Angaanga 16:1-40
16 TAE atura oki aia ki Derebe e Lusetera; e i na, tei reira tetai pipi, ko Timoteo te ingoa, (e tamaiti na tetai vaine ngati Iuda akarongo, kareka tona metua tane, e Eleni ïa:)
2 E tangata rongo meitaki oki aia i te au taeake i Lusetera e Ikonio.
3 Inangaro aturā Paulo iaia e aere katoa raua; e kua rave atura iaia, peritome iora, no te ngati Iuda i noo i reirao: kua kite katoa oki ratou i tona metua tane, e Eleni ïa.
4 Te aere atura ratou na roto i te au oire ra, kua tuku atura ratou i tei akatauia e te au aposetolo e te aronga orometua i Ierusalema, ei akono anga na ratou.
5 Tinamou atura te au ekalesia i te akarongo anga i te tuatua, tupu atura i te maata anga, kare e rā i tivata.
6 E kia pini akera ia ratou Pherigia, e te enua ra o Galatia, tāpuia iora e te Vaerua Tapu, auraka e tuatua aere i te tuatua i Asia,
7 E tae atura ratou ki Musia, timata atura ratou i te aere ki Bitunia: kare ra ratou i tukuia e te Vaerua.
8 Na Musia atura ratou i te aere, e tae atura ki raro ki Teroa.
9 Kitea maira tetai orama e Paulo i te po; kua tu maira tetai tangata no Makedonia, kua tuatua maira kiaia, na ko maira, Ka ano mai ki Makedonia nei, e tupae mai ia matou.
10 Kite akera aia i taua orama ra, kua akonokono iora matou e ano ki Makedonia; i manako tikai oki matou e, te tuatua maira te Atu kia matou e aere e ako atu i te evangelia kia ratou.
11 Tuku atura matou mei Teroa atu, ano tika atura ki Samoterakia, e ao akera, riro atura ki Neapoli:
12 Mei reira oki, riro atura ki Philipi; ko te oire maata ïa i tei reira pae i Makedonia, e kolone oki: noo atura matou i etai puke rā i taua oire ra.
13 E tae akera ki te rā sabati, aere atura matou ki vao i taua oire ra i te pae vai, tei reira tetai ngai akonoia ei pure anga; noo iora matou ki raro, kua ako atura i te au vaine i putuputu mai i reira.
14 E te akarongo maira tetai vaine akamori Atua ko Ludia te ingoa, e oko kakau muramura, no te oire ra o Tuatira: e akamaoraoraia iora tona ngakau e te Atu, kia akono aia i te tuatua i tuatuaia e Paulo ra.
15 E oti akera aia i te bapetizoia, e tona kopu-tangata katoa, kua tauoaoa maira ia matou, na ko maira, Te tuatua na kotou e, e tuatua-mou taku i te Atu, ka aere mai ki roto i toku are nei noo ei. Manono roa maira aia ia matou.
16 E te aere atura matou ki te pure anga, kua aravei maira ia matou tetai vaine demoni purepure, e apinga maata ta tona au pu i rauka iaia i te purepure:
17 Ko tei aru aere mai ïa ia Paulo, e ia matou katoa, kapiki uaʼi e, E tavini anake teianei au tangata no te Atua Teitei, ko tei akakite mai ïa kia kotou i te ara ora.
18 I pera aia e manganui te rā. E ongoongo rava akerā Paulo, kua ariu atura, na ko atura ki taua vaerua ra, Te akaue atu nei au ia koe e aere koe ki vao i tenana vaine i te ingoa o Iesu Mesia ra. Aere atura aia ki vao i taua ora ra.
19 Kite akera ra tona au pu e, kare atura o ratou manakoanga e raukaʼi te apinga, opu atura ratou ia Paulo e ia Sila, kika atura ki te au tutara i te okoanga ra.
