Ioane 14:1-31
14 AURAKA e taitaia to kotou ngakau: ka akarongo i te Atua, ka akarongo katoa mai iaku.
2 Manganui te nooanga tikai i te are o taku Metua ra: naringa kare ra, kua karanga atu au kia kotou. Te aere nei au e akamanea i tetai ngai no kotou.
3 E kua oti anake i te akamaneaia e au ra, ka oki mai au, e arataki ia kotou ki oku ra; ei reira katoa kotou, i te ngai e nooia e au ra.
4 Kua kite kotou i te ngai taku e aere nei, kua kite oki kotou i te mataara.
5 Kua tuatua mairā Toma kiaia, E te Atu, kare matou i kite i tenana ngai taau e aere na; eaa oki matou e kite ei i te mataara?
6 Kua karanga aturā Iesu kiaia, Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.
7 Naringa kotou i kite iaku ra, kua kite katoa kotou i taku Metua; e teianei kua kite kotou iaia, e kua akara oki kotou iaia.
8 Kua tuatua mairā Philipa kiaia, E te Atu, ka akakite mai ia matou i te Metua, oti ra ua ra.
9 Kua karanga aturā Iesu kiaia, Ko toku nei oki noo anga roa ki o kotou nei e, e kare akerai koe i kite iaku, e Philipa? ko te akara mai iaku nei, kua akara ïa i te Metua; eaa oki koe i tuatua mai ei e, Ka akakite mai ia matou i te Metua?
10 Kare koe i akarongo e tei roto au i te Metua, e tei roto te Metua iaku? te tuatua taku e karanga atu kia kotou nei, kare ïa i taku uaorai: e te angaanga tini nei, na te Metua i noo ki roto iaku nei i rave.
11 Ka akarongo mai e tei roto au i te Metua, e tei roto te Metua iaku nei: kare ïa, ka akarongo mai iaku i te au angaanga nei.
12 Tika, tika tikai taku e karanga atu kia kotou, Ko te akarongo mai iaku ra, ka rave katoa aia i teianei au angaanga taku e rave nei: e maata ua atu rai tana e rave i teia; no te mea te aere nei au ki taku Metua ra.
13 Ko ta kotou e pati ma toku ingoa, naku ïa e rave, kia akakakāia te Metua i te Tamaiti.
14 Ko ta kotou e pati ma toku ingoa, ka tika ïa iaku.
15 Kua anoano kotou iaku ra, ka akono i taku ra au akauenga.
16 Naku oki e pati atu i te Metua ra, e nana e oronga mai i tetai Akapumaana ia kotou, kia noo tikai ki o kotou nei e tuatau ua atu;
17 Ko te Vaerua tuatua-mou ra, ko tei kore e ārikiia mai e to te ao nei, no te mea kare i akara iaia, kare oki i kite iaia: ka kite ra kotou iaia, e noo tikai oki aia ki o kotou nei, e ei roto oki ia kotou.
18 Kare au e vaio matiroeroe ua ia kotou. Ka oki mairai au ia kotou nei.
19 E kia roaroa ake, kare ua to te ao e kite akaou mai iaku; ka akara maira kotou iaku: no te mea, e ora au, ka ora katoa oki kotou.
20 Kia tae ki te reira rā e kite ei kotou e, tei roto au i taku Metua, e tei roto oki kotou iaku ra, e tei roto oki au ia kotou.
21 Tei iaia taku au akauenga, e kua akono aia i te reira ra, koia tei anoano mai iaku; e tei anoano mai iaku ra, ka akaperepereia mai aia e taku Metua ra; e ka akaperepere oki au iaia, e ka akakite oki au kiaia iaku uaorai.
22 Kua tuatua mairā Iuda kiaia, (kare a Ikariota,) E te Atu, eaa koe e akakite mai ei ia matou ia koe ra, e kare i to te ao?
23 Kua karanga aturā Iesu kiaia, na ko atura, Kia anoano mai te tangata iaku ra, ka akono ïa i taku tuatua: e ka akaperepere mai oki taku Metua iaia, e aere atu oki maua kiaia ra, ka noo tikai ki ona ra.
24 Ko tei kore i anoano mai iaku ra, kare ïa i akono i taku tuatua: kare ra i taku teianei tuatua ta kotou i akarongo nei, na te Metua ra i tono mai iaku nei.
25 I akakite au kia kotou i teianei au tuatua, i toku noo anga ki o kotou nei.
26 Na te Akapumaana ra, na te Vaerua Tapu, ko ta te Metua e tono mai ma toku ingoa, nana e apii mai ia kotou i te au mea katoa, ka akakite akaou mai oki kia kotou i te au tuatua katoa, taku i karanga atu kia kotou na.
27 E au taku e vaio ia kotou nei, ko taku nei au taku e o atu no kotou: kare mei ta to te ao oronga, taku oronga ia kotou. Eiaa e taitaia to kotou ngakau, auraka oki e mataku.
28 Kua kite kotou i taku i karanga atura e, Te aere ke nei au, e ka oki akaou mai au kia kotou nei. Naringa kotou i anoano mai iaku, kua rekareka kotou, ko au i karanga e ka aere au ki te Metua ra: e maata oki toku Metua iaku.
29 Kua akakite atea ua atu na au kia kotou i teianei i taua tuatua nei, kia akarongo kotou kia tupu ra.
30 Teia au ka kore e karangaranga maata atu kia kotou: i teianei, te aere mai nei te ariki o teianei ao, kare ra ana i roto iaku nei.
31 Kia kite ra to te ao e, te anoano nei au i te Metua; e te akono nei au i ta te Metua i akaue mai iaku ra. Ka tu, ka aere ke tatou.