Ioane 15:1-27
15 KO au te vine mou, e ko taku Metua te tanu-kai.
2 E te au rara ua kore katoa i roto iaku nei, nana ïa e tipu ke atu; e te au rara ua katoa, nana ïa e tope, kia maata ua atu te ua.
3 Kua mā ra kotou i tenana, i te tuatua taku i apii atu ia kotou.
4 Ka topiri mai kiaku, e naku e topiri atu kia kotou. Mei te rara kare e ua koia anake ra, kia kore e piri ki te vine ra; kare katoa kotou, kia kore e piri mai kiaku ra.
5 Ko au te vine, kotou te au rara: ko te topiri kiaku ra, e ko te topiri atu au kiaia ra, koia te ua maata: i taka ke kotou iaku ra, kare rava e mea e tika ia kotou.
6 Ko te tangata kare e topiri mai iaku ra, e akarukeia ïa mei te rara ra, marō atura ïa; ko te akaputuia ra, tiria atura ïa ki roto i te ai, pou atura ïa i te ka.
7 I topiri mai kotou kiaku ra, e kia noo marie taku tuatua ki roto ia kotou na, e pati ua kotou i ta kotou e anoano ra, e e orongaia mai ïa kia kotou.
8 Ko te mea ïa e akakakāiaʼi taku Metua, kia maata to kotou ua anga; e riro kotou ei pipi naku i reira.
9 Mei taku Metua i akaperepere mai iaku nei, kua akaperepere katoa atu oki au ia kotou: kia noo kotou ma te akaperepereia atu e au.
10 I akono kotou i taku au akauenga, e vai akaperepereia atu kotou e au; mei iaku i akono i te au akauenga a taku Metua ra, e e vai akaperepereia mai au e ia.
11 I karanga atu au kia kotou i teianei au tuatua, kia vai rai toku mareka ia kotou, e kia ki tikai oki kotou na i te rekareka.
12 Teia taku akauenga, kia aroa kotou ia kotou uaorai, mei iaku i aroa ia kotou.
13 Kia oronga te tangata i tona uaorai ora no tona au taunga, kare rava e tangata aroa maata atu i te reira.
14 Ko kotou toku oa, kia akono kotou i te au tuatua katoa taku i akaue atu ia kotou na.
15 Kare atura au e karanga kia kotou e, e tavini; kare oki te tavini i kite i ta tona pu e rave ra: kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.
16 Kare oki kotou tei iki mai iaku; ko au ra tei iki ia kotou, e kua akono ia kotou, kia aere kotou e kia uua te ua, ei ua kai roa: kia oronga mai te Metua kia kotou i ta kotou e pati atu ma toku nei ingoa.
17 Teia taku akaue kia kotou, kia aroa kotou ia kotou uaorai.
18 Kia riri mai to te ao ia kotou ra, kua kite kotou e, ko au ta ratou i mainaina mai ana, ou to ratou riri ia kotou.
19 Naringa kotou no teianei ao, e inangaro mai to teianei ao i tona tikai: no te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou.
20 Ka akamanako i taku i karanga atu kia kotou na, Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou; i akono ana ratou i taku tuatua, e akono katoa ratou i ta kotou.
21 No toku nei ingoa ra e pera mai ei ratou kia kotou, no te mea kare ratou i kite iaia i tei tono mai iaku nei.
22 Naringa au kare i aere mai e karanga atu ia ratou, kare ïa a ratou ara: i teianei kare o ratou kotoeanga i ta ratou ara.
23 Ko te riri mai iaku ra, kua riri katoa ïa i taku Metua ra.
24 Naringa au kare i rave i rotopu ia ratou, i te angaanga rave koreia e te tangata katoa, kare ïa a ratou ara: i teianei ra, kua kite ïa ratou, e kua riri mairai iaku e taku Metua katoa oki.
25 Tika atura te tuatua i tataia ki roto i ta ratou ture ra e, “I riri ua mai ratou iaku kare e ara.”
26 Kia tae maira te Akapumaana, no ko mai i te Metua ra, naku e tono mai, ko te Vaerua tuatua-mou, no ko aia i te Metua ra, nana au e akakite:
27 E e akakite katoa oki kotou, no te mea tei toku ra pae kotou mei muatangana maira.