Ephesia 6:1-24
6 E TE au tamariki ra, e akarongo atu i to kotou au metua i tei tau i te Atu ra; e tuatua-tika oki te reira.
2 “E akangateitei i to metua tane e to metua vaine;” (ko te akauenga muatangana ïa i paʼuia i te meitaki i akakiteia mai;)
3 “Kia meitaki koe, e kia akaroaia toou puke rā i te enua nei.”
4 Ko kotou oki te aronga metua, auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.
5 E te au tavini ra, e akarongo atu i to kotou au pu i te kopapa nei, ma te mataku e te kauraro oki, ma te ngakau pikikaa kore, mei ta kotou e akono i te Mesia ra;
6 Auraka ei akarongo mata, mei te tarekareka tangata; mei te tavini ra o te Mesia, i te akono anga i to te Atua ra inangaro ma te tae o te ngakau;
7 I te rave anga i te angaanga tavini ma te anoano, mei te mea e na te Atu, e kare i ta te tangata:
8 Kua kitea e e angaanga meitaki ta tetai tangata i rave, e tutakiia mai ïa e te Atu, ta te tavini e ta te rangatira.
9 E ko kotou oki, e te au pu ra, e pera katoa ia ratou, auraka ei tuatua akamataku: kua kite oki kotou e e pu katoa to kotou tei te ao ra; e kare aia e akono mai i te tu o te tangata nei.
10 E tenana, e aku au taeake, kia maroiroi kotou i te Atu, e i te ririnui o tona mana.
11 E kakau i te rakei katoa a te Atua ra, kia tika ia kotou kia patoi i te ravenga pakari a te diabolo ra.
12 Kare oki te tangata anake ta tatou e kukumi nei, ko te au ariki katoa ra, e te aronga mana, e te au tutara o teianei ao poiri, e te au vaerua kikino i te reva nei.
13 Ka rave ana oki kotou i te rakei katoa a te Atua ra, kia tika ia kotou kia patoi atu i te enemi i te rā kino ra, e kia ope rava te au ravenga ra, kia tu rai
14 Ka tu, ma te tatuaia to kotou taukupu i te tuatua-mou, e ma te tapoki-umauma ra ko te tuatua tika i te kakau anga;
15 E kia akatamakaia to kotou vaevae i te teateamamao o te evangelia o te au ra;
16 E rave oki i te paruru ra i te akarongo, ei runga ravao ïa, ko te mea e mate ei te au tao ai ravarai a te vaerua kino ra.
17 Ka rave katoa i te pare ra i te ora, e te koke a te Vaerua ra, koia te tuatua a te Atua:
18 Ma te pure tukumoe kore, i te au pure ravarai, i te pati a te Vaerua, ma te akamaroiroi e te tamou i te reira, e te pati anga oki no te aronga tapu katoa ra;
19 E noku oki, kia orongaia mai te tuatua iaku, e kia tuatua atu toku vaa ma te mataku kore, kia akakite ua atu au i te tuatua ngaro ra i te evangelia,
20 I riro ei oki au nei ei karere tapekaia; kia tuatua atu oki ma te mataku kore, ko tei tau oki iaku kia tuatua ra.
21 Kia kite ra kotou i te au tuatua noku nei, e taku e rave nei, na te taeake akaperepere na Tukiko, e te orometua pikikaa kore i te Atu nei, e akakite atu kia kotou i te au tuatua katoa.
22 I unga atu ei au iaia kia kotou, kia kite kotou i te au tuatua no matou nei, e kia akapumaana aia i to kotou ngakau.
23 Ei au to te au taeake, e te aroa ma te akarongo, no ko mai i te Atua Metua ra, e te Atu oki ia Iesu Mesia.
24 Kia vai rai te aroa ua i te aronga katoa i inangaro i to tatou Atu ia Iesu Mesia ma te pikikaa kore. Amene.