Eaa ra teia au tangata i mataora maata ai? Te aere ra ratou ki tetai o ta matou au akaputuputuanga. Mei te au tavini rai o te Atua i mua ana tei ikuikuia kia uipa kapiti e toru taime i te mataiti, te tapapa atu nei matou kia uipa kapiti atu e tetai pupu tangata maata atu. (Deuteronomi 16:16) I te au mataiti ravarai, e toru a matou angaanga puapinga e rave ana: e rua akaputuputuanga kotinga e tai ra te roa, e e uruoaanga tapere e toru ra te roa. Akapeea matou te puapingaia anga mei teia au akaputuputuanga?

Akaketaketa ra te reira i to matou taokotaianga taeake Kerititiano. Mei te ngati Iseraela rai tei mataora ana i te akapaapaa ia Iehova “i roto i te au uipa anga ra,” te mataora katoa nei matou i te akamori kapiti iaia i ko i te au akaputuputuanga puapinga. (Salamo 26:12; 111:1) Te akatupu ra teia au akaputuputuanga i tetai atianga no matou kia aravei e kia taokotai atu ki te au Kite i roto i tetai atu au putuputuanga me kore au enua. E mataora ana matou i te kaikai kapiti i te tuaero i te ngai o te akaputuputuanga, te piri atu anga ki te au taeake i roto i teia turanga oaoa pae vaerua. (Angaanga 2:42) E kite mai ana matou i te tu aroa i reira te taokotai maira i te “kapiti anga katoa o te au taeake” i roto i teianei ao.—1 Petero 2:17.

Tauturu maira te reira ia matou kia tere ki mua i te pae vaerua. Kua puapinga katoaia te ngati Iseraela no te mea “kua kite ratou i te au tuatua” o te au Tuatua Tapu tei akamaramaia kia ratou. (Nehemia 8:8, 12) Te akaperepere katoa nei matou i te au ikuikuanga a te Pipiria e rauka maira mei ta matou au akaputuputuanga. Kua akatumuia te au porokaramu tataki tai ki runga i te tumu manako maata o te Tuatua Tapu. Na roto i te au akoanga manea, au tuanga tuatua kapipiti, au akatutuanga, kua kite mai matou i te rave i to te Atua anoano i roto i to matou oraanga. E akamaroiroiia ana matou e te au tupuanga o te aronga tei autu atu i te au akaaoanga ei au Kerititiano i teia tuatau ngata. I ko i te au uruoaanga tapere, e akaari mai ana te au kakau nuku i te au tua Pipiria ei mea tika tikai e ei apii anga ia matou i te au mea tau. E raveia ana tetai papetitoanga i te au akaputuputuanga ravarai no te aronga te inangaro ra i te akatapu i to ratou oraanga ki te Atua.

• Eaa ra te au akaputuputuanga i riro ei ei au atianga mataora?

• Akapeea koe e puapingaia ai mei te aere anga ki tetai akaputuputuanga?