Ioane 13:1-38
13 OU te oroa pasa ra, kua kite anā Iesu e kua tae ki tona ora, ka akaruke mai ei i teianei ao, ka aere atu ei ki te Metua ra, i aroa aia i tona tangata i te ao nei, aroa ua atura aia ia ratou e tae ua atura ki te openga ra.
2 E te kaikai ra ratou i taua kaingakai i te po ra, kua tuku mai anā Satani i te tuatua i te ngakau o Iuda Ikariota a Simona ra, e pikikaa iaia;
3 Kua kite anā Iesu e, kua tuku mai te Metua i te au mea katoa tei tona rima, e mei ko mai aia i te Atua ra, e te oki atu rai oki aia ki te Atua ra:
4 Kua tu akera aia ki runga i taua kaingakai ra, kopae atura i tona kakau; tatua iora iaia i tetai kakau orei.
5 Kua riringi iora aia i te vai ki roto i tetai kapu, kua orei atura i te vaevae o te au pipi ra, e tamarō atura oki ki te kakau i tatuaia e ia ra.
6 E tae atura aia kia Simona Petero ra: kua tuatua maira aia kiaia, E te Atu, ka orei mairai koe i taku vaevae?
7 Kua karanga aturā Iesu, na ko atura kiaia, Kare koe i kite i taku e rave nei i tenana; ka kite ra koe a muri atu.
8 Kua tuatua mairā Petero kiaia, Auraka rava koe e orei i taku vaevae. Kua karanga aturā Iesu kiaia, Kia kore au e orei ia koe ra, kare rava aau tuanga iaku nei.
9 Kua tuatua mairā Simona Petero kiaia, E te Atu, eiaa mari taku vaevae anake ua, ko toku rima katoa e toku upoko katoa oki.
10 Kua karanga aturā Iesu kiaia, Ko tei paî ra, oti ra ua ïa, mari ra ko tona vaevae anake ra te orei, ko tona kopapa katoa ra, kua mā ïa: e kua mā oki kotou, kare ra i ope.
11 Kua kite oki aia i te tangata e pikikaa iaia ra; i karanga atu ei aia e, Kare kotou i ope i te mā.
12 E oti akera tona orei anga i to ratou vaevae, e kua kakau iora aia i tona kakau, noo akaou iora aia ki raro, kua karanga atura kia ratou, Te kite na kotou i taku i rave nei ia kotou?
13 Te karanga nei oki kotou e, ko au te Orometua, e te Atu: e tuatua tika oki ta kotou; koia tikai oki au nei.
14 E kua orei na oki au, ko te Atu e te Orometua, i to kotou vaevae, kia orei katoa oki kotou i to kotou uaorai vaevae e tikaʼi.
15 Kua tuku atu na oki au i te akaraanga na kotou, ko taku i raveo ia kotou nei, kia akapera katoa kotou.
16 Tika, tika tikai taku e karanga atu kia kotou, Kare te tavini i maata atu i tona pu, e te karere, kare ïa i maata atu i tei tono mai iaia ra.
17 E ao to kotou, te aronga i kite i teianei au tuatua, kia akono kotou i te reira.
18 Kare to kotou katoa taku e tuatua nei: kua kite au i taku i iki: kia tupu ra te tuatua i tataia ra e, Ko tei kai i taku ra kaingakai, kua akateitei aia i tona poo vaevae iaku nei.”
19 I akakite atea atu na au kia kotou i teianei tuatua, kia akarongo kotou kia tupu ra e, ko au ïa.
20 Tika, tika tikai taku e karanga atu kia kotou, Ko te kite mai i taku e tono ra, kua kite mai aia iaku ra; e te kite mai iaku ra, kua kite ïa iaia i tei tono mai iaku nei.
21 Tei te tuatua angā Iesu i teianei au tuatua, taitaia atura tona ngakau, kua akakite atura, na ko atura, Tika, tika tikai taku e karanga atu kia kotou, Ka pikikaa tetai o kotou iaku nei.
22 Kua akara akera te au pipi ratou ratou uaorai, ma te ekoko ua i tana i tuatua ra.
23 Te irinaki, ua ra te pipi akaperepere a Iesu ki runga i to Iesu umauma.
24 Kua tungou mairā Simona Petero kiaia, kia ui atu aia i tana i karanga ra.
25 Kua karanga atura tei irinaki ki runga i te umauma o Iesu ra kiaia, E te Atu, koai?
26 Kua tuatua mairā Iesu, Ko taku e apai atu i teianei manga kai kia tutouia e au ra, koia ïa. E kia tutouia e ia taua manga kai ra, kua apai atura na Iuda Ikariota a Simona ra.
27 E pou akera taua manga kai ra, kua tomo mairā Satani ki roto iaia. Kua karanga aturā Iesu kiaia, Taau e rave, kia vave te rave anga.
28 Kare rava ra tetai i taua kaingakai ra i kite i te mea i karanga atu ei aia kiaia ra i taua tuatua ra.
29 Te manako ra tetai papaki, no te mea tei ia Iuda te pute, i karanga atu ei a Iesu kiaia e, Ka oko i tei tau no taua oroa ra; e ka apai atu ainei i te apinga na te aronga ao.
30 E tei te pou anga taua manga kai ra, aere atura aia ki vao i reira ra; kua po oki.
31 E kia riro atu aia ra, kua karanga aturā Iesu, Kua akakakāia te Tamaiti a te tangata i teianei, e kua akakakāia te Atua iaia.
32 Kua akakakāia te Atua iaia ra, e akakakāia mai aia e te Atua iaia uaorai, i teianei rai te akakakā anga mai iaia.
33 E aku au tamariki e, e poto ua toku noo ki o kotou nei. E kimi kotou iaku: e taku i karanga atu ki te ngati Iuda ra e, Te ngai taku e aere nei, kare kotou e tae ake ki reira; ko taku ïa tuatua kia kotou i teianei.
34 E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai.
35 Ko te mea teia e kite ei te tangata katoa e e pipi kotou naku, kia aroa kotou ia kotou uaorai.
36 Kua tuatua mairā Simona Petero kiaia, E te Atu, ka aere koe kiea? Kua karanga aturā Iesu kiaia, I te ngai taku e aere nei, kare e tika ia koe kia aru mai iaku i teianei; ka aru maira koe iaku a muri atu.
37 Kua tuatua mairā Petero kiaia, E te Atu, eaa e kore ei e tika iaku kia aru atu ia koe i teianei? e oronga oki au i toku ora noou.
38 Kua karanga aturā Iesu kiaia, Ka oronga koe i toou ora noku e? Tika, tika tikai taku e karanga atu kia koe, Kare e kakaoa te moa, ka tu toru atura oou uuna anga iaku.