Neke ki te tumu manako rikiriki

Neke ki te ngai o te au tumu tuatua

 TUA 36

Punua Puakatoro Auro

Punua Puakatoro Auro

AUE akara ake ana ra! Eaa ta te tangata e rave ra i teianei? Te pure ra ratou ki tetai punua puakatoro! Eaa ra ratou i rave ei i teia?

No tei roa a Mose ki runga i te maunga, kua karanga te tangata e: ‘Kare matou i kite e eaa tei tupu kia Mose. No reira ka maani tatou i tetai atua ei arataki ia tatou ki vao i teia enua.’

‘Ae,’ i karanga ai te tuakana o Mose ko Aarona. ‘Kiriti mai ra i to kotou au poe auro, e ka apai mai ei i te reira kiaku.’ Te rave anga te tangata i teia, akatae a Aarona i te reira e kua maani i tetai punua puakatoro auro. Kua karanga te tangata e: ‘Teia to matou Atua, ko tei arataki mai ia matou mei Aiphiti!’ I reira kua tamataora to Iseraela, e kua akamori i te punua puakatoro auro.

I te kite anga a Iehova i teia, kua riri tikai aia. Kua karanga aia kia Mose e: ‘Taviviki e oki ki raro. E angaanga kino tikai ta te tangata e rave maira. Kua ngaropoina ia ratou taku au ture e te tupou ra ki raro i te punua puakatoro auro.’

Kua oki viviki mai a Mose mei runga i te maunga. E i tona vaitata anga atu, ko teia tana i kite. Te imene ra e te ura ra te tangata takapini i te punua puakatoro auro! Kua riri tikai a Mose e kua pei aia i nga toka paraa tei tataia te au ture ki runga, e kua ngaangaa takiri te reira. E oti, kua rave aia i te punua puakatoro auro e kua akatae i te reira. Kua taviri aia i te reira kia ungaunga takiri.

Kua rave te iti tangata i tetai angaanga kino pakari. No reira a Mose i akakite ei ki tetai au tane kia rave i ta ratou au koke. ‘Tamate i te au tangata kino tei akamori i te punua puakatoro auro,’ i karanga ai a Mose. E 3,000 tangata tei tamateia e taua au tangata ra! Kare ainei teia e akaari mai ana e ka anoanoia tatou kia matakite i te akamori ia Iehova anake ua, auraka i tetai ua atu atua pikikaa?