Ezera 6:1-22
6 KUA akatupu iora te ariki ra ko Dariu i tetai ture, e kimi i roto i te are vairanga tuatua, i te ngai i vaooiaʼi te apinga i Babulonia.
2 E kitea iora i Akemeta, i te are o te ariki i te enua o te Madai, tetai pokai tuatua, e te tuatua i tataia i roto, i te na ko anga e:
3 Tei te mataiti mua o te ariki ra o Kuro, kua akatupu iora te ariki ra ko Kuro i tetai ture, i te are o te Atua i Ierusalema, Kia patuia taua are ra, te ngai ta ratou i apai i te au atinga ra, e kia akamou ketaketaia te tango i taua are ra; e ono ngauru te kubiti i te teitei, e ono ngauru oki te kubiti i te tipoto:
4 Kia toru tupati toka taraiia, e okotai oki tupati rakau ou: ei ko nei ei te are o te ariki nei te apinga i te oko:
5 Kia akaokiia oki te au āriki auro e te ario no roto i te are o te Atua ra, tei raveia mai e Nebukaneza no roto i te iero i Ierusalema, e kua apai mai ki Babulonia nei, e apai akaouia, ki te iero i Ierusalema, ka tuku atu ei ki te ngai tikai i roto i te are o te Atua ra.
6 E tenana, e Tatanai, e tutara i tera pae vai, e ko Setara-bozanai, e to korua ui katoa ra i te Apharasateka ra, i tera pae vai, e are ke kotou i taua ngai ra.
7 E vaoo ua atu taua angaanga are no te Atua nei; e vaio ua atu te tutara o te ngati Iuda, e te aronga pakari ngati Iuda, kia akatu ua ana i taua are no te Atua nei i tona ra ngai.
8 Kua akatupuia oki e au tetai ture, e ta kotou e rave atu i taua aronga pakari ngati Iuda ra, i te patu anga i taua are no te Atua nei: no roto i te apinga a te ariki ra, i tei uipaia mai i tera pae vai, ka rave ei i te moni ka tuku atu ei ki taua au tangata ra, auraka kia akakoreia.
9 E kia oronga tikaia atu ta ratou au mea anoano i te au rā katoa ra, auraka e tivata, i te au puakatoro, e te au mamoe toa, e te au punua mamoe, ei atinga karakaratio na te Atua no te rangi, te sitona, te tai, te wina, e te inu, i tei akonoia e te kau taunga i Ierusalema ra:
10 Kia apai ratou i te au atinga aunga kakara ki te Atua no te rangi, e kia pure oki i te ariki, e tana au tamariki, kia ora.
11 Teia oki tetai aku ture, ko te tangata e ruri ke i teianei ture, kia kiritiia te rakau o tona are, e kia akatuia taua rakau ra, kia riia aia ki rungao, e kia riro ua atu tona are ei tiringa teita no te reira.
12 E na te Atua, na tei akamou i tona ingoa i reira, e rave i te au ariki e te tangata katoa kia mate, kia rave to ratou rima, e kia akakore, e kia pou ia ratou taua are o te Atua i Ierusalema ra. Naku na Dariu i akatupu i taua ture nei; kia maroiroi te rave kia oti vave.
13 Ei reira te tutara o teianei pae vai ko Tatanai, e ko Setara-bozanai, e to raua ui katoa ra, i ta te ariki ra i ta Dariu i akaue maira, kua rave naunau iora ïa.
14 Kua rave iora te aronga pakari ngati Iuda kua patu, e kua manuia atura ta ratou, i te totou a Hagai peroveta ra, e ta Zekaria te tamaiti a Ido ra. Kua patu iora ratou, e oti rava akera, i te akauenga a te Atua o Iseraela, e te akauenga oki a Kuro, e ko Dariu, e ko Aretekasaseta ra ariki no Peresia.
15 Oti rava akera taua are ra i te rā toru o te marama ra ko Adara; ko te ono ïa o te mataiti i te au o te ariki ra o Dariu.
16 Kua akono atura te tamariki a Iseraela, te kau taunga, te au ngati Levi, e te toenga o te au tamariki i tuikaaia ra, i te akatapu anga i te are o te Atua nei ma te rekareka;
17 E kua apai atura i te akatapu anga i taua are o te Atua ra, okotai anere i te puakatoro, e rua anere i te mamoe toa, e a anere i te punua mamoe; e no te tarangaara na Iseraela ravarai, okotai ïa ngauru ma rua i te puakanio toa, kua aite ki te tatauanga i te au kopu o Iseraela.
18 Kua akanoo atura ratou i te kau taunga i ta ratou au tuanga, e te au ngati Levi i to ratou au pupu, i te angaanga a te Atua i Ierusalema; mei tei tataia i roto i te buka a Mose ra.
19 Akono atura e au tamariki i tuikaaia ra i te pasa i te rā okotai ngauru ma a i te marama mua ra.
20 Okotai rai oki tamā angaia to te kau taunga e te ngati Levi, kua mā katoa ratou, e kua ko i te pasa na te au tamariki katoa i tuikaaia ra, e na to ratou ai taeake te kau taunga, e na ratou uaorai.
21 E te tamariki a Iseraela, I aere mai mei roto mai i te tuikaa anga ra, e te aronga katoa i akataka ke ia ratou uaorai i te viivii o te enua etene, kia kimi i te Atua o Iseraela ia Iehova, kua kai ïa,
22 E kua akono i te oroa i te kai akaopue kore ra ma te rekareka, e po itu akera: na Iehova oki ratou i akarekareka mai, e kua akaariu mai i te ngakau o te ariki o Asura kia ratou, ei akamaroiroi mai i to ratou rima i te rave anga i te angaanga i te are o te Atua, i te Atua o Iseraela.