Iakobo 5:1-20
5 E TENANA, e te aronga apinga mamaata na, ka tangi, ka aue i to kotou au mate maata e vaitata mai ia kotou na.
2 Kua piro ta kotou apinga maata, e kua pou to kotou kakau i te neu.
3 Kua pe ta kotou auro e te ario; e e riro to reira moneneu ei akaapa ia kotou, e e pou to kotou kopapa i te reira mei te pou ai ra. Kua akaputu kotou i te apinga maata i te au rā openga nei.
4 I na oki, te tutaki a te aronga rave angaanga ko tei kokoti i te au koro na kotou, tei tāpu tika koreia e kotou, te kapiki ra ïa ki te Atua ia kotou: e te akateni a te aronga i kokoti ra, kua puta rava ïa ki roto i te taringa o te Atu Sabaota ra.
5 Kua noo kotou i te ao nei, ma te navenave, e te kanga; kua akapori kotou ia kotou uaorai, mei te au puaka i angaiia no te rā tainga anga.
6 Kua akaapa kotou e kua tamate rava kotou i te tangata tuatua-tika ra; kare oki aia i tutaki mai ia kotou.
7 E teianei e akakoromaki, e aku au taeake, e kia tae mai te Atu ra. I na oki te tanu-kai ra, te tatari marie ua ra aia i te kai meitaki o te enua nei, te akakoromaki marie ra oki i te reira, e kia rauka mai te ua momua e te ua openga ra.
8 E akakoromaki katoa oki kotou; e akatinamou tikai i to kotou ngakau: kua vaitata rava taua aerenga mai o te Atu ra.
9 Auraka e akavareae tetai ki tetai, e aku au taeake, ko te akaapaia mai aea kotou: i na, te tu ua maira te Akava i te ngutupa ra.
10 E rave, e aku au taeake, i te au peroveta ko tei tuatua mai ma te ingoa o te Atu ra, ei akaraanga i te akaruru anga i te kino e te akakoromaki.
11 I na oki, te karanga nei tatou e, kua meitaki te aronga i tamou marie i te akakoromaki. Kua kite kotou i te akakoromaki o Iobu ra, e kua kite oki kotou i ta te Atu i rave i te openga ra; e kua ki te Atu i te aroa e te takinga-meitaki maata.
12 Kareka te taputou ua, e aku au taeake, auraka rava ïa, auraka i te rangi, auraka katoa i te enua, e te au taputou koia, ei koia; e ta kotou kare, ei kare; ko te rokoia aea kotou e te akaapa.
13 Kua tairoia aina tetai o kotou na? ka pure aia. Te rekareka na tetai? ka imene aia i te imene.
14 Te mate ra aina tetai o kotou i te maki? e tiki aia i te aronga pakari o te ekalesia ra; e na ratou e pure iaia ma te akatainu iaia i te manongi i te ingoa o te Atu ra:
15 E e ora taua maki ra i te pure akarongo, e na te Atu aia e akatu ki runga; e i rave na aia i te ara ra, e akakoreia tana ara.
16 E aaki i ta kotou au apa tetai ki tetai, e pure oki tetai i tetai, kia akaoraia kotou. Te pure a te tangata tuatua-tika i akatupu mouia ki roto ra, e mea manuia maata ïa.
17 E tangata oki a Elia mei ia tatou katoa te tu e mate ua, e i pure viviki atura aia e, auraka ei ua: kare atura e ua i topa mai ki runga i te enua e e toru akera mataiti e e ono akera oki marama.
18 Pure akaou atura oki aia, e kua oronga maira te rangi i te ua, kua tupu akera te kai o te enua nei.
19 E aku au taeake ra, kia tatipake tetai o kotou i te tuatua-mou nei, e na tetai aia i akaoki mai;
20 Kia kite mai oki taua tangata ra e, ko tei akaoki mai i te tangata ara i taua apa nana ra, e vaerua tei ora iaia i te mate, e e manganui te ara te ngaro iaia.