Neke ki te tumu manako rikiriki

Neke ki te ngai o te au tumu tuatua

 APIIANGA 12

Eaa te ka Tupu i te Matenga?

Eaa te ka Tupu i te Matenga?

Ko te matenga te tuke i te ora. Mei te moe oonu rai te matenga. (Ioane 11:11-14) Kare e rauka i tei mate ra i te akarongo, te akara, te tuatua, me kare kia akamanako i tetai apinga. (Koheleta 9:5, 10) Te apii ra te akonoanga pikikaa e te aere ra tei mate ra ki tetai ao vaerua i te noo ma to ratou au tupuna. Kare te Pipiria e apii ana i te reira.

Kare e rauka i tei mate ra i te tauturu mai ia tatou, e kare e rauka ia ratou i te takino mai ia tatou. E mea matauia no te tangata kia rave i te au peu e te au atinga ta ratou e irinaki ra ka akamareka i tei mate ra. E mea mareka kore teia ki te Atua no te mea kua akanooia te reira ki runga i tetai o te au pikikaa a Satani. Kare rai te reira e akamareka i tei mate ra, i te mea kare ratou e ora ana. Auraka tatou e mataku me kare e akamori i tei mate. Kia akamori ra tatou i te Atua anake.—Mataio 4:10.

Ka ora akaou tei mate ra. Ka akaara a Iehova i tei mate ra kia ora akaou ki runga i tetai enua parataito. A te tuatau ki mua te reira e tupu ei. (Ioane 5:28, 29; Angaanga 24:15) Ka rauka i te Atua i te akaara i tei mate ra mei tei rauka papu ia koe i te akaara i tetai tangata mei te moe.—Mareko 5:22, 23, 41, 42.

Te manako kare tatou e mate e pikikaa ia tei akatotoaia e Satani te Tiaporo. Te akariro ra a Satani e tana au temoni i te tangata kia manako e te ora ra rai te au vaerua o tei mate ra e te akatupu ra i te maki e tetai atu au manamanata. Te akavare ra a Satani i te tangata, i tetai taime na roto i te au moemoea e te au orama. Te akaapa ra a Iehova i te aronga te tauta ra i te tuatua ki tei mate ra.—Deuteronomi 18:10-12.