1 Korinetia 15:1-58
15 E AKAKITE atura au ia kotou, e te au taeake, i te evangelia taku i ako atu kia kotou na, ta kotou i āriki maira, e i mou ei oki kotou na,
2 E e oraʼi oki kotou, kia tāpu marie rai kotou i taku i ako atu kia kotou na, kia kore ra, e riro to kotou akarongo ei puapinga kore.
3 Kua tuku atu oki au ia kotou i muatangana, i tei rauka mai na iaku ra e, i mate te Mesia i ta tatou nei ara, mei tei te tuatua i tataia ra:
4 E i tanumia oki aia, e tu akaou maira i te po toru, mei tei te tuatua i tataia ra:
5 E i kitea aia ia Kepha, e i te ngauru ma rua i muri ake:
6 E muri akera oki, i kitea aia e te au taeake e rima katoa anere e e ara, okotai rai kite anga; te ora ua nei rai te maata o taua aronga ra, kua moe ra tetai papaki.
7 E muri akera oki, kitea iora aia e Iakobo; e i te au aposetolo ravarai i muri ake.
8 E te openga iora, kitea katoa iora iaku, mei te mea e e maemo au.
9 E iti oki au i te au aposetolo ravarai, kare oki au e tau kia karangaia e, e aposetolo, no te mea kua takinga-kino au i te ekalesia a te Atua.
10 Toku nei ra tu e vai nei, no te aroa ua ïa o te Atua; e taua aroa ua nona ra iaku nei, kare ïa i riro ei mea puapinga kore, e angaanga maata ra taku i rave i ta ratou ravarai: kare ra au, ko te aroa ua ra o te Atua iaku nei ra.
11 E teianei ko au ra, ko au ïa, ko ratou ra, ko ratou ïa, ko ta matou ra ïa i ako, e ko ta kotou ra ïa i akarongo.
12 Te tuatua aereia nei te Mesia e, kua tu akaou aia mei te mate maira, eaa i tuatuaʼi tetai aronga o kotou e, Kare e tuakaouanga to tei mate ra?
13 Kare e tuakaouanga to tei mate ra, kare katoa te Mesia i tu ki runga:
14 E kare te Mesia i tu ki runga ra, e puapinga kore ta matou e ako nei, e e puapinga kore katoa to kotou akarongo.
15 Kua riro oki matou ei kite pikikaa na te Atua; no te mea kua karanga matou i te Atua e, kua akatu aia i te Mesia: kare tikai e akatuia tei mate ra, kare ïa aia i akatu iaia.
16 Kare oki e akatuia tei mate ra, kare ïa te Mesia i akatuia:
17 E kare oki te Mesia i akatuia ra, e mea puapinga kore to kotou akarongo; te vai ua na kotou ma ta kotou ara katoa:
18 E te aronga katoa i topa to ratou moe ki roto i te Mesia ra, kua kore ïa i reira.
19 Tei teianei ao anake ra ta tatou e tiaki i te Mesia nei, e kino maata to tatou i to te tangata ravarai nei.
20 Kua tu akaou tikai ra te Mesia mei te mate maira, kua riro ïa ei momua no te aronga i topa te moe ra.
21 Mei te mate oki i rauka i te tangata ra, no te tangata katoa i raukaʼi te tuakaouanga i te aronga i mate ra.
22 Mei te tangata i ope i te mate ia Adamu, e ope katoa i te akaoraia e te Mesia.
23 E akonoia ra te tangata ravarai i tona uaorai pupu; ko te Mesia te momua; e i muri ake, ko to te Mesia ïa, kia mama mai aia ra.
24 Ko te openga iora ïa, ka tuku atu ei aia i te basileia ki te Atua, ki te Metua ra; kia ope rava te aronga au, e te mana, e te maroiroi, i te akakoreia e ia.
25 E iaia oki te au, e kia ope rava te au enemi katoa i te tukuia e ia ki raro ake i ona vaevae.
26 E taua enemi openga ra, ko te mate, e akakoreia ïa.
27 Kua tuku oki aia “i te au mea katoa ki raro ake i ona vaevae.” Ko tana ra i tuatua maira e, Kua tukuia te au mea katoa ki raro ake iaia ra, kua kitea uaia e, te toe ra aia uaorai, ko tei tuku i te au mea katoa ki raro ake iaia ra.
28 E kia tuku tikaia te au mea ravarai ki raro ake iaia ra, ei reira e kitea puiaʼi e, i raro katoa ake te Tamaiti uaorai iaia, i tei tuku i te au mea katoa i raro ake iaia ra; kia riro ko te Atua i rungao i te au mea katoa i te au ngai ravarai.