20 E kia kaveia raua ki te aronga akava ra, kua tuatua atura ratou, Ko nga tangata teia i taoriori kino i to tatou nei oire, e ngati Iuda oki raua;
21 E te apii nei i te tuatua kare e tau i te ture kia āriki tatou, e kia akono, no Roma oki tatou.
22 Kua tu katoatoa akera taua aronga maata ra e rave ia raua, kua aeae atura te aronga akava i to raua kakau, kua akaue atura e pāpā ia raua.
23 E manganui akera to raua pāpā angaia e ratou, kua uri atura ratou ia raua ki roto i te are tapekaanga ra, poroaki atura i te tiaki e tāpu meitaki ia raua:
24 No te mea i peraia mai aia i te poroaki anga, kua opara atura ia raua ki roto rava i te are tapekaanga ra, e tamou atura i to raua vaevae ki roto i te patiti.
25 E turuaipo akera, kua pure iorā Paulo raua ko Sila, imene atura ma te akameitaki i te Atua: te akarongo maira te au tangata i tapekaia ra ia raua.
26 E kare akera i mamia e ngaueue maata iora to te enua, i keu katoa atura te tango o taua are tapekaanga ra: amama ua iora te au pa katoa i reira, matara akera te auri pirianganaoa o te tangata katoa ra.
27 Itirere akera te moe a te tiaki i te are tapekaanga ra, e akara akera i te au pa o te are tapekaanga kua ope i te kiritiia, unui akera aia i tana koke e ko iaia uaorai, tuatua akera, kua ora te au tangata i tapekaia ra.
28 Kua kapiki mairā Paulo, akateitei maira te reo, Auraka e toetoea ia koe uaorai: teia anake oki matou.
29 Kua karanga atura aia i tetai turama, oro viviki ua atura ki roto, akatopa iora ki raro ki mua ia Paulo raua ko Sila, ma te rutetetete;
30 Kua arataki maira ia raua ki vao, kua na ko atura, E tāma e, eaa au e oraʼi au?
31 Kua tuatua maira raua, E akarongo i te Atu ia Iesu Mesia, ka ora ïa koe e to kopu-tangata katoa.
32 Kua tuatua maira raua kiaia, e te aronga katoa i roto i tona are, i te tuatua a te Atu.
33 Kua rave akera aia ia raua i taua ora i te po ra, kua orei atura i to raua karavarava pāpāia ra: e bapetizoia iora aia e tona katoa ra i reira.
34 E aratakiia atura raua e ia ki roto i tona are, akanoonoo akera aia i te kaingakai i mua i to raua aroaro, rekareka rava atura aia, e tona ngutuare katoa, ma te akarongo i te Atua.
35 E ao akera, kua tono maira te au akava i te aronga pāpā, na ko maira, Tuku atu nga tangata ra.
36 Kua tuatua maira te tiaki i taua are tapekaanga ra kia Paulo i taua tuatua ra e, Kua tono mai te aronga akava i te veka e tuku ia korua; e teianei ka aere, kia ora korua i te aerenga.
37 Kua karanga atura rā Paulo kia ratou, Kua pāpā atea ua ratou ia maua i te tangata no Roma nei, kare oki i akaapaia, e kua opara ia maua ki roto i te are tapekaanga; e tenana te turaki poiri ua nei ratou ia maua ki vao? Auraka rava ïa; na ratou uaorai e tiki mai ia maua e tuku ki vao.
38 Kua akakite atura te aronga pāpā i taua tuatua ra ki te au akava ra: e kite akera ratou e, no Roma raua, mataku iora ratou.
39 Kua aere maira ratou, kua tuatua meitaki maira kia raua, arataki atura ki vao, tuatua maira kia raua e aere ki vao i taua oire ra.
40 Kua akaruke maira raua i taua are tapekaanga ra, tomo atura ki roto i te are o Ludia; e kite akera raua i te au taeake, ako atura raua ia ratou, e riro atura.