1 Tesalonia 5:1-28
5 KAREKA i te atianga e te tuatau, e aku au taeake, auraka ua atu au i tata atu i te tuatua ia kotou i te reira.
2 Kua kite pu oki kotou uaorai e, te aere maira taua rā o te Atu ra mei te keia i te po ra.
3 E tuatua oki te tangata e, e au, e kare e kino; ei reira ratou e rokoia uaia mai ei e te mate viviki, mei te vaine nui kia rokoia e te mamae ra; e kare rava ratou e ora.
4 Kareka kotou, e te au taeake, kare ïa i roto i te poiri, ka rokoia mai ei kotou e taua rā ra mei te keia.
5 E tamariki anake kotou no te mārama, e tamariki no te ao; kare tatou i to te po, e to te poiri.
6 E teianei, auraka tatou e moe, mei tetai papaki ra, kia ara ra, e e akono meitaki.
7 Ko tei moe ra oki, i moe ïa i te po; e te akakona ra, e akakona ïa i te po.
8 Ko tatou ra, ko to te ao ra, ei akono meitaki to tatou, ma te tapoki-umauma ra, ko te akarongo e te inangaro, i te kakau anga; e ma te manako ora ei pare.
9 Kare oki tatou i okonoia e te Atua no te riri, kia rauka ra te ora i to tatou Atu ra ia Iesu Mesia,
10 Ko tei mate no tatou, e te ara ra tatou, ko te reira ïa, e te moe ra tatou, ko te reira ia, kia ora tatou, ei vaitata ua rai iaia.
11 E tenana, e akapumaana kotou tetai ki tetai, e akatupu i te meitaki tetai ki tetai, mei ta kotou rai oki e rave nei.
12 Te ako atu nei matou ia kotou, e te au taeake, e kite atu kotou i te aronga i rave i te angaanga a te Atu ki roto ia kotou na, ko te akakite ki rungao ia kotou i te Atu nei, e te ako atu oki ia kotou;
13 E kia maata rava i te akangateitei ia ratou ma te aroa no ta rotou angaanga. E ei au oki to roto ia kotou uaorai.
14 E te karanga atu nei rai matou kia kotou, e te au taeake, e ako atu kotou i te akono kore, e akapumaana atu i te ngakau taitaia, e tauturu atu i tei apikepike, kia roa te akakoromaki anga i te tangata ravarai.
15 Kia matakite, kia kore rava tetai e tutaki i te kino ki te kino i te tangata ravarai; e kimi marie ra i te meitaki, auraka e tivata, i roto ia kotou uaorai e te tangata katoa ra oki.
16 Auraka e tukutuku i te rekareka.
17 Auraka e tukutuku i te pure.
18 E akameitaki i te Atua i te au mea katoa ra; ko to te Atua ïa anoano i te Mesia nei ia Iesu ia kotou na.
19 Auraka e tinai i te Vaerua ra.
20 Auraka e akono kino atu i te totou anga ra.
21 E akara matariki marie i te au mea katoa ra; e te meitaki ra e tāpu marie.
22 E kopae atu i te au mea tu kino ra.
23 Kia akatapu rava mai te Atua au uaorai ia kotou; e kia tiakiia mai te tangata katoa ra, to kotou vaerua, to kotou ngakau, e te kopapa katoa, ma te ara kore, e tae ua atu i te aere anga mai o to tatou Atu ra o Iesu Mesia.
24 E tuatua-mou tana, ta tei kapiki mai ia kotou, e nana e rave.
25 E aku au taeake ra, e pure ia matou.
26 E aroa atu i te au taeake ravarai i te ongi tapu.
27 Te akataputou atu nei au ia kotou i te Atu ra, kia tatauia teianei leta i te au taeake tapu katoa ra.
28 Ei ia kotou te aroa ua o to tatou Atu ra o Iesu Mesia. Amene.