2 Timoteo 3:1-17
3 KA tupu te kino maata i taua tuatau openga ra, kia kite mai koe.
2 E riro te tangata nei ei akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore ki te metua, ei mareka kore, ei viivii,
3 Ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra,
4 Ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua;
5 E tutu akono i te Atua to ratou, kareka te mana ra, kua akakore ratou i te reira: e ariu ke koe i taua aronga ra.
6 Koia te aronga i akao ua ki roto i te au are, e riro atura ia ratou te aronga vaine kite kore ra, i kako i te ara ra, kika keia e e anoano tika kore ra,
7 Te tamou ua ra oki i te apii, kare rava ra i rauka te kite i te tuatua-mou.
8 Mei ta Iane raua ko Iamebera i patoi ia Mose ra, e pera katoa ratou i te patoi anga i te tuatua-mou: e aronga ngakau kino, e te tau koreia mai i te akonoanga i te tuatua nei.
9 Kare ra ratou e roa: e kitea katoatoaia to ratou manako kore, mei to raua katoa i kitea ra.
10 Kua kite ua ra koe i taku i apii ra, taku aerenga, taku e umuumu, te akarongo tikai, te maru, te aroa, te akakoromaki,
11 Te au takinga-kino angaia mai, e te au mate, ka rokoia mai ei au i Anetioka, i Ikonio, e i Lusetera; i te tu o taua au takinga-kino i akakoromakiia e au ra: i akaoraia ra au e te Atu i taua au mate ravarai ra.
12 E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.
13 Ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.
14 Kia mou marie ra koe i taau i apii ra, i tei tukuia atu ia koe ra, kua kite oki koe i toou kite i kite ei koe ra;
15 E mei to tamariki anga mairai toou kite i te tuatua tapu i tataia ra, ko te tuatua ïa i pakari ei koe e tae ua atu ki te ora i te akarongo i te Mesia ra ia Iesu.
16 Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.
17 Kia apa kore te tangata o te Atua, ma te tau tikai i te au angaanga memeitaki katoa ra.