29 Kare ra, eaa iora tetai aronga i bapetizoiaʼi ei tuā i te aronga i mate ra, kia kore takiri te aronga i mate ra e tu akaou? eaa iora ratou i bapetizoiaʼi ei tuā i tei mate ra?
30 Eaa oki matou i noo uaʼi ki roto i te mate i te au ora katoa nei.
31 E taputou au i toku nei rekareka ia kotou, i rauka iaku i to tatou Atu ia Iesu Mesia ra, te mate nei au i te au rā katoa nei.
32 I kukumi na au i te au puaka taae i Ephesia ra i te peu a te tangata nei, eaa taku puapinga i rauka, kia kore e tu akaou tei mate ra? “e kai tatou, e e inu oki; apopo oki tatou e mate ei.”
33 Auraka e vavare; e kino te tuatua meitaki i te kapiti anga kikino ra.
34 Kia ara e tikaʼi, auraka e rave i te ara; kare oki tetai papaki i kite i te Atua: kia akama kotou i pera atu ei au.
35 Ka riro tetai papaki i te tuatua mai e, E akapeea kia akatu i tei mate ra? e eaa te tu o to ratou kopapa kia tu mai?
36 E tera ra tangata manako kore e! taau e ruru ra, kare ïa e ora, kia kore e mate.
37 E taau oki e ruru ra, kare koe e ruru i te rakau e tupu i muri ake, ko te au anake ïa: mei te sitona ra, e tetai ua ke atu oki:
38 Na te Atua ra i o mai i tona tu, tana i inangaro ra, e taua aronga ua katoa ra, te ua ïa ko tona uaorai tu tikai.
39 Kare oki okotai rai tu kopapa te au kopapa ravarai nei; e kopapa ke to te tangata, e kopapa ke to te puaka, e kopapa ke to te ika, e kopapa ke to te manu.
40 E au kopapa rangi tetai, e e au kopapa enua tetai: e kakā ke ra to te au kopapa rangi, e kakā ke oki to te au kopapa enua nei.
41 E kakā ke to te rā, e kakā ke to te marama, e kakā ke to te au etu: e tu ke oki to tetai etu i to tetai i te kakā.
42 Koia katoa te tuakaouanga o tei mate ra: i ruruia ei mea pe ua, i akatuia ei mea pe kore:
43 I ruruia ma te akaaka, i akatuia ma te kakā: i ruruia ma te paruparu, i akatuia ma te maroiroi:
44 I ruruia ei kopapa tangata, i akatuia ei kopapa vaerua. Te vai ra te kopapa tangata, e te vai ra te kopapa vaerua.
45 Kua oti oki i te tataia e, I angaia te tangata mua ko Adamu ei tangata ora; kareka te Adamu openga, e Vaerua ora ïa.
46 Kare ra i na mua te kopapa vaerua ra, ko te kopapa tangata ra; e muri akera ko te kopapa vaerua ïa.
47 E one te tangata momua, no te enua: kareka te rua o te tangata, ko te Atu ïa no te rangi mai.
48 Ko to te one nei, mei to te one katoa ra ratou; ko to te rangi ra, mei to te rangi katoa ratou.
49 E mei te tu o to te one i vai ki runga ia tatou nei, e riro katoa ki runga ia tatou te tu o to te rangi.
50 Teia ra taku tuatua, e te au taeake, kare te kopapa toto nei e te kiko e noo ki te basileia o te Atua; kare oki te mea pe ua ra e noo ki te ngai pe kore.
51 I na, e akakite atu au kia kotou i te tuatua ngaro; Kare tatou e ope i te moe, e ope ra tatou i te akatu keia,
52 Kare e mamia, mei te kamo anga mata nei, kia tae ki te pu openga ra: e tangi tikai oki te pu, e e akatuia tei mate ma te pe kore, e e akatu keia tatou.
53 E teianei kopapa pe ua, kia riro ei kopapa pe kore e tikaʼi, e teianei kopapa mate ua, kia riro ei kopapa mate kore e tikaʼi.
54 E kua riro anake teianei kopapa pe ua ei kopapa pe kore, e teianei kopapa mate ua ei kopapa mate kore, kua tupu ïa te tuatua tataia ra i reira, “Kua apukuia te mate i te re i riro ra.” “E te mate e, teiea toou tara?
55 E ade e, teiea toou re?”
56 To te mate nei tara, ko te ara ïa; e to te ara nei ririnui, ko te ture ïa.
57 E teianei kia akameitakiia te Atua, ko tei oronga mai i te re no tatou, no to tatou Atu ra, no Iesu Mesia.
58 E teianei, e aku au taeake akaperepere e, kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.