Angaanga 7:1-60
7 KUA tuatua maira te taunga maata ra, Koia tika ainei te reira?
2 Kua karanga atura aia, E tāma, e te au taeake, e te aronga metua nei, ka akarongo mai ana; Kua akakite mai te Atua kakā kia Aberahama ki to tatou metua ka noo ei aia i Mesopotamia ra, ou aia i noo ei i Harana,
3 Kua na ko maira kiaia, “E aere ke mai koe i to enua e toou kopu-tangata, e aere mai koe ki te enua taku e akakite atu kia koe.”
4 Kua aere maira aia mei te enua mai o Kaledea, e noo iora i Harana: e mate atura tona metua, mei reira oki, kua arataki maira te Atua iaia ki teianei enua e nooia e kotou nei;
5 Kare ra aia i oronga ua atu i tetai pae kainga ipukarea nona i taua enua nei, e mei tona tapuae te maata: kua tuatua maira aia e oronga mai nona, e no tona uanga a muri ake, kare rai ana tamaiti i reira.
6 Kua na ko maira te Atua kiaia e, e tuitarere tona uanga i te enua ke; e ka ope i te akaaoia e ratou, e ka takinga-kino mai oki ia ratou, e ka a anere anga mataiti.
7 E kua tuatua mai te Atua, “I taua enua i ao ei ratou ra e, naku ïa e akava atu: oi reira ratou e aere mai ei” ki ko nei e akamori ei iaku.
8 E kua tuku maira aia kiaia i te koreromotu ra i te peritome. E anau akera tana ko Isaaka, peritome iora iaia i te po varu ra; e anau akera ta Isaaka ko Iakoba; e anau akera ta Iakoba ko te au tupuna tino ngauru ma rua ra.
9 E vareae iora te au tupuna ra, oko atura ia Iosepha ki Aiphiti: tei iaia ra te Atua;
10 E kua akaora iaia i tona katoa au mate, e kua oronga mai i te pakari e te meitaki nona i mua i te aroaro o Pharao i te ariki no Aiphiti ra; e nana aia i akariro atu ei tutara i Aiphiti e tona katoa kopu-tangata.
11 E rokoia iora Aiphiti e Kanaana i te onge e te mate maata, e pini rava akera te enua; e kare rava a to tatou ai metua kai i rauka.
12 Kia kite rā Iakoba e, e kai tei Aiphiti, kua tono atura aia i to tatou ai metua i te tono anga muatangana.
13 E tae akera ki te rua, akakite mairā Iosepha ki tona ai tuakana; e i akakiteia oki te kopu-tangata o Iosepha kia Pharao.
14 Kua unga aturā Iosepha i te tangata e tiki i tona metua ia Iakoba, e tona kopu-tangata katoa, e itu ïa ngauru ma rima.
15 Aere aturā Iakoba ki Aiphiti, e mate atura ki reira, e to tatou ai metua katoa ra.
16 E apaiia atura ki Sekema, tukuia atura ki te tanumanga i okoia e Aberahama ki te moni i te au tamariki a Hamora i te metua no Sekema ra.
17 Kia vaitata ra te tuatau ta te Atua i tuatua mai kia Aberahama ma te taputou ra, te rai ra oki taua au tangata ra i Aiphiti;
18 E tupu akera oki tetai ariki ke, kare i kite ia Iosepha.
19 Kimi iora aia i te ravenga pakari i to tatou, e takinga-kino iora i to tatou ai metua, i te akaruke anga i ta ratou tamariki kia mate ratou.
20 I te reira tuatau to Mose anau anga, e purotu maata oki aia, angaiia iora aia i roto i te are o tona metua, e e toru marama:
21 E kia akarukeia aia, kua rave maira te tamaine na Pharao iaia, utuutu atura ei tamaiti nana uaorai.
22 E apiiia iorā Mose i te au tuatua pakari a to Aiphiti; e mana atura aia i tana tuatua e tana ravenga.
23 E tae akera ki te a tikai o te ngauru anga i tona mataiti, maara akera tona ngakau e aere e akara i tona au taeake i te tamariki na Iseraela.
24 E kite atura aia i tetai o ratou i te takinga-kino angaia akatika atura aia, e ta iora i te tangata Aiphiti ei tutaki no tei takinga-kinoia ra.
25 Maara akera aia e kite tona ai taeake e, e ora oki ratou iaia i te Atua: kare ra ratou i kite.
26 E ao akera kua akakite akaou atura aia kia ratou ra, e te kukumi ra oki e toko rua o ratou, kua vavao atura aia ia raua kia ongi, e na ko atura, E tāma, e taeake korua; eaa korua i takinga-kino ei ia korua uaorai?
27 Ko te tangata ra i takinga-kino atu i tona taeake ra, kua opara maira iaia, na ko maira, “Naai koe i akariro ei tutara e ei akava ia matou nei?
28 Ka ta mai koe iaku, mei taau i ta i te Aiphiti i nanai ra?”
29 Oro ke aturā Mose ki Midiana i taua tuatua ra; tuitarere atura i te reira enua, anau akera ana puke tamariki tamaroa i reira toko rua.
30 E ka a akera ngauru anga o te mataiti i ope, kua mama maira te Angela a te Atu kiaia i roto i te ai i tetai pu ngangaere i te medebara i te maunga ra i Sinai.
31 E kia akara aturā Mose, umere atura aia i taua mea ra: e kia akavaitata atura aia ki te pae e akara, kua topa maira te reo o te Atu kiaia ra,
32 Na ko maira, “Ko au te Atua o to ai metua ra, ko te Atua o Aberahama, e te Atua o Isaaka, e te Atua o Iakobo.” Rutetetete iorā Mose, kare akera aia e akara atu i te mataku.
