Angaanga 28:1-31
28 E ORA anake atura ratou, kite akera ratou e ko Melita te ingoa o taua enua ra.
2 Kua takinga-meitaki maira te au tangata maori ra ia matou; kua taʼu iora i te ai, e arataki atura ia matou ravarai ki reira, no te ua e topa ua maira, e no te anu oki.
3 E koikoi aere iorā Paulo i tetai ruru vaie, e tuku atura ki runga i te ai, kua rere maira tetai vipera no roto i te ai, piri maira ki runga i tona rima.
4 E kia akara maira taua au tangata maori ra i taua mea taae ra i te piri anga mai ki runga i tona rima, kua karanga iora ratou uaorai, E riro tikai teianei tangata i te ta tangata, ora ua mairai aia i te moana, kare aia i akaoraia i te akaoko.
5 Kua ruru atura aia i taua taae ra ki roto i te ai, kare rava aia i mamae.
6 Te tapapa ra ratou i te ee anga, e te inga anga aia ki raro, ka mate rava atu ei i reira; kia tapapa ra ratou e roa akera, kare atura ona maki kia akara mai ratou, manako ke atura to ratou ngakau, kua na ko akera iaia, e atua ïa.
7 Tei reirao te au kainga o te tangata rangatira o taua enua ra, ko Popilio te ingoa; ko tei kite meitaki maira ia matou, e angai maira ia matou i roto i tona are e po toru.
8 Te mate ra te metua o Popilio i te vera e te eke toto, te akāvai ua ra: aere aturā Paulo ki roto kiaia ra, kua pure iora, e tuku atura i tona rima ki rungao iaia, akaora atura.
9 E oti akera te reira, kua aere maira te aronga maki katoa o taua enua ra, e akaoraia iora:
10 E kua akangateitei maata maira ratou ia matou: e kia vaitata matou i te aere, kua akateiaa ratou i te pai ki nga mea e tau.
11 E ka toru akera marama i topa, ano atura matou na runga i tetai pai no Alekanederea, ko te Maanga tamaroa tona akairo, i taua enua ra te vairanga i taua paroro ra.
12 E tae atura matou ki Sirakusa, po toru matou i te noo anga i reira.
13 Mei reira oki kua tapini atura matou e tae atura ki Regio; e po tai akera, arara maira te matangi e marangai, e po rua akera oki, tae atura matou ki Puteoli:
14 E e aronga taeake tei kitea ïa e matou i reira, ko tei tuatua mai ïa kia matou e noo ki o ratou ra, e kia po itu ake; e aere tika atura oki matou ki Roma.
15 E kite akera te au taeake i reira ia matou, kua aere maira ratou ki Apio Foro, e te Are Tapae e Toru ra, aravei maira ia matou; kite akerā Paulo ia ratou, akameitaki atura i te Atua, e maroiroi atura.
16 E tae atura matou ki Roma, kua tuku atura te rangatira anere i te au tangata i tapekaia ra ki te rangatira o te pupu vaeau ra: karekā Paulo kua tuku ua atura aia iaia, kia noo ua aia anake ra, e tetai vaeau ei tapapa iaia.
17 E po toru akera kua karanga aturā Paulo ki te aronga nunui ngati Iuda ra: e putuputu maira ratou, kua karanga atura aia kia ratou, E tāma, e te au taeake nei, i tuku tapeka uaia au i Ierusalema ki te rima o to Roma, kare ra aku ara i to tatou, e te peu a to tatou ai tupuna ra:
18 E oti akera au i te akava uaia, e tukuia ra au e ratou, no te mea kare rava aku ara e tau ei iaku te mate.
19 Kia māro maira te ngati Iuda, kua karanga atura au e, Ei ia Kaisara au; kare ra aku ara kia tapepe atu au i toku enua.
20 I karanga atu ei au kia kotou, kia kite au ia kotou, e kia tuatua atu au kia kotou: no ta Iseraela e tapapa nei oki i tapekaiaʼi au i teianei pirianganaoa.
21 Kua tuatua maira ratou kiaia, Kare a matou leta i rauka no Iudea mai ia koe, kare rava oki te au taeake i tae mai i ko nei i tuatua kino mai ia koe.
22 Te inangaro atu nei ra matou kia kite matou ia koe i toou manako; i tenana pupu, kua akakinoia ïa e kare e ngai toe, kua kite matou.
23 E kia akonoia e ratou tetai rā, kua aere maira ratou e manganui ki tona are; kua apii atura aia ia ratou, e akakite atura i te basileia o te Atua, e ako atura ia ratou i te au tuatua no Iesu i roto i te ture a Mose, e te au peroveta ra, mei te popongi mai e aiai ua atura.
24 Kua akarongo maira tetai pae i taua au tuatua i karangaia ra, e kare tetai pae i akarongo.
25 E kare i tau ta ratou io tuatua, aere atura ratou, kia oti ake ia Paulo teianei reo okotai i te karangaia, E tuatua tika ta te Vaerua Tapu ia Isaia peroveta i to tatou ai tupuna ra,
26 Ka na ko mai ei ra e, “Ka aere atu ki taua aronga ra, ka karanga atu ei e, E akarongo kotou i te akarongo anga, e kare ra e kite; e akara kotou i te akara anga, e kare ra e utoa:
27 Kua patapatatue oki te ngakau o taua aronga ra, kua akarongo ngata to ratou taringa, kua topiri ratou i to ratou mata; ko te akara aea to ratou mata, ko te akarongo aea to ratou taringa, ko te kite aea to ratou ngakau, ko te ariu mai aea, e ko te akaoraia aea ratou e au.”
28 E teianei kua akauia te ora a te Atua nei ki te etene, e ka akarongo mai ïa ratou, kia kite oki kotou.
29 E oti akera teianei tuatua i te karangaia e ia, aere atura te ngati Iuda, ma te tauetono maata ratou ratou uaorai.
30 Noo aturā Paulo e rua akera mataiti ki roto i tona uaorai are ouia, e āriki maira i te tangata ravarai e aere atu kiaia ra,
31 Tuatua maira i te basileia o te Atua, e apii maira i te au tuatua o te Atu ra o Iesu Mesia ma te mataku kore, e kare rava e tangata i akakore atu.