Ka anoano tatou pouroa i tetai moni ei oko i te au mea tei anoanoia no to tatou ngutuare tangata. (Maseli 30:8) No te mea “e akapuanga tei te moni,” koia oki ka riro te reira ei paruru ia tatou. (Koheleta 7:12) Penei e mea ngata no tetai nga tokorua kia tuatua no runga i te moni, inara auraka e akariro i te moni ei akatupu i te manamanata i roto i to korua akaipoipo. (Ephesia 4:32) E mea tau kia irinaki nga tokorua i tetai e tetai e kia taokotai no runga i ta raua akapouanga moni.

TA TE PIPIRIA E AKAKITE RA: “Koai ïa tangata i o kotou na, kia akakoro i te are e akatu, kare e timata ana i te noo ki raro, ka tatau ei i te apinga ei ou e oti ei, i te rava anga tona apinga?” (Luka 14:28) E mea puapinga kia parani kapiti korua e ka akapeea me taangaanga i ta korua moni. (Amosa 3:3) Kimi i to korua manako e eaa ta korua ka oko e me ka rava ta korua moni. (Maseli 31:16) Noatu e moni taau ei oko i tetai apinga kare ra mei te mea e ka anoanoia rai koe kia oko. Tauta kia kore e o ki roto i te kaiou. E akapou ua i te moni tei rauka ia korua.—Maseli 21:5; 22:7.

TAAU KA RAVE:

• Me e moni toe ta korua i te openga o te marama, taokotai i to korua manako e ka akapeea korua i te reira

• Me e kaiou ta korua, parani meitaki e ka akapeea korua me akaiti mai i ta korua akapouanga moni. Ei akaraanga, ka rauka ua ia korua kia tunu i ta korua kai i te kainga eiaa e aere ki roto i te au are kaikai

TA TE PIPIRIA E AKAKITE RA: “I te akono atea marie anga i te mea tika, eiaa i mua i te aroaro o te Atu anake ra, i mua katoa ra i te aroaro o te tangata.” (2 Korinetia 8:21) Akakite ki toou tokorua eaa te maata o taau moni angaanga e te maata o taau moni e akapou ana.

Me rave i tetai au ikianga maata no runga i ta korua moni, e ui ua rai ki toou tokorua e eaa tona manako. (Maseli 13:10) Me uriuri kapiti korua no runga i te moni, ka tupu te au i roto i te akaipoipo. E akamanako rai e ko taau moni kare naau ua te reira mari ra na te ngutuare tangata.—1 Timoteo 5:8.

TAAU KA RAVE:

• Akatikatika na mua e eaa te maata o te moni ta tetai e tetai ka akapou kia kore korua e manata

• Auraka e vaoo kia tupu roa tetai manamanata ka uriuri ei no runga i te moni