Ezekiela 18:1-32
18 E KUA tae maira oki te tuatua a Iehova kiaku nei, na ko maira,
2 Eaa te mea i tuatuaʼi kotou i teianei maseli i te enua o Iseraela nei, i na ko ei e, Kua kai te au metua i te vine kava, e kua mania te nio o te tamariki?
3 Te tuatua maira te Atu ra ko Iehova, Te ora nei au, kare kotou e tau kia tuatua akaou i taua maseli i Iseraeli nei.
4 I na, noku anake te au vaerua ravarai nei, mei te vaerua o te metua ra, koia katoa te vaerua o te tamaiti, noku katoa ïa: ko te vaerua e rave i te ara ra, ko te ka mate ïa.
5 Ei tuatua-tika ra ta te tangata nei, e kua rave i te mea tau ra e te mea tika,
6 Kare aia i kaikai ki runga i te au maunga, e kare i nānā i tona mata ki te au idolo o te ngutuare o Iseraela nei, e kare oki i rave i te vaine a tona tangata tupu, e kare i akavaitata ki te vaine i akatakaia ra,
7 E kare i takinga-kino i tetai, e kua akaoki mai i te ou ki te kai ou ra, kare i āru aere, kua oronga ra i tana kai na tei pongi ra, e kua tapoki i te putaua ki te kakau ra;
8 Kare i oronga atu i tana ei ou, kare oki i rave mai ei ou ra kua tāpu mai i tona rima i te kino, kua rave i te tuatua-tau tikai ki tera tangata ki tera tangata,
9 Kua aaere ra i taku ra au akonoanga, e kua akono i taku ra au tuatua-tau, kia tika tana i rave; e tuatua-tika tana, e ora tika rai ïa aia, te tuatua maira te Atu ra ko Iehova.
10 Kia anau ra tana tamaiti e āru apinga, e ta tangata, e ko tei rave mei teia katoa nei au mea ra te tu,
11 E kare oki i rave i tetai i tana au mea memeitaki ra; kua kaikai ra ki runga i te au maunga ra, e kua rave aia i te vaine a tona ra tangata tupu,
12 Kua takinga-kino ra i te ao e te putaua, kua āru aere oki, kare i akaoki mai i te ou, e kua nānā i tona mata ki te au idolo, e kua rave i te au mea viivii ra,
13 Kua oronga atu i tana ei ou, e kua rave mai ei ou ra: e ora ainei aia? kare aia e ora: kua rave aia i taua au mea viivii katoa ra; ka mate tikai ïa aia; tei runga iaia uaorai tona toto.
14 Koia oki, kia anau maira tana tamaiti, e kua kite aia i te au ara katoa ta tona metua i rave ra, e kua manako aia, e kare aia e akapera i te rave,
15 Kare i kaikai ki runga i te au maunga, kare i nānā i tona mata ki te au idolo o te ngutuare o Iseraela, kare aia i rave i te vaine a tona ra tangata tupu,
16 Kare oki i takinga-kino i tetai, kare i rave i te ou, kare oki i āru aere, kua oronga ra i tana kai i tei pongi ra, e kua tapoki i te putaua ki te kakau,
17 Kare tona rima i rave kino i te ao, kare oki i rave i te ou, e te mea ouia ra, kua rave ra i taku ra au tuatua-tau, e kua aaere i taku ra au akonoanga; kare aia e mate i te ara a tona metua ra, e ora tika ïa aia.
18 Kareka ko tona metua, no te mea e takinga-kino aroa kore tona, e kua āru i ta te taeake ra, e kua rave i te mea meitaki kore i roto i tona ra au tangata, i na oki, ka mate aia i tana ra ara.
19 Te karanga nei ra kotou e, Eaa nei oki? kare ainei ta te metua nei ara tei runga tei te tamaiti? Kua rave te tamaiti i te tuatua-tau, e te tuatua-tika, e kua akono i te au akonoanga katoa naku ra, e kua rave i te reira ra, e ora tika ïa aia.
20 Ko te vaerua e rave i te ara ra, ko te ka mate ïa. Kare te tamaiti e apai i te ara a te metua, e kare oki te metua e apai i te ara a te tamaiti: te tuatua-tika a te tangata tuatua-tika ra, ei runga ïa iaia, e te kino o te tangata kino ra, ei runga ïa iaia.
21 Kia ariu maira te tangata kino i te au ara katoa tana i rave ra, e kua akono i taku katoa ra au akonoanga, e kua rave i te tuatua-tau e te tuatua-tika, e ora tika ïa aia, kare ïa aia e mate.
22 Te au ara katoa tana i rave ra, kare ïa e taiku atu ia kiaia: ei roto i te tuatua-tika tana i rave ra, e ora ïa aia.
23 E manga rekareka mea ngiti ake ainei toku i te mate o te tangata kino? te tuatua maira te Atu ra ko Iehova: e auraka ainei kia ariu mai aia i tona ra au arataa, e kia ora?
24 Kia ariu ke ra te tangata ta tuatua-tika i te tuatua-tika nana, e kua rave iora i te kino, e kua rave i te au mea viivii katoa, mei tei raveia e te tangata kino ra, e ora ainei aia? te au tuatua-tika katoa i raveia e ia ra, kare ïa e taikuia: ei roto i tana ra tatipake i tatipake ei aia ra, ei roto oki i tana ra ara i araʼi aia ra, ei roto i te reira ka mate ei aia.
25 E te karanga na oki kotou e, Kare te tuatua o te Atu nei i tau. E akarongo mai ana, e te ngutuare o Iseraela nei: Ko taku ainei te tuatua kare i tau? kare ainei ko ta kotou te tuatua kare i tau?
26 Kia ariu ke te tangata tuatua-tika i te tuatua-tika nana ra, e kua rave i te kino ra, e kua mate aia i roto i te reira; i te kino tana i rave ra, ka mate ei aia.
27 E kia ariu mai oki te tangata kino i tona ra kino, i raveia e ia ra, e kua rave i te tuatua-tau, e te tuatua-tika, e ora ïa tona vaerua iaia uaorai.
28 No te mea kua akamaara aia, e kua ariu ke mai, i te au ara katoa tana i rave ra, e ora tika ïa aia, kare ïa aia e mate.
29 E te tuatua maira te ngutuare o Iseraela, Kare te tuatua o te Atu ra i tau. E te ngutuare o Iseraela e, kare ainei i tau taku nei tuatua? kare ainei ko ta kotou te tuatua kare i tau?
30 E teianei, e akava atu au ia kotou, e te ngutuare o Iseraela, kotou ravarai i tei tau i to kotou au aerenga, te tuatua maira te Atu ra ko Iehova. Ka tataraara, e e ariu mai i ta kotou katoa ra au ara, e auraka kotou kia inga i to kotou au kino ra.
31 E akaruke ke atu i ta kotou au ara katoa ra, i araʼi kotou na; e akangakau ou, e te vaerua ou; eaa oki kotou i inangaro ei ki te mate, e te ngutuare o Iseraela?
32 Kare rava oki oku e mareka anga i te mate o te tangata e mate ra, te tuatua maira te Atu ra ko Iehova: e tenana, e ariu mai, kia ora.