Neke ki te tumu manako rikiriki

Neke ki te ngai o te au tumu tuatua

 APIIANGA 9

Koai Ma to te Atua Au Oa?

Koai Ma to te Atua Au Oa?

E Tamaiti a Iesu Karaiti na Iehova e ko tona oa vaitata roa atu, e te akaperepere roa. I mua ake ka noo ei aia ei tangata i te enua nei, kua noo ana a Iesu i te rangi ra ei vaerua ora ririnui. (Ioane 17:5) E oti kua aere mai aia ki te enua nei i te apii i te tangata i te tuatua mou no runga i te Atua. (Ioane 18:37) Kua oronga katoa aia i tona oraanga tangata kia akaora mai i te au tangata akarongo mei te ara e te mate. (Roma 6:23) E Ariki a Iesu i teianei no te Patireia o te Atua, e kavamani i te rangi ra te ka apai mai i te Parataito ki teia enua.—Apokalupo 19:16.

E au oa katoa te au angera no te Atua. Kare te au angera i akamata ana i to ratou au oraanga ei au tangata i te enua nei. Kua angaia ratou i te rangi ra i mua ake ka maani ei te Atua i te enua. (Iobu 38:4-7) Te vaira e mirioni ua atu te au angera. (Daniela 7:10) Te inangaro ra teia au oa i te rangi ra o te Atua i te tangata kia apii i te tuatua mou no runga ia Iehova.—Apokalupo 14:6, 7.

E oa katoa to te Atua i te enua nei; kua tapa aia ia ratou e ko tona au kite. Ka akakite tetai kite i roto i te ngai akavaanga i tana i kite no runga i tetai tangata me kare tetai apinga. Te akakite ra te Au Kite o Iehova ki tetai atu i ta ratou i kite no runga ia Iehova e tona akakoroanga. (Isaia 43:10) Mei te au angera rai, te inangaro ra te Au Kite i te tauturu ia koe kia apii i te tuatua mou no runga ia Iehova. Te inangaro ra ratou ia koe kia riro katoa ei oa no te Atua.