Exodo 12:1-51
12 KUA tuatua mairā Iehova kia Mose raua ko Aarona i taua enua ra i Aiphiti, na ko maira,
2 Ko teianei marama ko te marama mua ïa ia kotou; ko te akamataanga ïa o te au marama i te mataiti ia kotou.
3 E karanga atu korua ki te uipaanga ngati Iseraela katoa ra, na ko atu, Kia tae ki te ngauru o te po i teianei marama, e rave te tangata katoa, te aronga ngutuare ra, i tetai punua mamoe, okotai ngutuare okotai punua mamoe:
4 E e iti te ngutuare ra kia rave i taua punua mamoe ra, e kapiti katoa atu aia ki tona tangata tupu i vaitata i tona are; e tau ei i te maata o te tangata: e tatau marie kotou i te tangata kia tau, e pou ei taua punua mamoe ra kia kai.
5 E punua mamoe kino koe ta kotou, ei toa mataiti okotai ra: no roto i te au mamoe, e kare ra, no te au puakanio, kia rave kotou:
6 E ere marie kotou i te reira e kia tae ki te ngauru ma a o te po i teianei marama: e na te maata katoa o te uipaanga ngati Iseraela e ko i te aiai ra.
7 E ka rave ratou i te toto, ka pîpî ei i nga kopa ngutupa, e te uri i rungao i te au are, ta ratou e kai i taua punua mamoe ra.
8 Ei taua po rai ratou e kai ei i te kiko, ei mea tunu pakaia ki te ai, ma te areto akaopue kore ra: e te rakau rikiriki maramara ka kai ei ratou.
9 Auraka roa kia kai ota, eiaa kia tunuia i te vai, kia tunu pakaia ra ki te ai; te punua mamoe katoatoa, te mimiti e nga vaevae ravarai ra.
10 Auraka rava e akatoeia no te popongi; e kia toe uaorai tetai papaki kia popongi ake, e taʼu kotou i te reira ki te ai.
11 E akapera oki ta kotou kai anga ra; kia tatuaia to kotou taukupu, ma te tamaka ki runga i to kotou vaevae, e to kotou tokotoko i roto i to kotou rima; e kai rapurapu oki: e pasa ïa na Iehova.
12 Ei taua po nei oki au e aere ei na rotopu i te enua nei ko Aiphiti, e ka taia e au te tama mua o te enua o Aiphiti, ta te tangata e ta te puaka katoa; e ka tutaki atu au i te au atua katoa o Aiphiti nei i te utunga: ko au, ko Iehova.
13 E ka riro te toto i runga i te au are e nooia e kotou, ei akairo na kotou: e kia akara au i taua toto ra, e na runga ua au ia kotou, kare rava oki e makiia i roto ia kotou e mate ei kotou, kia ta au i te enua nei ia Aiphiti.
14 E ka riro taua rā nei ei manakoanga na kotou; e ka akono kotou i te reira ei rā oroa na Iehova, e ope roa ake to kotou au uki ra: ei oroa ta kotou i te reira rā ei akonoanga tamou ïa.
15 Kia po itu kotou i te kainga i te areto akaopue koreia; ei te rā mua kotou ka akaruke ei i te opue i roto i to kotou au are: ko te kai oki i te areto akaopueia ra, mei te rā muatangana e tae ua atu ki te rā itu ra, e tipu keia ïa tangata ia Iseraela nei.
16 Ei uruoaanga tapu ta katou i te rā mua ra, e ei uruoaanga tapu ta kotou i te rā itu ra; auraka roa ei angaanga e raveia i reira, mari ra ko te kai ei kai anga na te tangata ra, ko te reira anake ra te tika kia raveia e kotou.
17 E ka akono oki kotou i te oroa areto akaopue koreia ra; no te mea ko te rā ïa i arataki mai ei au i to kotou au nuku, mei te enua maira mei Aiphiti: e tenana, ka akono ïa kotou i te reira rā, e ope roa ake to kotou au uki ra, ei akonoanga tamou ïa.
18 Ei te marama mua ra, ei te rā okotai ngauru ma a o taua marama ra i te aiai, ka kai ei kotou i te areto akaopue koreia ra, e tae ua atu kite rā e rua ngauru ma tai o taua marama ra, i te aiai ra.
19 Auraka roa ei akaopue e kitea i roto i to kotou au are e kia po itu ake; ko te kai oki i te mea i akaopueia ra, ka tipu keia ïa tangata i te uipaanga Iseraela ra, i te tangata ke, e te tangata i anau i taua enua ra.
20 Auraka roa kotou e kai i te mea akaopueia; ei areto akaopue koreia ta kotou e kai i to kotou au nooanga ravarai ra.
21 Kua tiki aturā Mose i te aronga pakari katoa o Iseraela, e kua karanga atura kia ratou, Ka iki ana kotou, ka rave ei i ta kotou punua mamoe kia tau ki to kotou na au kopu-tangata, ka ko ei i te pasa.
22 E ka rave kotou i tetai ruru isopa, ka tutou ei ki roto i te toto i roto i te kapu ra, ka tataʼi i te uri i rungao ra, e nga kopa, ki taua toto i roto i te kapu ra; e auraka roa tetai o kotou e tomo ki vao i tona ngutupa are e ao ua ake.
23 Te aere nei oki a Iehova na roto e teianei enua, e ta i to Aiphiti nei; e kia akara mai aia i taua toto nei ki runga i te uri, e ki runga i nga kopa ra, ka aere ua ïa Iehova na rungao i te reira ngutupa, e kare rava ïa e tuku mai i te akamate ki roto i to kotou au are, e ta ia kotou.
