2 Paraleipomeno 5:1-14
5 OTI rava akera te au angaanga katoa i te raveia e Solomona, no te are o Iehova: e kua apai mairā Solomona i te au apinga ravarai i akatakaia e tona metua e Davida; e te ario, e te auro, e te au apinga katoa ra, tei tukuia e ia ki roto i te uipaanga apinga no te are o te Atua.
2 Kua akaputuputu mairā Solomona i te aronga pakari i Iseraela, e to rungao i te au kopu ra, e te au mataiapo tutara o te tamariki a Iseraela, ki Ierusalema, kia apai mai ratou i te aruna koreromotu a Iehova mei roto mai i te oire o Davida, koia oki Ziona.
3 Kua uipa maira te au tangata Iseraela ravarai ki te ariki ra, i te oroa ra, koia te marama itu ra.
4 Kua aere maira te aronga pakari katoa o Iseraela; e kua rave iora te ngati Levi i te aruna.
5 E kua apai maira ratou i te aruna, e te Are uipaanga, ki runga, e te au mea tapu ravarai i roto i taua Are ra, ko tei apai katoaia mai ïa ki runga e te kau taunga te ngati Levi.
6 E te ariki ra oki ko Solomona, e te uipaanga Iseraela katoa i te akakatoatoa anga i reira ki mua i te aruna, te apai ra i te mamoe, e te puakatoro, ei atinga kare e tika kia tatau i te maata.
7 E kua apai maira te kau taunga i te aruna koreromotu a Iehova ki tona ra vairanga, ki te ngai-tuatua i te are ra, ki roto i te ngai-tapu rava, i raro ake i nga peau o nga kerubi ra.
8 Kua oora mai oki nga kerubi i o raua peau na runga i te vairanga aruna, e ngaro oki te aruna e nga amo katoa i nga kerubi.
9 E no te roa o te amo i kitea uaiaʼi te openga i taua aruna ra i mua ake i te ngai-tuatua ra, kare ra e kite i vao; e te vai ua ra i reira e tae rava akenei ki teianei rā.
10 Kare o roto i taua aruna ra mari ra i aua nga papa e rua ra, ta Mose i tuku i reira i Horeba ra, ka papau ei a Iehova i te koreromotu ki te tamariki a Iseraela ka aere mai ei ratou mei Aiphiti maira.
11 E kia riro mai te kau taunga ki vao i taua ngai-tapu ra: kua ope oki te kau taunga i kitea maira i te akatapuia, kare oki ratou i tiaki i te pupu i reira:
12 E te au ngati Levi, te aronga imene, te pupu katoa o Asapha, to Hemana, to Iedutuna, e ta ratou au tamariki e to ratou au taeake, kua kakau ki te orongā meitaki ra, e ma te au sumebalo, e te au nabala, e te au kinura, i te tu ua anga i te pae i te itinga o te rā i te atarau ra, e te kau taunga katoa okotai anere e rua ngauru, ma te au pu i te akatangi anga:
13 Kua kapiti akera te aronga akatangi pu e te aronga imene i te reo okotai, i te akapaapaa anga, e te akameitaki anga ia Iehova: e kia akateitei akera ratou i te reo ma te au pu, e te au sumebalo, e te au mea e akatangiia ra, i te akapaapaa anga ia Iehova, i te na ko anga e, E meitaki oki tona, ka tu oki tona aroa e rimua; kua ki maira taua are ra ki te tumurangi, te are o Iehova;
14 E kare atura te kau taunga e mou i te raverave no taua tumurangi ra: kua ki oki te are o te Atua ki te kakā o Iehova.