite ïa i te au mea katoatoa e rokoia mai ei aia ra, aere atura, e karanga atura kia ratou, Koai ta kotou e kimi na?
5 Kua tuatua maira ratou kiaia, Ko Iesu i Nazareta ra. Karanga aturā Iesu, Ko au nei ïa. Tei ia ratou katoa rā Iuda i pikikaa iaia ra.
6 E tei te tuatua anga aia ia ratou ra e, Ko au nei ïa, kotoe atura ratou ki muri, inga tiraa ua atura ki raro i te one.
7 Kua ui akaou atura aia kia ratou, Koai ta kotou e kimi na? Kua tuatua maira ratou, Ko Iesu i Nazareta ra.
8 Kua karanga aturā Iesu, Kua akakite atu au kia kotou e, ko au nei ïa: te kimi nei kotou iaku ra, ka tuku atu ia ratou nei kia aere ana:
9 Kia tika te tuatua tana i tuatua ra e, Ko taau i o mai noku ra, kare rava tetai ia ratou i ngaro iaku ra.
10 E koke ta Simona Petero, e kua unui akera, ta atura i te tavini o te taunga maata, e motu takiri atura tona taringa katau. Ko Malako te ingoa o taua tavini ra.
11 Kua karanga aturā Iesu kia Petero, Ka momono ana i taau koke ki roto i te vaî: auraka au e inu i te kapu ta taku Metua i o mai naku ra?
12 Kua opu maira te pupu vaeau ra, e te rangatira maata, e te au tavini o te ngati Iuda, ia Iesu, kua tākai iora iaia.
13 E kua arataki atu ana ratou iaia kia Ana ra; no te mea e metua ongoai aia no Kaiapha, ko te taunga maata ïa i te reira mataiti.
14 Ko Kaiapha tei ako atu i te ngati Iuda ra e, Kia mate atu tetai tangata e tikaʼi, eiaa te tangata katoatoa.
15 Kua aru aturā Simona Petero, e tetai pipi katoa, ia Iesu: kua kite oki te taunga maata i taua pipi ra, e kua tomo atura ki roto i te koro o te taunga maata ra ma Iesu katoa oki.
16 Karekā Petero tu ua maira ïa ki vao i te ngutupa ra. Kua aere atura taua pipi, i kiteia e te taunga maata ra, ki vao, karanga atura ki te tamaine tiaki ngutupa ra, e kua tuku maira ia Petero ki roto.
17 Kua tuatua maira taua tamaine tiaki ngutupa ra kia Petero, Kare aina koe tetai pipi a teianei tangata? Kua karanga atura aia, Kare au.
18 Te tu ua ra te au tavini, e te aronga taoonga, i te pae ai ta ratou i taʼu ra, no te anu; e te murumuru ra ratou: e te tu katoa rā Petero i roto ia ratou i te murumuru anga iaia uaorai.
19 Kua ui maira te taunga maata ra ia Iesu i tana au pipi, e i tana tuatua i apii ra.
20 Kua karanga aturā Iesu kiaia, I tuatua akakite ua au ki to te ao nei; i roto ua rai au i te au sunago ra, e i roto i te iero ra, i te apii anga, i te ngai e akaputu ei te ngati Iuda; kare rava au i tuatua ki te ngai ngaro.
21 Eaa koe i ui mai ei kiaku? ka ui atu i te aronga i akarongo mai i taku i karanga atu kia ratou ra: i na, kua kite ratou i taku i tuatua ra.
22 E kia akapera atura aia ra, kua moto maira tetai o te aronga taoonga, i tu ua i vaitatao ra, ia Iesu, kua na ko maira, E akapera koe i te tuatua ki te taunga maata?
23 Kua karanga aturā Iesu kiaia, Te apa ra taku i tuatua akenei, ka akakite mai ana i te apa: e tuatua-tika ra eaa ua koe i moto mai ei iaku?
24 E tukua atura aia ma te ri katoa e Ana ia Kaiapha i te taunga maata ra.
25 Te tu ua rā Simona Petero i te murumuru anga iaia uaorai ra. Kua ui maira ratou kiaia, Ko koe katoa ainei tetai pipi nana nei? Kua uuna atura aia, na ko atura, Kare au.
26 Kua tuatua maira tetai tavini no te taunga maata, no te kopu o te tangata nona te taringa i tipuia e Petero ra; Kare aina au i kite ia koe i roto i te koro, ma ia katoa ra?
27 Kua uuna akaou iorā Petero: kakaoa iora te moa i reira ra.
28 E kua arataki atura ratou ia Iesu i te are akavaanga, mei i o Kaiapha maira: kua popongi; kare te ngati Iuda i tomo ki roto i te are akavaanga, ko te viivii aea ratou, ko te kore oki ratou e kai i te pasa ra.
29 Kua aere mairā Pilato ki vao kia ratou ra, kua tuatua maira, I akaapa ana kotou i teianei tangata i te aa?
30 Kua karanga atura ratou, na ko atura kiaia, Naringa aia kare i te tangata ara ra, kare matou e tuku atu iaia kia koe na.
31 Kua tuatua mairā Pilato kia ratou, Ka rave mari kotou, ka akava atu iaia, i ta kotou ture. Kua karanga atura te ngati Iuda, Kare e tau i te ture kia ta matou i te tangata.
32 Tupu atura ta Iesu i tuatua ra, ko tana i akakite i te tu o tona mate, ka mate ei ra.
33 Oki aturā Pilato ki roto i te are akavaanga, kua karanga atura kia Iesu, na ko atura kiaia, Ko te ariki ainei koe o te ngati Iuda?
34 Kua tuatua mairā Iesu kiaia, Naau uaorai aina tenana tuatua, e na tetai ke ainei koe i akapera mai iaku.
35 Kua karanga aturā Pilato, E ngati Iuda ainei au? Na toou uaorai enua, e na te kau taunga nunui ra, i tuku mai koe kiaku nei: i aa na koe?
36 Kua tuatua mairā Iesu, Kare to teianei ao taku basileia: naringa no teianei ao taku basileia, kua akamaroiroi ïa toku au tavini, kia kore au e tukuia ki te ngati Iuda; kare ra toku basileia i to ko nei.
37 Kua karanga aturā Pilato, Ko te ariki mari koe? Kua tuatua mairā Iesu, Te tuatua mai na koe e e ariki au. I anau mai ei au nei, i aere mai ei au ki te ao nei, e akakite i te tuatua-mou. No te tuatua-mou aia ra, ka akarongo mai ïa i toku reo.
38 Kua karanga aturā Pilato kiaia, Eaa te tuatua-mou? E kia akapera aia ra, kua aere akaou maira aia ki vao ki te ngati Iuda ra, kua tuatua maira kia ratou, Kare ua o taua tangata ra kino i kitea e au
39 E peu ra ta kotou, kia tuku au i tetai tangata kia kotou i te pasa ra; ka tika ainei ia kotou kia tuku atu au kia kotou i te ariki o te ngati Iuda?
40 Kua kapiki akaou atura ratou ravarai, na ko atura, Auraka teianei tangata, ko Baraba ra. E keia oki a Baraba.