24 E ka akono rai kotou i taua peu nei, ei akonoanga tamou na kotou, e ta kotou au tamariki.
25 E kia tae kotou ki te enua ta Iehova e oronga mai no kotou, i tana oki i tuatua maira, e akono kotou i taua ravenga nei i reira.
26 E kia ui mai ta kotou au tamariki kia kotou e, Eaa teianei ravenga na kotou?
27 Ei reira kotou e karanga atu ei e, E atinga pasa teia na Iehova, ko tei aere ua na rungao i te au are o te tamariki a Iseraela i Aiphiti ra, ka ta ai aia i to Aiphiti, akaora iora aia i to tatou au are i reira. Tupou iora te au tangata ki raro ma te akamori.
28 E aere atura te tamariki a Iseraela, rave atura i ta Iehova i tuatua mai kia Mose raua ko Aarona ra; pera atura ratou.
29 E tae akera ki te turuaipo, kua tā Iehova i te au tama mua katoa i te enua ra i Aiphiti, mei te tama mua a Pharao i noo ki runga i tona terono, e tae ua atura ki te tama mua a te tuikaa i roto i te are tapekaanga ra; e te anaunga mua katoa o te au puaka ra.
30 Kua tu akerā Pharao ki runga i taua po ra, koia, ma tona au tavini ravarai, e to Aiphiti katoatoa ra; e aue maata iora tei Aiphiti; kare rava oki e are i kore ei te tangata mate.
31 Kua tiki atura aia ia Mose raua ko Aarona i te po, kua karanga atura, Ka tu, ka aere ke korua i toku au tangata, korua katoa ma te au tamariki a Iseraela; e aere, e akamori ia Iehova, i ta korua i tuatua maira.
32 E apai katoa oki ta kotou au mamoe, e ta kotou au puakatoro, i ta korua i tuatua maira, e e aere; e akaora mairai korua iaku.
33 Kua raurau maira to Aiphiti, kia tuku vaveia taua aronga i reira ra, kia akaruke mai i taua enua ra; kua tuatua akera oki ratou e, Kua pou takiri tatou i te mate.
34 Kua rave iora to Iseraela i ta ratou faraoa oi, kare i akaopueia, i vaîia ta ratou au oinga kai i roto i to ratou kakau, tuku akera ki runga i to ratou pakuivi.
35 Kua akono oki te tamariki a Iseraela i ta Mose i tuatua mai kia ratou ra. I pati ana oki ratou i to Aiphiti i te apinga ario, e te apinga auro ra, e te kakau:
36 E i aroaia mai oki taua au tangata ra e to Aiphiti ia Iehova ra, i oronga mai ei ratou i ta ratou i pati ra. Pou iora to Aiphiti ia ratou.
37 Kua aere iora te tamariki a Iseraela mei Ramese ki Sukota; kua ono anere paa tausani i te tane aere ua, e te tamariki varevare oki.
38 E te tangata ke ke katoa e manganui i te iro katoa anga i to ratou aerenga; ma te mamoe, e te puakatoro, e au puaka e manganui ua atu.
39 Kua tuku iora ratou i te areto akaopue koreia, i te faraoa oi ta ratou i apai mai mei Aiphiti maira, kare oki i akaopueia; no te mea kua tuaru mai to Aiphiti ia ratou, kare akera i tika ia ratou kia tavare, kare oki ratou i roi kai na ratou uaorai.
40 E to te tamariki a Iseraela noo anga i Aiphiti, ka noo ei ratou ra, e a ïa anere i te mataiti e toru ngauru ara.
41 E ope akera taua au mataiti ra e a anere e toru ngauru, i taua rā tikai ra, ko te aere anga ïa o to Iehova au nuku katoa mei taua enua maira mei Aiphiti.
42 Ko taua po ra teia, e tika kia akono meitakiia no Iehova, iaia i arataki mai ia ratou mei te enua maira mei AphitiAiphiti: ko taua po ra teia e tika kia akono meitakiia e te tamariki katoa a Iseraela no Iehova, e ope roa ake to ratou au uki.
43 Kua tuatua mairā Iehova kia Mose raua ko Aarona, Teia te akonoanga no te pasa nei: Auraka roa te tangata ke e kai i te reira.
44 E te tavini katoa no te tangata i okoia i te moni, kia peritomeia ra aia e koe, e tika iaia kia kai i reira.
45 Ko te tangata i tuitarere ua mai, e te tavini ou uaia ra, auraka katoa ïa e kai.
46 Ei taua are okotai rai kai ei; auraka roa kotou e apai ke i tetai vaʼi ki vao i taua are ra; auraka roa oki tetai ivi kia aatiia e kotou.
47 Ko te uipaanga Iseraela katoa te ka akono i te reira.
48 E te tangata ke kia tuitarere ua i roto ia kotou na, e kia anoano aia i te akono i te pasa a Iehova nei, kia peritomeia te au tane ravarai ki ona ra, ka akavaitata mai ei aia, ka akono ei i te reira; ka riro ïa aia mei te anau tika i taua enua ra i reira: auraka roa ra tetai tangata peritome koreia e kai i te reira.
49 Okotai rai ïa ture no te tangata uenua, e te tangata ke katoa e tuitarere ua i roto ia kotou na.
50 Kua akapera anake iora te tamariki a Iseraela: ta Iehova i tuatua mai kia Mose raua ko Aarona ra, kua pera atu rai ratou.
51 Ei taua rā tikai i arataki mai ei a Iehova i te tamariki a Iseraela ma to ratou au nuku, mei te enua maira mei Aiphiti.