Exodo 15:1-27
15 KUA peʼe iorā Mose e te tamariki a Iseraela i teianei peʼe akatatānga ia Iehova, e kua tuatua akera, na ko akera, E peʼe au ia Iehova, kua teitei roa oki aia; ko te oroenua e tona akaoro, tei uriia e ia ki raro i te tai.
2 Ko Iehova toku maroiroi, e toku peʼe anga, e kua riro aia ei ora noku: koia toku Atua, e koia taku e akapaapaa; ko to toku metua ïa Atua, e koia taku e akateitei.
3 E toā Iehova i te tamaki: ko Iehova tona ingoa.
4 Te au kariota o Pharao e tona ra nuku, kua uriia e ia ki raro i te tai: e te au rangatira ikiia nona ra, kua maremoia i te Tai Muramura.
5 Kua tapokiia ratou e te moana; e topa iora ratou ki raro roa i te takere mei te toka ra.
6 Kua kakā, e Iehova, to rima katau i te mana; na to rima katau, e Iehova, i akaparuparu i te enemi.
7 Kua uritumuia e koe tei māro mai ia koe, i te maata o toou ra mana; kua tuku atura koe i toou riri, pou iora ratou mei te teita ra.
8 Teitei akera te tai ki runga, i te matangi ra o toou ra riri, tu ua akera te kâre ki runga mei te utua toka ra, toka akera te ngaru ruarua i rotopu i te moana ra.
9 Kua tuatua iora te enemi, Ka aru ïa au, e rokoia atu e au, ka tua au i te apinga; ka maa roa toku anoano nei ia ratou; ka unui au i taku koke, na toku rima ratou e akapou:
10 Pupui iora koe i toou aʼo, kua tapokiia iora ratou e te tai; mei te toka tapou ra, to ratou topa anga i te moana maata ra.
11 Koai to te au atua e arite kia koe, e Iehova? koai tei arite kia koe, ko tei kakā i te tapu ra, e te mataku roaia kia akameitakiia ra, e te rave i te mea taka ke ra?
12 Kua akatika iora koe i toou rima katau, e apukuia iora ratou e te enua nei.
13 E arataki rai koe i te au tangata nei ma to takinga meitaki, i tei akaoraia e koe ra; e arataki rai koe ia ratou ki toou ra nooanga tapu i to ririnui.
14 Ka rongo te tangata, e ka rutetetete; ka rokoia to Philisetia e te mamae.
15 Ka rokoia te ui mataiapo o Edoma e te tumatetenga; e te aronga mana o Moabi, ka rokoia ïa e te koiriria; e ka raungara to Kanaana ravarai ra.
16 Ka rokoia ïa ratou e te ngarangara e te mataku; e no to mana maata ra ka tu a toka ïa ratou i te muteki ua anga; e kia tae roa atu toou au tangata, e Iehova, kia tae roa atu te au tangata i okoia e koe ra.
17 Ko ratou taau e apai ki roto, e naau ratou e akamou i te maunga i nooia e koe ra, i te ngai i akonoia e koe, e Iehova, ei nooanga noou ra, i te ngai-tapu, e te Atu, ta toou rima i akamou ra.
18 Ei ia Iehova te au te tuatau e tuatau ua atu.
19 Kua aere katoa oki te oroenua a Pharao, e te au kariota, e te aronga akaoro oroenua katoa ra ki raro i te tai; e kua akaoki a Iehova i te tai ki rungao ia ratou; kareka te tamariki a Iseraela ra, kua aere ua ïa na rotopu i taua tai ra na runga i te one marō.
20 Kua rave iorā Miriama peroveta vaine, e tuaine no Aarona, i te tophe i tona rima; e kua aru maira te vaine tini ravarai iaia ki vao ma te tophe e te mehula.
21 E kua pange atura ta Miriama i ta ratou akatatānga, E peʼe kotou ia Iehova, kua teitei rava oki aia; ko te oroenua e tona akaoro, tei uriia e ia ki raro i te tai.
22 Kua arataki mairā Mose i to Iseraela mei te Tai Muramura mai, e kua aere maira ratou ki te medebara ra ki Sura; e po toru ratou i te aere ua anga i taua medebara ra, e kare rava e vai i rauka.
23 Tae akera oki ratou ki Mara, kare akera i tika ia ratou kia inu i to Mara vai, no te mea te maramara ra; i tapaiaʼi tona ingoa ra ia Mara.
24 Kua urutoe iora taua au tangata ra ia Mose, kua tuatua akera, Eaa ra ta matou kia inu?
25 Kua aue iora aia kia Iehova; e kua akakite mairā Iehova kiaia i tetai rakau, e kia titiriia e ia te reira ki raro i te vai, mangaro atura taua vai ra. I ko nei tana tuku anga mai i te peu e te akonoanga na ratou, e i ko nei tana timata anga ia ratou,
26 Kua tuatua maira, Kia akarongo tikai koe i te reo o to Atua ra ko Iehova, e kia rave i te mea e tika iaia ra, e kia akarongo i tana au akauenga, e kia akono i tana ra au akonoanga katoa, kare roa au e tuku ua atu i tetai i taua au maki ra ki runga ia koe, taku i tuku i rungao o to Aiphiti ra; ko Iehova oki au, ko toou ïa rapakau.
27 E kua aere maira ratou ki Elima, okotai ngauru o reira punavai e rua ara, e itu ngauru oki nu tamara: kua puakapa iora ratou i reira i vaitata i taua au vai ra.