Neke ki te tumu manako rikiriki

Neke ki te ngai o te au tumu tuatua

 APIIANGA 6

Te Vaitata Mai Nei te Parataito!

Te Vaitata Mai Nei te Parataito!

Te au mea kino e tupu nei i te enua nei te akaari maira e te vaitata mai nei te Parataito. Te tuatua ra te Pipiria e ka kite tatou i te au tuatau kino i mua ake ka tae mai ei te Parataito. Te noo nei tatou i roto i taua tuatau nei! Teia etai au mea te karanga ra te Pipiria e ka tupu:

Ka maata te au tamaki. “E tu mai tetai enua e tamaki mai ki tetai enua, e tetai basileia e tamaki mai ki tetai basileia.” (Mataio 24:7) Kua tupu teia totou. Mei te mataiti 1914 mai, kua tupu ana e rua tamaki i te ao e te au tamaki rikiriki e manganui. E mirioni te au tangata tei mate i roto i te reira.

Ka totoa te maki. Ka tupu ‘i tera ngai, i tera ngai, te maki-mate.’ (Luka 21:11) Kua tupu ainei teia? Ae. Kua tamate te cancer, te maki pukuatu, te maki maro, te maki mariri, te AIDS, e tetai atu au maki i te au tangata e mirioni ua atu.

Kare e rava te kai. I te ao katoa te vaira te au tangata kare e rava ana ta ratou kai no te kaikai. E mirioni te au tangata tei mate mei te matepongi i te mataiti ravarai. Ko teia tetai akairo e kare e roa atu ana ka tae mai te Parataito. Te karanga ra te Pipiria: “Te onge oki.”—Mareko 13:8.

 Te au ngaruerue enua. “E ngaruerue te enua i tera ngai, i tera ngai.” (Mataio 24:7) Kua tupu katoa teia i to tatou tuatau. Tere atu i te mirioni tangata tei mate i roto i te au ngaruerue enua mei te 1914 mai.

Te au tangata kino. Ka riro te tangata “ei noinoi” e “ei akaperepere ia ratou uaorai.” Ka riro ratou “ei anoano i te au mea e navenave ei ra, kare i anoano i te Atua.” Ka “akarongo kore [te au tamariki] ki te metua.” (2 Timoteo 3:1-5) Kare ainei koe e akatika ana e manganui te au tangata mei teia te tu i teia tuatau? Kare ratou e akangateitei ana i te Atua, e te akatupu ra ratou i te manamanata ki te aronga te tauta ra i te apii no runga i te Atua.

Te ta ua. Ka “maata [katoa] te kino.” (Mataio 24:12) Papu rai ka akatika koe e te kino tikai nei te ta ua i te au mataiti i mua ana. Ka keiaia, ka pikikaaia, me kare ka takinoia te au tangata i te au ngai ravarai.

Te akaari maira teia au apinga katoatoa e te vaitata mai nei te Patireia o te Atua. Te karanga ra te Pipiria: “Kia akara kotou i taua au mea nei i te tupu anga, kua vaitata ïa te basileia o te Atua, kia kite oki kotou.” (Luka 21:31) Eaa te Patireia o te Atua? E kavamani ia i te rangi no te Atua te ka apai mai i te Parataito ki teia enua. Ka tupau te Patireia o te Atua i te au kavamani o te tangata.—Daniela 2:44.