1 Ariki 1:1-53
1 KUA ruaine te ariki ra ko Davida, kua maata tona mataiti, e kua tapoki ratou iaia ki te kakau, kare ra aia i maana.
2 Kua karanga atura tona au tavini kiaia i reira, Ei vaine ou ei paretenia te kimi ïa no taku pu no te ariki: e kia tu aia ki mua i te aroaro o te ariki, e e matuapuru aia iaia, e moe oki aia i tona keke, ki maana taku pu te ariki ra.
3 Kua kimi iora ratou i tetai vaine ou manea i te au tapere katoa i o Iseraela, e kitea iora tetai Sunami ko Abisaga, e kua arataki maira iaia ki te ariki.
4 E vaine manea rava taua vaine ou ra, e kua matuapuru mai, e kua raverave i te kai na te ariki: kare ra te ariki i kite atu iaia.
5 Kua akateitei akerā Adonia te tamaiti a Hagita ra, tuatua akera, Ko au te ariki: kua rave akera aia i te au kariota, e te aronga akaoro oroenua, e te au tangata oki e rima ngauru ei oro na mua iaia. Kare rava akenei aia i akaaueia e tona metua, i te tuatua anga atu e, Eaa koe i akaperaʼi?
6 E tangata tu meitaki roa oki aia: i muri ake aia ia Abasaloma i te anau anga.
7 E kua riro tana au tuatua kia Ioaba te tamaiti a Zeruia, e kia Abiatara taunga ra, e kua aru raua, e kua tauturu ia Adonia.
8 Kareka te taunga ra ko Zadoka, e ko Benaia te tamaiti e Iehoiada, e ko Natana peroveta, e ko Simei, e ko Rei, e te aronga toa no ko ia Davida ra, kare ïa i piri kia Adonia ra.
9 Kua ko aturā Adonia ra i te mamoe, e te puakatoro, e te puaka matu ra, i te pae toka i Zoheleta, i vaitata i Eni-rogela, e kua karanga atura ki tona au taeake ravarai, ki te au tamariki a te ariki ra, e to Iuda katoa ra, te au tavini o te ariki ra:
10 Karekā Natana peroveta, e ko Benaia, e te aronga toa, e tona taeake ko Solomona, kare i karangaia atu e ia.
11 Kua karanga aturā Natana ki te metua vaine o Solomona kia Bateseba i reira, na ko atura, Kare koe i kite e, kua ariki a Adonia te tamaiti a Hagita ra, e kare oki to tatou pu ko Davida i kite?
12 E teianei, e aere mai, taku ïa tuatua kia koe, e ako ua atu au ia koe, kia ora oki koe, e kia ora oki to tamaiti ko Solomona.
13 E tu koe e aere ki te ariki ra kia Davida, ka karanga atu ei koe kiaia, Kare aina koe, e taku pu e te ariki, tei taputou mai ki to tavini vaine ra, i te tuatua anga mai e, Ko taau tamaiti tikai ko Solomona te ka riro ei ariki i muri ake iaku ra, e koia te ka noo ki runga i toku nei terono? E teianei, eaā Adonia i ariki ei?
14 I na, te tuatua ua ra koe ki te ariki ra, ko au katoa ïa ka aere ki roto i muringao ia koe ka akarava atu ei i taau tuatua.
15 Aere aturā Bateseba ki roto i te ariki ra ki roto i te pia ra: kua ruaine rava te ariki; te raverave rā Abisaga i Sunami i ta te ariki ra.
16 Kua tupou iorā Bateseba ki raro, kua tatomo atura ki te ariki. Kua tuatua maira te ariki kiaia, Eaa toou anoano?
17 Kua karanga atura aia kiaia, E taku pu e, kua taputou koe i to Atua ra ia Iehova ki to tavini vaine nei, e kua tuatua mai koe e, Ko to tamaiti tikai ko Solomona te ariki i muri ake iaku ra, e koia te ka noo ki runga i toku nei terono.
