1 Ioane 5:1-21
5 KO tei akarongo e, ko Iesu te Mesia mou, kua akaanauia aia e te Atua: e ko tei anoano i tei akaanau ra, te anoano katoa ra ïa i tei akaanauia e ia ra.
2 Teia te mea i kite ei tatou e te aroa nei tatou i te tamariki a te Atua: kia inangaro tatou i te Atua, e kia akono i tana au akauenga.
3 Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.
4 Ko ta te Atua oki i anau ra, te vi nei teianei ao iaia: teia te mea i vi ei teianei ao, ko to tatou akarongo.
5 Koai te tangata i vi ei teianei ao iaia, mari ra ko tei akarongo e, ko Iesu te Tamaiti a te Atua?
6 Ko tei aere mai ma te vai e te toto, ko te Mesia ra ko Iesu: eiaa ma te vai anake ra, ma te vai ra e te toto;
7 E ko te Vaerua tei akatika mai; e tuatua-mou oki ta te Vaerua.
8 E toru oki e akatika mai, ko te Vaerua, ko te vai, e ko te toto: ko taua toru nei oki, te tau nei i te tuatua okotai.
9 Te āriki nei tatou i ta te tangata nei akatika, e maata atu ïa te akatika a te Atua: teia oki taua akatika a te Atua ra, ko te tuatua no tana Tamaiti tana i akakite maira.
10 Ko tei akarongo i te Tamaiti a te Atua ra, tei roto iaia uaorai te kite: ko tei kore i akarongo i te Atua ra, kua akariro ïa iaia ei pikikaa; koia kare i akarongo i te tuatua no tana Tamaiti ta te Atua i akakite maira.
11 Teia oki taua tuatua ra, kua oronga mai te Atua i te ora mutu kore no tatou, e tei tana Tamaiti oki taua ora nei.
12 Tei iaia te Tamaiti ra, tei iaia katoa taua ora nei: e kare iaia te Tamaiti a te Atua ra, kare katoa iaia taua ora ra.
13 I tata au i teianei tuatua ia kotou i te aronga i akarongo i te ingoa o te Tamaiti a te Atua ra; kia kite kotou e e ora mutu kore to kotou, e kia akarongo rai kotou i te ingoa o te Tamaiti a te Atua.
14 Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou:
15 E te kite nei tatou e te akarongo maira aia ia tatou i te au mea ta tatou i pati atu, kua kite tatou e e rauka ia tatou i ta tatou i pati atu iaia ra.
16 Kia kite tetai tangata i tona taeake i te rave anga i te ara mate kore, e pure aia, e na te Atua e oronga mai i te ora nona no tei rave i te ara mate kore ra. Te vai ra te ara mate rava: kare au i karanga e e pure te tangata i te reira.
17 E ara anake rai te au tuatua-tika kore katoa nei: e te vai nei oki te ara mate kore.
18 Kua kite oki tatou e ko ta te Atua i anau, kare ïa e rave i te ara; ko ta te Atua ra i anau ra, te tiaki ra ïa iaia uaorai, e kare taua vaerua kino ra e rave mai iaia.
19 Kua kite oki tatou e no te Atua tatou, e te vai ua nei rai to te ao ravarai i raro ake i taua vaerua kino ra.
20 Kua kite ra tatou e, kua tae mai te Tamaiti a te Atua, e kua oronga mai i te kite no tatou, kia kite tatou iaia i te Atua mou ra, e tei roto tatou iaia i te tuatua-mou ra, tei roto i tana Tamaiti ra ia Iesu Mesia. Koia te Atua mou, e te ora mutu kore.
21 E aku au tamariki ra, e matakite ia kotou i te au idolo ra. Amene.