Ezera 5:1-17
5 KUA totou iora nga peroveta ra, ko Hagai peroveta e ko Zekaria te tamaiti a Ido, ki te ngati Iuda i noo i Iuda e o Ierusalema, i te ingoa o te Atua o Iseraela, kia ratou.
2 Kua tu mairā Zerubabela te tamaiti a Salatiela ki runga, e ko Iesua te tamaiti a Iozadaka, kua akamata iora i te patu i te are o te Atua i Ierusalema: raua ma nga peroveta a te Atua i te turu anga mai ia ratou.
3 I reira te aere anga mai o Tatanai, e tutara no teia pae vai nei, e ko Setara-bozanai, e to raua ui katoa ra, e kua tuatua maira kia ratou, Naai i akaue mai ia kotou e patu i teianei are, e e tuki akaou i teianei patu?
4 Kua akakite atura matou kia ratou i te au ingoa o te aronga i tuki i taua patu ra.
5 Te akara maira ra te mata o to ratou Atua i te aronga pakari ngati Iuda ra, e kare atura ratou i akaruke i taua angaanga ra, e tae ua maira te tuatua kia Dariu. Kua tata iora oki ratou i tetai leta i taua tuatua nei.
6 Teia te tu o te leta ta Tatanai tutara i teianei pae vai, e ko Setara-bozanai, e tona ui katoa ra te Apharasateka i teianei pae vai, i akau atu ki te ariki ra kia Dariu:
7 I na ko ia te tata i roto i taua leta ra, i akauia e ratou kiaia ra: Ki te ariki ra kia Dariu, kia ora koe.
8 Kia kite mai koe, e te ariki, e kua aere matou ki te enua ra ki Iudea, ki te are o te Atua maata, e tukiia akera ki te toka taraiia, e te rakau oki i te tuku angaia ki runga i te patu ra, te rave naunauia ra taua angaanga nei, e te manuia ra ta to ratou rima.
9 Kua ui atura matou ki taua aronga pakari ra, karanga atura matou kia ratou, na ko atura, Naai i akaue mai ia kotou e akatu i teianei are, e e tuki i teianei patu?
10 E kua ui atura matou kia ratou i to ratou ingoa, kia akakite atu kia koe, e kia tataia e matou te ingoa o to ratou aronga mamaata.
11 E kua akapera maira ratou, i te tuatua anga mai kia matou, na ko maira, E tavini oki matou no te Atua o te rangi e te enua, e te patu nei i te are i patuia i taito roa ra, ta tetai ariki maata o Iseraela i patu ra, e oti rava akera.
12 Kia akakokoia atura te Atua o te rangi e to matou ai metua ra kia riri, kua oronga atura aia ia ratou ki te rima o te ariki o Babulonia o Nebukaneza, te Kaledea, ko tei vavaʼi i teianei are, e kua apai ke atura te tangata ki Babulonia.
13 Tae akera ki te mataiti mua o te ariki o Babulonia o Kuro, kua tata te ariki ra ko Kuro i te ture e patu i taua are o te Atua ra.
14 E te au āriki auro e te ario no te are o te Atua ra, tei raveia e Nebukaneza no roto i te iero Ierusalema, e kua apai i te reira ki roto i te iero ki Babulonia, kua raveia te reira e te ariki ra e Kuro no roto i te iero i Babulonia, e kua tukuia atu ki tetai tangata ko Sesabazara te ingoa, tei akatutaraia e ia ra;
15 E kua karanga atura kiaia, Ka rave i teianei au āriki, e aere, e apai ki roto i te iero i Ierusalema, e kia akatuia te are o te Atua i tona ra ngai.
16 Kua aere maira i reira taua Sesabazara ra, e kua akamou i te tango i te are o te Atua i Ierusalema: e mei reira mairai, e tae rava akenei ki teianei i te patu ua anga, e kare oki i oti.
17 E tenana, kia tika, e te ariki, e kimiia i roto i te are apinga o te ariki ra, i Babulonia ra, i te kitea anga e, e ture tei tukuia mai e te ariki ra e Kuro, e akatu i taua are o te Atua i Ierusalema nei; e na te ariki e tuku mai i tana tuatua i taua mea ra kia matou nei.