18 E teianei, i na, ko Adonia te ariki; e kare oki koe i kite, e taku pu e te ariki:
19 E kua ko aia i te puakatoro e te puaka matu, e te mamoe e manganui, e kua tuatua aia i te au tamariki ravarai a te ariki ra, e ia Abiatara taunga ra, e ia Ioaba te rangatira o te nuku ra: kareka ko to tavini ko Solomona, kare ïa i tuatuaia mai.
20 E ko koe, e taku pu e te ariki, tei runga maira te mata o Iseraela katoa ia koe, kia akakite atu koe kia ratou e, koai te ka noo ki runga i te terono o taku pu o te ariki ra i muri ake iaia.
21 Kare ra, kia moe taku pu te ariki ki o tona ai metua ra, ka riro maua ko taku tamaiti ko Solomona i te akaapaia mai i reira.
22 E i na, te karanga ua atura aia ki te ariki ra, ko Natana peroveta tei tomo katoa mai ki roto ra.
23 E kua karanga atura ratou ki te ariki, na ko atura, I na, teia oki a Natana peroveta. E tae maira aia ki roto ki te ariki ra, kua tupou iora aia ki mua i te ariki i raro te mata i te one.
24 Kua karanga aturā Natana, E taku pu e te ariki, kua tuatua aina koe e, Ko Adonia te ariki i muri ake iaku nei, ko te ka noo ïa ki runga i toku nei terono?
25 Kua aere atura oki aia ki raro i teianei rā, e kua ko i te puakatoro, e te puaka matu, e te mamoe e manganui, kua tuatuaia e ia te au tamariki ravarai a te ariki ra, e te au rangatira o te nuku ra, e te taunga ra ko Abiatara; e i na, te kai ra ratou e te inu ra ki mua i tona aroaro, te tuatua ra e, Kia ora te ariki ra ko Adonia.
26 Kareka to tavini nei, ko au, e ko Zadoka taunga, e ko Benaia te tamaiti a Iehoiada, e to tavini ra oki ko Solomona, kare ïa i tikaiia mai e ia.
27 Naau ainei taua tuatua nei, e taku pu e te ariki? e kare oki koe i akakite mai ki to tavini nei, i te ka noo ki runga i te terono o taku pu o te ariki ra i muri ake iaia.
28 Kua tuatua maira te ariki ra ko Davida, na ko atura, E karanga atu ana kia Bateseba e aere mai. Kua aere maira aia ki roto ki mua i te ariki, e kua tu maira ki mua i te aroaro o te ariki ra.
29 Kua taputou iora te ariki, na ko akera, Te ora rā Iehova, ko tei akaora i toku vaerua i te au tumatetenga katoa ra:
30 Mei taku rai oki i taputou atu kia koe i te Atua o Iseraela ko Iehova ra, ka tuatuaʼi au ra e, Ko taau tamaiti tikai ra ko Solomona te ariki i muri ake iaku ra, e koia te ka noo ki runga i toku ra terono ei kauono ake iaku nei; ka akapera tika rai au i teianei rā.
31 Kua tupou iorā Bateseba i raro te mata i te one, tatomo atura ki te ariki, e karanga atura, Kia ora koe, e taku pu e te ariki ra, e Davida, e tuatau ua atu.
32 Kua tuatua maira te ariki ra ko Davida, E karanga atu ana ia Zadoka taunga, e ia Natana peroveta, e ia Benaia te tamaiti a Iehoiada. E kua aere maira ratou ki mua i te aroaro o te ariki.
33 Kua tuatua maira te ariki kia ratou, E arataki katoa kotou i te au tavini o to kotou nei pu, ka akanoo atu ei i taku tamaiti ra ia Solomona ki runga i taku uaorai mule, ka arataki atu ei ki raro ki Gihona:
34 E na Zadoka taunga, e na te peroveta ra na Natana, e akatainu iaia i reira, ei ariki no Iseraela: ka akatangi ei kotou ki te pu, ka tuatuaʼi e, Kia ora te ariki ra ko Solomona.
35 Ka aru katoa mai ei kotou i muri iaia, kia aere mai aia ra, ka noo ei ki runga i toku nei terono; koia oki te ariki ei kauono ake iaku nei: koia tei akonoia e au ra ei tutara ki runga ia Iseraela, e ki runga ia Iuda.