33 Kua tuatua maira te Atu kiaia, “Ka kiriti i to tamaka i to vaevae; ko te ngai oki taau e tu mai ana, e one tapu ïa.”
34 “Kua akara tikai au i te mate o toku iti-tangata i Aiphiti; e kua akarongo au i to ratou ngunguru anga: i aere mai nei au ki raro nei e akaora ia ratou. E aere mai koe i tenana, ka tono au ia koe ki Aiphiti.”
35 Ko tauā Mose ra ta ratou i opara ra, i te na ko anga maira e, “Naai koe i akariro ei tutara e ei akava?” koia tei tonokia atu e te Atua i te rima o te Angela i mama mai kiaia i roto i te pu ngangaere ra ei tutara e ei akaora.
36 Nana ratou i arataki mai ki vao, e rave atura oki i te akairo e te piri i taua enua ra i Aiphiti, e i te Tai Muramura, e i te medebara oki, ka a ngauru anga te mataiti.
37 Ko taua Mose ra oki tei karanga atu ki te tamariki na Iseraela e, “E akatupu to kotou Atua ko Iehova i tetai peroveta no kotou ei roto i to kotou ai taeake na, mei iaku katoa nei rai te tu; koia ta kotou e akarongo.”
38 Koia katoa oki tei roto i te ekalesia i te medebara ra, koia katoa oki e te angela i tuatua mai kiaia i te maunga i Sinai ra, koia katoa oki e to tatou ai metua: ko te rave atu i te tuatua ora e apai mai na tatou ra:
39 Koia tei kore i akarongoia e to tatou ai metua ra, e opara ke atura ratou iaia, e oki akaou atura oki to ratou ngakau ki Aiphiti,
40 Ka na ko atu ei kia Aarona ra e, “Ka rapa koe i tetai atua ei na mua ia tatou: kareka taua Mose nei i arataki mai ia tatou mei te enua maira mei Aiphiti, kare tatou i kite i tona aerenga.”
41 Kua anga iora ratou i te punua puakatoro i taua au rā ra, e apai atura oki i te atinga ki taua idolo ra, e rekareka atura i ta to ratou uaorai rima i anga ra.
42 Ariu ke atura te Atua, akaruke mai nei ia ratou kia akamori ua na i te nuku o te rangi; koia tei tataia ki roto i te buka a te au peroveta ra e, “E te ngutuare o Iseraela e, i apai mai kotou i te puaka taia naku, e te atinga i te medebara ra, ka a ngauru anga te mataiti ra?
43 Kua apai oki kotou i te puakapa o Moloka, e te etu o to kotou atua ko Rephana, te au tu ta kotou i anga ei akamori anga ra: e teianei ka apai ke atu au ia kotou ki ko atu i Babulonia.”
44 E Are kite oki to to tatou ai metua i te medebara, i akakoroia e ia, ka tuatua mai ei kia Mose ra e, Ka anga koe mei te tu taau i kite ra.
45 Ko ta to tatou ai metua i rave ra, e kua apai maira ratou katoa ko Iosua ki te enua o te etene ta te Atua i tuaru atu i mua i te aroaro o to tatou ai metua ra, e tae rava akenei ki te tuatau ia Davida nei;
46 Ko tei akaperepereia mai ki mua i te aroaro o te Atua ra, inangaro akera kia rauka iaia tetai puakapa no te Atua o Iakoba.
47 Na Solomona ra i akatu i tetai are nona.
48 Kare ra Tei Teitei e noo i te are i angaia e te rima, ta te peroveta i tuatua maira e, “Te na ko mairā Iehova,
49 Ko te rangi toku terono, e ko te enua toku takainga vaevae: eaa te tu o ta kotou are kia akatu noku, e teiea taua ngai akaangaroianga noku ra?
50 Kare ainei na toku rima i anga i te apinga tini ravarai nei?”
51 E te aronga paketaketa nei, e te ngakau e te taringa peritome koreia nei, e patoi ua rai kotou i te Vaerua Tapu; mei to kotou ai metua, koia katoa kotou.
52 Koai to te au peroveta i kore i takinga-kinoia e to kotou ai metua ra? E kua ta ratou i te aronga i akakite mamao mai i te aerenga mai o taua Tangata Tuatua-tika ra; e kua riro io nei kotou ei pikikaa atu iaia, e ei tamate rava oki:
53 Kua tukuia mai oki te ture kia kotou na roto i te tupati angela ra, e kare akenei kotou i akono i te reira.
54 E tei te akarongo anga atu ratou i taua au tuatua ra, motu atura to ratou ngakau i te riri; pakati atura to ratou nio iaia.
55 Kua ki akera aia i te Vaerua Tapu, akara tamou tikai atura ki runga i te rangi, e kite atura i te kakā o te Atua, e ia Iesu i te tu anga i te rima katau o te Atua ra;
56 Kua na ko akera aia, I na, te kite atura au i te rangi i te vetea angaia, e te Tamaiti na te tangata i te tu anga i te rima katau o te Atua ra.
57 Kua tuoa maira to ratou reo, momani iora i to ratou taringa, oro viviki ua atura ratou ravarai ki runga iaia,
58 Turaki atura iaia ki vao i taua oire ra, peî iora iaia ki te toka: e nga tangata kite ra, tuku maira i to ratou kakau ki te pae vaevae o tetai tangata ou ra, ko Saula te ingoa.
59 Kua peî iora ratou ia Setephano ki te toka, te pure ua ra aia, te na ko ra, E te Atu, e Iesu e, ka rave mai koe i toku vaerua.
60 Tuturi iora aia, kua kapiki ua atura ma te reo maata, E te Atu e, auraka teianei ara e io mai kia ratou nei! E tei te akapera anga ra, moe atura aia.