Genese 7:1-24
7 KUA tuatua mairā Iehova kia Noa, Ka aere koe ma toou kopu-tangata katoa ki roto i te araka; ko koe oki te tangata tuatua-tika taku i kite i teianei uki, i mua i toku aroaro.
2 To te au puaka viivii kore katoa ra, kia tataki itu ïa taau e rave ra, ko te toa ma tana ua; e to te au puaka viivii ra, e tataki rua ïa, ko te toa ma tana ua:
3 To te au manu o te reva ra, e tataki itu katoa ïa, ko te toa e te ua; kia ora to ratou anaunga ki runga i te enua katoa nei.
4 E itu po toe, e akatopa mai ei au i te ua ki runga i te enua nei, e kia rua takau po, e kia rua takau ao; e ka akapou au i te au mea ora katoa i angaia e au ki rungao i te enua nei.
5 E kua pera oki a Noa i te au mea katoa ta Iehova i akaue mai iaia ra.
6 E ono akera o Noa anere i te mataiti, ka rokoia mai ei te enua i te vai diluvi.
7 Kua tomo aturā Noa, e tana au tamariki, e tana vaine, e te au vaine katoa a nga tamariki nana ra, ki roto i te araka, no taua vai diluvi ra.
8 E to te au puaka viivii kore, e te au puaka viivii, e to te au manu, e te au mea katoa e totoro aere ki runga i te enua nei,
9 Kua tataki rua anake ia i te aere kia Noa, ki roto i te araka, ko te toa e te ua, i ta te Atua i akaue ia Noa ra.
10 E tae akera ki te po itu ra, ko te vai diluvi maira ïa ki runga i te enua.
11 I te ono o te anere anga o to Noa mataiti i te ora anga, i te rua o te marama, e te ngauru ma itu o te po i taua marama ra, tei taua po tikai ra, ko te ngaangaa anga ïa o te au tumu katoa o te moana maata ra, e kiritiia akera te au ngutupa o te rangi ra:
12 E topa iora te ua ki runga i te enua nei, e a akera ngauru anga o te po, e a oki ngauru anga o te ao.
13 Tei taua rā tikai ra to Noa, e nga tamariki a Noa, ko Sema, ko Ilama, e ko Iapheta, e te vaine a Noa, e te au vaine katoa toko toru a nga tamariki a Noa ra, tomo anga ki roto i te araka ra;
14 Ko ratou, e te au manu taae katoa i to ratou tu tikai, e te au puaka katoa i to ratou tu tikai, e te au mea totoro katoa e totoro aere ua ki runga i te enua nei i to ratou tu tikai, e te au manu katoa, e nga mea peau katoa i to ratou tu tikai.
15 Tataki rua atura to te au mea ora ravarai e tui i te aʼo ra, i te aere katoa anga kia Noa ra, ki roto i te araka.
16 E ko taua au mea i aere ki roto ra, i na ko ratou i te aere, ko te toa uaorai e te ua uaorai, to te au mea ora katoa ra, mei ta te Atua i akaue iaia ra: e na Iehova i popani iaia ki roto.
17 E a akera ngauru anga o te rā, to taua diluvi ki runga i te enua nei; e maata ua atura taua vai ra, e maranga akera te araka ki runga, e teitei akera ki runga ake i te enua ra.
18 E ririnui roa maira taua vai ra, e maata rava maira ki runga i te enua nei: e mānu ua atura te araka ki runga i te kiriatai.
19 E ririnui maata roa maira oki te vai ki rungao i te enua nei; ngaromia iora te au maunga teitei ravarai i raro ake i te rangi katoa nei.
20 Teitei roa atura te vai i runga ake i te au maunga i ngaromia ra, e okotai ngauru ma rima i te kubiti.
21 E ope takiri roa akera te au mea ora katoa i keukeu aere i runga i te enua nei i te mate, te au manu, e te puaka, e te manu taae, e te au mea totoro katoa e totoro aere ua ki runga i te enua nei, e te tangata katoa:
22 Ko te au mea ora katoa e uti i te aʼo nei, e te au mea katoa i runga i te pae nei, mate iora ïa.
23 Kua pou takiri rava te au mea ora katoa i runga i te enua ra, ko te tangata, e te puaka, e te au mea totoro, e te manu o te reva nei; e pou takiri rava akera ïa i runga i te enua nei: ko Noa anake ra, e taua aronga i roto katoa i te araka ra, tei toe.
24 E maata rava atura te vai ki runga i te enua nei, e okotai akera anere e rima ngauru anga o te po.