Angaanga 8:1-40
8 MAREKA rava aturā Saula koia i taia. Tupu iora te takinga-kino maata i taua tuatau ra i te ekalesia i Ierusalema ra; pueurikiriki ke atura ratou katoa, e pini rava akera Iudea e Samaria ra, mari ra ko te au aposetolo ra.
2 Kua apai atura te au tangata akono i te Atua ia Setephano ki te tanumanga ra, aue rava atura ratou iaia.
3 Karekā Saula, pou atura te ekalesia iaia, i te tomo anga atu ki roto i te au are, e te kika anga i te tane ma te vaine, e te tuku anga atu ki roto i te are tapekaanga ra.
4 Ko taua aronga ra i pueurikiriki ke ra, aere atura e akakite aere i te tuatua e pini rava ake te enua katoa.
5 Aere aturā Philipa ki tetai oire i Samaria, akakite atura kia ratou i te Mesia.
6 E kia akarongo maira ratou, e kite akera oki i te au akairo tana i rave ra, kua rotai marie maira te ngakau o te tangata i te akono anga mai i te tuatua i karangaia atu e Philipa ra.
7 Kua kapiki ua maira oki te au vaerua kino ma te reo maata, e kua aere maira ki vao i te aronga i uruia e manganui ra: e manganui oki te akangoru e te pirikoki i ora.
8 Mareka rava akera to taua oire ra.
9 Ko tetai tangata ra i noo i taua oire ra, ko Simona te ingoa, i purepure ana i muatangana, e te na ko anga atu e, e tangata maata rava atu aia, e va atura te tangata o Samaria iaia.
10 Akono atura ratou katoa iaia, te tangata rikiriki e tae ua atura ki te tangata mamaata, na ko akera, Ko te mana maata o te Atua teianei tangata.
11 Akono atura ratou iaia, no te mea kua roa akera to ratou vavaranga iaia i tana peu purepure.
12 Kia akarongo ra ratou ia Philipa i te tuatua anga i te tuatua meitaki o te basileia o te Atua, e te ingoa oki o Iesu Mesia, bapetizoia iora ratou, te tane ma te vaine katoa oki.
13 E akarongo katoa maira oki a Simona; e kia bapetizoia aia ra, kua piri maira aia kia Philipa; e umere maira aia i te akara anga mai i te au akairo e te au mea umere maata, i raveia ra.
14 E kite akera te au aposetolo e noo i Ierusalema ra e, kua mou to Samaria i te tuatua a te Atua, kua tono atura ia Petero raua ko Ioane kia ratou ra:
15 E tatae atura raua ki raro, kua pure iora kia orongaia mai te Vaerua Tapu kia ratou:
16 Kare rai oki aia i to mai ki rungao i tetai no ratou; ko te bapetizo anake ra to ratou ma te ingoa o te Atu ra o Iesu.
17 Kua tuku atura raua i to raua rima ki rungao ia ratou, rauka iora te Vaerua Tapu ia ratou.
18 E kia akara akerā Simona kia tukuia te rima o aua nga aposetolo ra ki rungao i orongaia mai ei te Vaerua Tapu ra, kua akakite maira aia kia raua i te moni,
19 Na ko maira, E o mai katoa mai i tenana mana noku, kia tuku au i toku rima ki rungao i te tangata ra, kia rauka mai te Vaerua Tapu iaia.
20 Kua karanga aturā Petero kiaia, Kia riro katoa atu taau moni ki te mate e ko koe katoa, ko koe i manako e, e oko na ta te Atua i oronga ua maira ki te moni.
21 Kare rava aau tuanga e te puapinga i teianei tuatua; kare rava i tika toou ngakau ki mua i te aroaro o te Atua ra.
22 E teianei, ka tataraara koe i taua ara naau nei; e ka pure i te Atua, peneiake kia matara taua ara manako ngakau naau na.
23 Te kite nei oki au e, tei roto rai koe i te au kavangu ra, e te tapeka o te kino ra.
24 Kua tuatua mairā Simona, na ko maira, E pure korua i te Atua noku, kia kore au e rokoia i ta korua i tuatua na.
25 Kua akakite atura raua i ta raua tuatua, e kua ako atura i te tuatua a te Atu, e oti akera, oki tika maira ki Ierusalema, i te tuatua aere anga i te evangelia i te au vila katoa o to Samaria e manganui ra.
26 Kua tuatua maira tetai angela a te Atu kia Philipa, na ko maira, Ka tu, e aere tika atu koe ki te pae i apatokerau ra, ki te arataa e aere tika atu ei ki Gaza na Ierusalema mai i te ngai medebara.
27 Tu akera aia ki runga, aere atura: e i na, e eunuka, no Etiopia, e tangata mana ki o Kanedake i te ariki vaine no Etiopia ra, koia te tiaki i te apinga tini nona ra, i aere maira aia ki Ierusalema e akamori i te Atua;
28 E te noo ra ki rungao i tana kariota, te oki ra, e te tatau ra oki i ta Isaia peroveta ra.
29 Kua na ko maira te Vaerua kia Philipa, Ka aere koe e akapiri atu ki te pae i tera ra kariota.
30 Oro aturā Philipa i reira, e akarongo atura iaia i te tatau anga i ta te peroveta ra i ta Isaia, e na ko atura, Te kite na koe i taau e tatau na?
31 Kua tuatua maira aia, Eaa au e kite ei, naringa e tangata te akakite mai kiaku? E kua tuatua maira aia kia Philipa e kake ki runga noo ei raua katoa.
32 Teia taua takiato tuatua i tataia i tatauia e ia ra, “I aratakiia aia mei te mamoe ki te tainga ra, e mei te punua mamoe e muteki ua ki mua i te aroaro o tei pakoti i tona uruuru ra, kare katoa oki tona vaa i tuatua mai:
33 I akakoreia tana tuatua-tau i tona akaaka anga ra, e naai tona uki e akakite? i tipu keia tona ora i te ao nei.”
34 Kua tuatua maira te eunuka kia Philipa, na ko maira, Ka akakite mai ana koe, noai ta te peroveta nei tuatua? nona uaorai ainei? e no tetai tangata ke ainei?
35 Kua tuatua marie atura to Philipa vaa na taua takiato tuatua i tataia ra, e akakite atura i te tuatua no Iesu kiaia.
36 E te aaere ra raua na te arataa, tae atura raua ki tetai vai; kua tuatua maira te eunuka, I na e vai teia, eaa au nei e kore ei e bapetizoia?
37 Kua karanga aturā Philipa, Kua akarongo koe ma to ngakau katoa, e tika ïa. Kua tuatua maira aia, na ko maira, Kua akarongo au e, ko Iesu Mesia, ko te Tamaiti na te Atua ïa.
38 Kua akaue atura aia ki taua kariota ra kia noo; eeke atura raua ki raro i te vai, ko Philipa e te eunuka katoa ra; e bapetizo atura aia iaia.
39 E tae maira raua ki runga mei raro mai i taua vai ra, kua rave maira te Vaerua o te Atu ia Philipa, kare atura te eunuka i kite akaou atu iaia: e aere atura aia i tona aerenga ma te rekareka.
40 E kitea aturā Philipa i Azoto: aere atura aia na roto i te au oire katoa i te ako aere anga, e tae rava atura aia ki Kaisarea.