Apokalupo 21:1-27
21 E KITE atura au i te rangi ou e te enua ou, kua kore oki tei muatangana rangi e tei muatangana enua; e kare rava atura e tai.
2 E kite atura oki au nei ko Ioane i te oire tapu ra, ko Ierusalema ou, i te eke anga mai mei ko mai i te Atua i runga i te rangi, kua akamaneaia mei te vaine i akamaneaia no te akaipoipo anga ki tana tane ra,
3 Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou.
4 E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.
5 Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore.
6 Kua na ko maira oki aia iaku, Kua tupu. Ko au te Alepha e te Omega, te momua e te akaopenga. I te tangata e kaki ra, e oronga ua ia au i te vai ora pupui ua nana.
7 Ko te riro iaia te re ra, nona te au mea ravarai; e e riro au ei Atua nona, e ei tamaiti aia naku.
8 Kareka tei mataku ua ra, e te akarongo kore, e te aronga viivii ra, e te ta tangata, e te akaturi, e te purepure, e te akamori idolo, e te aronga pikikaa katoatoa ra, e tuanga ta ratou tei te roto ai e te teio e ka ua ra: koia te rua o te mate.
9 Kua aere maira tetai o te au angela toko itu i mou i nga kapu e itu i ki i te au mate openga e itu ra, kua tuatua maira iaku, na ko maira, Ka aere mai na i ko nei, e akakite atu au ia koe i te vaine akaipoipo ou ra, i te vaine a te Punua-mamoe ra.
10 Kua arataki atura aia i taku vaerua ki runga i tetai maunga maata e te teitei, kua akakite maira iaku i taua oire maata ra, ia Ierusalema tapu, i te eke anga mai mei te rangi mai mei ko mai i te Atua ra,
11 Ma te kakā no ko mai i te Atua ra: e tona mārama mei to te toka meitaki rava ra, mei te toka iasepe, mei te io i te areare ra;
12 E kua kako i te koro maata e te teitei, okotai ngauru e rua ara ngutupa, e tei aua nga ngutupa ra tino ngauru ma rua angela, e e ingoa anake oki tei tataia ki rungao, no te au kopu o te au tamariki a Iseraela tino ngauru e rua ara;
13 Tei te pae i te itinga o te rā ra, e toru ïa ngutupa; tei te pae i apatonga ra, e toru ïa ngutupa; tei te pae i apatokerau, e toru ïa ngutupa; tei te pae i te opunga o te rā ra, e toru ïa ngutupa.
14 Raungauru ma rua tumu to te koro o taua oire ra, ma te ingoa o te au Aposetolo a te Punua-mamoe tino ngauru ma rua ki rungao.
15 E e arite auro tona to tei tuatua mai kiaku, ei arite i taua oire ra, e te au ngutupa ra, e te koro.
16 E a aro to taua oire ra, kua arite te tipoto e te tiroa: kua arite iora aia i taua oire ra ki te arite, okotai ngauru ma rua tausani i te setadia. Ko te tipoto e te tiroa e te teitei, okotai rai ïa tu.
17 E ariteia iora te koro, okotai anere e a ngauru ma a kubiti, i te arite a te tangata nei, koia ta te angela.
18 E taua koro ra, e iasepe ïa, e te oire ra, e auro tamāia ïa mei te io mārama ra.
19 E kua akamaneaia te au tumu o te koro i taua oire ra i te au toka memeitaki katoa ra. Ko te tumu mua ra, e iasepe ïa; te rua ra, e saphiro ïa; te toru ra, e kaledoni ïa; te a ra, e emeradino ïa;
20 Te rima ra, e saridoni ïa; te ono ra, e saradio ïa; te itu ra, e kerusalito ïa; te varu ra, e berulo ïa; te iva ra, e topazi ïa; te ngauru ra, e kerusopara ïa; te ngauru ma tai ra, e uakini ïa; te ngauru ma rua ra, e ametusi ïa;
21 E nga pa raungauru ma rua, e poe anake ïa raungauru ma rua ïa, taki tai rava poe i te pa okotai e ope rava ake taua au pa ra; e te arataa o taua oire ra, e auro tamāia ïa, mei te io mārama ra.
22 E kare rava e nao i kitea e au i roto; ko te Atu ra oki ko te Atua mana katoatoa ra, e ko te Punua-mamoe, ko tona ïa nao.
23 E kare oki e tau i te reira oire te rā, e te marama, ei akamārama i roto; na te kakā no ko i te Atua ra i akamārama i te reira, ko te Punua-mamoe oki to reira mārama.
24 E e aaere te pa enua i akaoraia ra i roto i tona mārama: e e apai mai te ui ariki o te ao nei i to ratou kakā e te ngateitei ki roto.
25 E kore oki to reira ngutupa e popaniia i te ao: kare rava oki o reira po.
26 E e apai mai te tangata i te kakā e te ngateitei o te pa enua nei ki roto.
27 E kare rava e mea viivii e o ki roto, e tei rave i te tuatua viivii ra, e te pikikaa: ko tei tataia ra i roto i te buka ora a te Punua-mamoe ra, ratou anake ua ra.