36 Kua karanga aturā Benaia te tamaiti a Iehoiada ra ki te ariki, na ko atura, E tika ïa; kia pera katoa mai oki a Iehova, ko te Atua no taku pu no te ariki ra.
37 E mei ia Iehova i piri mai ki taku pu ki te ariki, kia piri katoa mai aia kia Solomona, e kia akamaataia mai tona terono, i to te terono o taku pu to te ariki ra to Davida.
38 Aere aturā Zadoka taunga, e te peroveta ra ko Natana, e ko Benaia te tamaiti a Iehoiada, e te Kereti, e te Peleti ki raro, e kua akanoo ia Solomona ki runga i te mule a te ariki ra a Davida, e kua arataki iaia ki Gihona.
39 Kua rave akerā Zadoka taunga i tetai nio manongi no roto i te Are, e kua akatainu atura ia Solomona. Kua akatangi iora ratou i te pu; e kua karanga atura te au tangata katoa, Kia ora te ariki ra ko Solomona.
40 Kua aru katoa maira te au tangata ravarai i muri iaia, e kua akatangi te au tangata i te koe, e kua rekareka i te rekareka maata, keukeu atura te enua i te aruru.
41 Te akarongo ua rā Adonia, e te au manuiri katoa ki ona ra, kua pangia akera te kaki i te kai. E kite akerā Ioaba i te tangi o taua pu ra, kua tuatua akera aia, Eaa ra teia mutamuta maata, e te keukeu i te oire nei?
42 Te tuatua ua ra aia, i na, ko Ionatana maira, te tamaiti a Abiatara taunga ra kua karanga aturā Adonia kiaia, E aere mai ki roto nei; e tangata tau meitaki koe, ka riro taau tuatua i te meitaki.
43 Kua karanga aturā Ionatana kia Adonia, na ko atura, Kua akariro tikai to tatou pu te ariki ra ko Davida ia Solomona ei ariki.
44 E kua tono katoa te ariki ia Zadoka taunga, e te peroveta ra ia Natana, e ia Benaia te tamaiti a Iehoiada, e te Kereti, e te Peleti, e kua akanoo ratou iaia ki runga i te mule a te ariki ra:
45 E na Zadoka taunga, raua ko Natana peroveta ra, i akatainu iaia ei ariki i Gihona; i aere mai ei ratou ma te rekareka, keukeu atura te oire. Ko taua aruru ïa i kitea e kotou ra.
46 E te noo rā Solomona ki runga i te terono o te basileia nei.
47 E kua aere mairai te au tavini o te ariki e akaora i to tatou pu i te ariki ra ia Davida, i te tuatua anga e, Kia akameitakiia e te Atua to Solomona ingoa i toou ra ingoa, e kia akamaataia tona terono i toou ra terono. Kua tupou iora te ariki ki raro i rungao i te roi ra.
48 E kua tuatua katoa maira te ariki, Kia akameitakiia mai te Atua o Iseraela ko Iehova, ko tei oronga mai i tetai ei noo ki runga i toku nei terono i teianei rā, kua kite io nei oki toku mata.
49 Rokoia iora te au manuiri katoa i o Adonia ra e te mataku, kua tu akera ki runga, aere atura, ki tona aerenga, ki tona aerenga.
50 Mataku akerā Adonia ia Solomona, kua tu akera, aere atura, tāpu atura i nga tara o te atarau ra.
51 E akakiteia aturā Solomona, i na koia ra, I na, kua mataku a Adonia i te ariki ra ia Solomona: i na oki, kua tāpu i nga tara o te atarau ra, e te tuatua akera e, E taputou mai te ariki ra ko Solomona kiaku akonei e, kare aia e ta mai i tona tavini nei ki te koke.
52 Kua tuatua akerā Solomona, Kia akono meitaki aia ra, kare rava tetai io rauru ona e topa ki raro i te one, kia kitea ra tana ravenga kino, ka mate ïa.
53 Kua tono akera te ariki ra ko Solomona, e kua tuku maira ratou iaia ki raro mei runga mai i taua atarau ra. Kua aere maira aia, e kua tupou ki raro ki mua i te ariki ra ia Solomona: kua tuatua mairā Solomona kiaia, E aere ki to ngutuare.