Angaanga 4:1-37
4 E TE tuatua ua ra raua ki te tangata tini ra, tei runga ua maira ia raua te kau taunga, e te rangatira o te iero ra, e te au Sadukea katoa ra.
2 I mainaina ratou, i te mea i apii atu raua i te tangata, e i tuatua oki i te tuakaouanga o tei mate ra ia Iesu.
3 Kua opu maira to ratou rima ia raua, tuku atura ki roto i te are tapekaanga ra e kia ao; kua aiai oki i reira.
4 E manganui ra tei akarongo i taua aronga i akarongo i te tuatua ra, ka rima atura paa tausani i te tangata kia tatau.
5 E ao akera, kua ruru akera to ratou au tutara, e te aronga pakari, e te au tata tuatua, i Ierusalema,
6 E te taunga maata ra ko Ana, e ko Kaiapha, e ko Ioane, e ko Alekanedero, e te kopu-tangata katoa o te taunga maata ra.
7 Tukuia iora e ratou nga aposetolo ra i rotopu, kua ui atura ratou e, Noai te mana, e te ingoa, i tikaʼi teianei i ta korua i rave nei?
8 Ki akerā Petero i te Vaerua Tapu, e kua tuatua maira kia ratou, E tāma, e te ui rangatira o te tangata tini nei, e te aronga pakari o Iseraela nei,
9 Koai oki teia, te akavaia nei maua i teianei rā, i te meitaki i tukuia atu ki te tangata parukaua i te mea i oraʼi aia nei;
10 Kia kite kotou ravarai, e te tangata katoatoa o Iseraela nei e, no te ingoa o Iesu Mesia no Nazareta, ta kotou i akasatauro io nei, ko tei akatuia mai e te Atua mei te mate maira, nona i tu atu ei teianei tangata i mua i to kotou aroaro ma te maki kore nei.
11 “Ko te toka teia i akarukeia e kotou, e te aronga patu are, e kua akariroia io nei ïa ei toka tiavā.”
12 Kare rava oki e ora i tetai ke: kare atu oki e ingoa i akakiteia mai ki te tangata i raro ake i teianei rangi, e oraʼi tatou nei.
13 E kia akara atura ratou kia Petero raua ko Ioane i te mataku kore, e kite akera e, e puke tangata apii koreia raua e te kite kore oki, umere atura ratou, e kite atura oki e, ia Iesu katoa ra oki raua.
14 E kia akara atura oki i te tangata i akaoraia ra i te tu katoa anga ratou, kare atura a ratou tuatua ei patoi anga atu.
15 Kua karanga atura ra kia raua e aere ki vao i taua uruoaanga ra, kua eumiumi ua iora ratou ratou uaorai,
16 Na ko akera, Akapeea atu tatou i eianei puke tangata? e akairo maata tei raveia e raua nei, kua kitea ravaia e to Ierusalema katoatoa nei, kare oki e tika ia tatou kia uuna.
17 Kia kore ra e riro te rongo ki te tangata, e akamataku ua atu tatou ia raua, kia kore raua e tuatua akaou atu ki te tangata ma teianei ingoa.
18 Kua tiki atura ia raua e aere mai ki roto, e kua ako atura ia raua, auraka rava e apii, e auraka rava oki e tuatua ma te ingoa o Iesu.
19 Kua tuatua mairā Petero e Ioane, na ko maira kia ratou, E mea tika i te Atua kia akarongo atu ia kotou auraka te Atua, ka akamaara io ïa kotou.
20 Kare oki matou e tika kia kore e tuatua i ta matou i akara akenei, e ta matou i akarongo akenei.
21 Kua akamataku atu rai oki ratou ia raua, e tuku atura, kare rava i kitea e ratou te mea e tikaʼi kia ta ia raua, no te tangata: te akameitaki anake ra i te Atua i taua mea i raveia ra.
22 Kua topa te a o te ngauru anga i te mataiti o taua tangata i akaora semeioia ra.
23 E kia tukuia atura raua ra, aere atura ki to raua orai au tangata, akakite atura i te au tuatua ravarai ta te kau taunga nunui ra, e te aronga pakari i tuatua mai kia raua ra.
24 E kite akera ratou, akateitei anake atura to ratou reo i te Atua, i te na ko tai anga atu, E te Atu, ko koe te Atua i anga i te rangi e te enua, e te tai, e te apinga tini ravarai i roto ra;
25 Ko tei tuatua mai na roto i te vaa o to tavini ra o Davida e, “Eaa te au etene i oripu uaʼi e te au tangata nei i manako ei i te mea puapinga kore?
26 Te tu ra te ui ariki o te enua nei ki runga, e te kapiti katoa ra te ui rangatira, e māro ia Iehova e tana i akatainu ra.”
27 Kua uipa tika rai ratou, ko Heroda e Ponotio Pilato, e te au etene katoa e te tangata oki no Iseraela, e rave ia Iesu i to Tamaiti tapu taau i akatainu ra,
28 E akatupu i ta to rima e ta to anoano i akono i muatangana e akatupu ra.
29 E teianei, e akara mai koe, e te Atu, i ta ratou nei akamataku anga mai, e akamaroiroi mai i to au tavini kia tuatua ua i taau tuatua ma te mataku kore,
30 I te akatika anga mai i to rima ei akaora; kia tika te akairo e te piri kia raveia i te ingoa o taau Tamaiti tapu o Iesu.
31 E te pure ra ratou, ngaueue iora te ngai i uipaiaʼi ratou; e akakiia maira ratou ravarai i te Vaerua Tapu, kua tuatua ua iora i te tuatua a te Atua ma te mataku kore.
32 E okotai atura ngakau, e okotai oki vaerua, to taua aronga maata ravarai i akarongo ra: kare rava tetai i tuatua i tona apinga e nona anake uaorai, kua kapiti uaia na ratou ravarai.
33 Kua viviki rava atura to te au aposetolo akakite anga atu i te tuakaouanga o te Atu ra o Iesu; e aroa maata oki tei runga ia ratou ravarai.
34 Kare rava tetai o ratou i ngere; e te aronga katoa oki e kainga to ratou e te are, oko atura ïa, e taoi maira i te oko i taua au mea i okoia ra,
35 Tuku iora ki raro i te pae vaevae o te au aposetolo ra; e tuaia iora na ratou ravarai, e tau marie akera.
36 E ko Iose oki, ko tei tuatuaia e te au aposetolo ra e, ko Banaba, (koia Te tamaiti a te ako, kia akatauia ra,) e ngati Levi Kupero,
37 E kainga tona e oko atura, e taoi mairai i te moni, tuku iora ki te pae vaevae o te au aposetolo ra.