Neke ki te tumu manako rikiriki

Neke ki te ngai o te au tumu tuatua

 TUA 18

Aere a Iakoba ki Harana

Aere a Iakoba ki Harana

KUA kite koe i teia au tangata ta Iakoba e tuatua atura? Muri ake i te aere anga no tetai au ra, kua aravei a Iakoba ia ratou i te pae i te ruavai. Te tiaki ra ratou i ta ratou mamoe. Ui atu a Iakoba e: ‘Noea mai kotou?’

‘No Harana,’ i na ratou ei.

‘Kua kite kotou ia Labana?’ i ui atu ei a Iakoba.

‘Ae,’ i pau mai ei ratou. ‘Tera tana tamaine ko Rahela e aere maira e te anana mamoe a Labana.’ Te kite ra koe ia Rahela e aere maira?

I te kite anga a Iakoba ia Rahela e te mamoe a Labana, te tungane o tona mama ko Rebeka, kua aere atu aia i te akaatea i te toka i runga i te ruavai, kia inu vai te mamoe. I reira kua ongi a Iakoba ia Rahela e kua akakite atu e koai aia. Rekareka tikai aia, e kua oki atu ki te kainga i te akakite ki tona papa ko Labana.

Mataora tikai a Labana i te ariki ia Iakoba kia noo ki ko iaia. E i te pati anga a Iakoba kia akaipoipo aia ia Rahela, kua rekareka a Labana. Tera ra, kua pati aia ia Iakoba kia angaanga nana e itu mataiti no Rahela. No tona inangaro maata ia Rahela kua rave a Iakoba i teia. Inara i te tae anga te taime no te akaipoipo, kua kite koe eaa tei tupu?

Kua oronga a Labana i tana tamaine mua ko Lea kia Iakoba, kare ia Rahela. I te ariki anga a Iakoba i te angaanga na Labana e itu akaou mataiti, kua oronga katoa a Labana ia Rahela ei vaine nana. I taua tuatau ra kua akatika te Atua i te au tane kia maata ta ratou vaine. I teia tuatau ra, mei ta te Pipiria rai e akaari maira, okotai ua rai vaine a te tane okotai.